Среда, июня 03, 2020
Важное

Эмежень кастомань теплицатнесэ слесарень-химикень тевесь пек эрявикс. Сон домкасто ваны эмежтнень вадрячинть ды «шумбрачинть» мельга, вансты сынст эрьва кодамо унжинетнеде ды зыянонь теицятнеде. «Тепличное» АО-сонть химикень-слесарень тевтнень топавты Валерий Вячеславович Киселев. Эмежень кастома предприятиясонть сон важоди 2014 иестэнть саезь. Ды кода сась, сеске кеместэ кундась эсь тевентень.


– Мон чачинь Саранскоенть маласо, Елховка посёлкасонть. Прядыя тесэнь школанть, мейле 27-це № училищанть, тонавтнинь слесарь-инструментальщик специальностенть коряс, – ёвтни Валерий Киселев.
Училищанть прядомадо мейле цёрась мольсь роботамо Саранскоень тепловозоремонтной заводов. Топавтсь тосо кшнинь керсицянь тевтнень. Шкась ютась, тевтне предприятиясонть мольсть аволь пек парсте, эрявсь вешнемс мезеяк лия.

– Ютынь ламо организацият ды предприятият. Шкатне ульнесть а шождат, важодема таркань коряс кевкстемась аштесь пштистэ, – корты Валерий Киселев. – Саранскоенть маласо аштиця теплицатнеде содылинь парсте, молемс тов роботамо мелесь прясон чарась уш умок. Арсия ды кемекстынь эстень – варчамс. Паряк, сайсамизь ды тевем лиси. Ардтнинь тов кувать. Учинь, зярдо чами кодамояк тарка ды сайсамизь. Пельиень ютазь мелем топавтовсь, саимизь слесарекс-химикекс.

Валерий Вячеславовичнень важодемазо пек вечкеви. Сон роботы 4-це цехсэнть. Тесэ кастыть эрьва кодат эмежть: куярт, помидорат, баклажант, порцькат, пиже салат. Техникась важодемасо нолдави весе од, вадря.

– Монь васень тевем – ванстомс эмежтнень зыянонь кандыця унжинетнеде. Штобу эрьва куярось, помидорась, баклажанось ды лия эмежтне касовольть шумбракс, лезэвекс ды тантеекс. Тень туртов минь тевс нолдатано эрявикс удобрениятнень, конат ладить весе вешематнень коряс ды эмежентень а кандыть кодамояк зыян. Сынст важодемась юты ансяк унжатнень каршо, – тешксты Валерий Киселев.
Предприятиясонть неть иетнень перть важодемась цёрантень макссь ламо: сон котьми вечкевикс тевсэ, чарькодиця ды ояксчисэ эриця ломань ютксо. Ды сехте прявтось – тесэ вадря, тевентень оймень путыця прявт. А.М.Живаев содасынзе весе эсь важодицятнень, кунсолы весе сынст пшкадематнень ды лезды тенст эрьва кодамо тевсэ. А истят прявттнэ эрьва коллективсэ – покш уцяска.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».