Вторник, марта 19, 2024
Важное

Дубёнка ёнксонь Орданьбуе велесь райононь куншкакуронть эйстэ ашти овсе аволь васоло, паро ды мазый таркасо. Велесь сонськак аволь вишкине, администрациянть юрс жо эштё совить Кайбичева ды Красной Луга велетне. Эрицятнеде весемезэ лововить малав 1200 ломанть. Аволь умок минь содавтынек те эрзянь веленть ды кортнинек Орданьбуень администрациянь прявтонть Алёна Владимировна ЕРЯШЕВА марто. Алёна Владимировна ёвтнесь веленть течинь эрямодонзо, тесэ эриця ломантнеде, юткошкань ды кенярксчинь ютавтомань койтнеде.


– Апак сёпо тенк ёвтаса, веленек пек паро. Ды, васняяк, эрицятнесэ. Тесэнь ломантне панжадо седейть, сэтьметь, инжень вечкицят, куш кодамо роботадо ды стака тевде а пелицят. Мон арсян, минь, Орданьбуень эрицятне, уцяскав ломанть. Паро эрямонть туртов тесэ ули малав весемесь: важодить школа, эйдень кужо, ФАП, почта, ловномань кудо, зярыя магазинт ды кафе. Ютазь иестэ велесэнек панжсть вадрядояк вадря Социальной центра, конась мазылгавты велекуншканть. Кудотнес ветязь ведь, газ, киланготне теезь-витнезь. Ды, сехте прявтось – улить важодема таркат. А неень шкане те – васень тев. Велесэнек эрямось ошонседенть а явови. Весе тень кисэ покш сюкпря республикань Прявтонтень Владимир Дмитриевич Волковнень ды Дубёнка буень прявтонтень Сергей Геннадьевич Плешаковнень. Сынь явить минек велентень мель, топавтыть вешеманок ды кармавтоманок. Теить весементь эрицятнень лезэс, – тешкстась Алёна Владимировна.


Ды эдь алкукскак истя. Эрьвась парсте содатано, меельце иетнестэ велетнесэ эрицятне пек аламолгадсть. Ды васенце тувталокс теньсэ, паряк, ашти важодема таркатнень арасьчись. Тень коряс од ломантне туить велетнестэ ошов, вешнить седе паро эрямо. Ансяк вана велетне тень кувалма чамить. Нама, покш оштнень ды райононь куншкакуротнень маласо аштиця велетнень эштё улить виест, улить эрицяст. Орданьбуесь истямо велетнестэ.

Кода уш ёвтавсь икеле, велесэнть ули эрявикс социальной инфраструктура. Важоди средней школа. Прявтось эйсэнзэ Юрий Фёдорович Малыйкин. Ды кода сон ёвтнесь, неень шкане Орданьбуень школасонть тонавтницятнеде лововить 70 ломанть. Ули велесэнть эйдень кужояк, ков якить 35 эйкакшт.

Эйкакштнень туртов Орданьбуесэ тееви весемесь. Ды тесэ кортыть, лиякс а кода. Эйкакштне – веленть вандынь чизэ, сонзэ кирдицянзо-ванстыцянзо. Секскак эйдетнень туртов спортонь-налксемань площадканть теемадо меленть кирдизь однэк-сыренек ды топавтызь сонзэ. Теевсь сон Федеральной проектэнть лувсо. Тесэ улить нурсемат, кирякстнемань туртов пандынеть, спортонь снарядт, мини-футболонь ды чийнемань туртов площадка. Улить тренажёрткак, конат пек вечкевить аволь ансяк эйкакштненень, покштнененьгак. Площадкась ашти школанть вакссо ды тесэ ули весемесь физкультурань уроктнень ды спортонь факультативтнень ютавтоманть туртов. Те пек паро! Течи те комплексэсь мазылгавты велень куншкакуронть ды кенярдовты весень.
Кода тешкстынек икеле, ютазь иестэ Орданьбуесэ панжовсь Социальной од центра. Сон кармась эрявикс ды учовикс объектэкс. Кавто этажсо мазый ды вадря кудось теевсь «Устойчивое развитие сельских территорий» Федеральной целевой программанть лувсо. Пек паро, вейке зданиясо кармасть роботамо велень администрациясь, ФАП-сь, ловномань кудось, краеведениянь музеесь. Тесэ жо улить покш актовой зал, музыкань ды хореографиянь класст, важодить эрьва кодат кружокт. Роботы МФЦ-нь отделенияяк, мезесь пек эрявикс велень эрицятнень туртов.

– Социальной центрась минек зярдояк а эрси чаво. Тесэ сеедьстэ ютавтневить вастовомат, мероприятият, эрьва кодамо кенярксчитненень алтазь концертт. Велесэнть домкасто ванстовить койтне-кирдатне, секскак улить истят кенярксчить, конатне ютавтовить свал, мезеяк лангс апак вано. Ютксост – Роштовась, Мастясь, Раськеютконь Авань чись ды ламо лиятне. Эрьва кенярксчинтень культурань важодицятне анокстыть вадря ды мельстуиця концерт, арсить конкурст. Ды, эряви меремс, истят мероприятиятнесэ эсь ёрокчист невтить однэк-сыренек, – тешксты Алёна Еряшева. – Культурань мероприятиятнень велень эрицятне учить покш мельсэ. Тесэ эдь аволь кода ошсо, юткошканть, Культурань кудодо башка, ютавтомс а косо. Секскак кенярксчитнес сакшныть веленек.

Кенярксчинь мероприятиятнень ютавтомасо пек лездыть «Эрзянь ава» ды «Лейне» фольклорной ансамблятне. «Эрзянь ава» ансамблясь пурназель уш умок, репертуарсонзо пек ламо эрзянь кезэрень морот, конатнень аватне пек бажить ванстомс ды пачтямс одтнэнень. Коллективенть составозо ней уш полавтовсь, ансяк икелень морыцятне, конатнень ютксо Любовь Николаевна Еряшева, Вера Петровна Мучкаева, Раиса Григорьевна Катаева, Зоя Григорьевна Еряшева ды лиятне, свал анокт лездамс куш моросо, куш тевсэ. Секскак сынст совавтыть велень активенть юрс.
«Лейне» ансамблясь седе од ды седе покш мель яви неень шкань фольклоронтень.

...Течи Орданьбуе велесэ эрямось моли эсь койсэ. Ломантне котьмить эсь кудоютконь тевсэст, роботыть, трить-кастыть эйкакшт ды кемить, сынст веленть ули вандынь чизэ. Кемить, Орданьбуе велесь а ёми!

Юлия ЕРЕМИНА
Фототне: Эдуард Ретунский
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».