Вторник, марта 19, 2024
Важное


Сундерьковонь 15-це чистэ республикасонок кармить тешкстамо Велень хозяйствасо важодицянь чинть. Мордовиясь – аграрной регион, секскак те кенярксчись ашти прявтокс ламот предприятиятнесэ ды организациятнесэ важодицятнень туртов. Весе сынь теить покш путовкс республиканть ды целанек масторонть кастомга-виевгавтомга. Истят предприятиятнень ютксо – «Тепличное» АО-сь.


Ютазь пингень 70-80-це иетнестэ, зярдо государствась башка мель кармась явомо эсь эрицятнень вадря ды лезэв ярсамопельсэ топавтомантень весе иенть перть, теке марто эмежсэяк, ламот республикатнесэ ды областтнесэ, покш оштнень маласо ушодсть тееме телень теплицат. Истя, 1979 иень ожоковсто Саранскоенть маласо панжозель эмежень кастомань теплицань васенце цехесь. Шкась мольсь, предприятиясь кассь-раштась, ламолгадсть цехтне ды, од технологиятнень тевс нолдазь, кассть производствань покшолматне. Неень шкане, ниленьгемень иетнень ютазь, «Тепличное» АО-сь – те виев ды кеме предприятия, косо важодить эсь тевень содыця ды ёроков специалистт, конатненень виень коряс топавтови куш кодамо производственной тев.

ЭМЕЖТНЕНЬ ВАНСТОМАСЬ – ПРЯВТ ТЕВ

Александр Евгеньевич Марков уш школасо тонавтнемстэ кочкась эстензэ тев – карми агрономокс. Секскак Саранскойсэ средней школанть прядомадо мейле мольсь тонавтнеме Н.П.Огарёв лемсэ МГУ-нь Аграрной институтов «Агрономия» специальностенть коряс. Студентэкс улема иетне ливтясть, эзть марявояк. Прядызе институтонть ды стясь кевкстема: ков молема важодеме? Цёрась чачсь-кассь ошсо ды велесэ роботамс покш мелезэ арасель. Теке шкастонть Александр парсте чарькодсь сеньгак, вузсо пурназь содамочитне кемекставить ансяк моданть марто важодезь. Секскак мольсь велень хозяйствань организацияс, кона ульнесь ошонть маласо, Луховкасо. Роботась тосо зярыя шка, ансяк вана тевесь тензэ ульнесь аволь мелень коряс, эрявсь мезе-бути лия. Ялганзо пельде марясь, Саранскоенть маласо аштиця эмежень кастома теплицатнес эрявить велень хозяйствань образования марто специалистт.

– Ялгань валонзо кунсолынь ды саинь мель варчамс, – корты Александр Марков. – Сынь тей 2010 иестэ ды малав сеске аравтымизь 1-це № цехень касовкстнэнь ванстомань коряс агрономокс. Нама, васенце шкастонть ульнесь аволь шожда, эрявсь весементень тонавтнемс ды уш тевсэ невтемс университетсэ саезь содамочитнень.

Эряви тешкстамс, цехесь, козо цёрась сась ды косо важоди течинь чис, теплицань комплекссэнть теезель сехте васенцекс, ютазь пингень 79-це иестэ. Ды тедедень ожоковсто сон тешкстынзе ниленьгемень иетнень.
Аламонь-аламонь весемесь чарькодевсь, тонавтовсь. Ды зярыя шкань ютазь од цёрась эсь прянзо марясь кеместэ, мерят, аволь вейке ие уш котьми те тевсэнть. Роботась вечкевсь ды кармась мелень коряс.

– Монь прявт тевем – касовкстнэнь эрьва кодамо зыянов унжатнеде ванстомась. Тень мельга вантано пек домкасто, эдь ансяк шумбра касовкстнэ максыть вадря ды ламо урожай, – ёвтни Александр Марков. – Неень шкане минек важодемасонть пек лездыть од технологиятне, конат аволь ансяк шождалгавтыть роботанть, истя жо а кандыть кодамояк зыян касыця эмежтненень. Секскак минек продукциясь – экологичной.

Зярдо А.Е.Марков кортась эсь роботадонзо, тешкстызе, мелезэнзэ сон пек тукшны ды, васняяк, сеньсэ, коллективесь вадря, эрить ояксчисэ ды вейке-вейкенень лездазь.

– Минек важодемасонть свал ули мезе-бути од, свал тонавтнетяно. Ломаненть туртов те пек эрявикс ёнкс. Эдь эсь содамочитнень кастозь, вадрялгады важодемаськак, – кемекстызе Александр Марков.

Юлия ЕРЕМИНА
Фотось Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».