«Равось – ояксчинь лей» этноэкспедициясь прядовсь ютазь пецясто Саратов ошсо, косо ушодозельгак. Ансяк те шкас мельсэ-превсэ вастовоматне, вейсэнь кортнематне, киштематне-морамотне, од проекттнэ, конатне арсезельть од ялгатнень-оятнень марто. Минь поладтано евтнеманть этноэкспедициядонть ды велявтано Астрахань ошов.
Колмоце чись.
ВАСТЫ АСТРАХАНЕСЬ
Июлень 26-це чистэ, причалсонть минек делегациянть, конань прявтсоль МР-нь Культурань, раськень политикань ды архивень тевень министрась Светлана Баулина, кши-сал марто вастызь Астраханень областень общественностень, властень представительтне ды казаконь ансамблясь. Тесэ минь ильтинек Московов Межэтнической журналистикань гильдиянь прявтонть Маргарита Лянгень ды сыргинек экскурсияв Астраханень кезэрень Кремляв. Ваннынек тосонь лия достопримечательносттненьгак: Оперань ды балетэнь од театранть; варчинек калонь икранть… «Мерема» фольклорной студиясь, натой, варчизе морсемс театрань сценанть лангсо. Теде мейле лия региононь, НКО-нь представительтне якасть Астраханень енксонь раськень культурань научно-методической центрав. Тесэ тенст невтезель экскурсия ды ютавтозель семинар, косо В. Д. Поленов лемсэ раськень творчествань Государственной Российской Кудонь прявтось Тамара Пуртова евтнесь седе, кода сынст организациясь вейсэ минек масторонь раськень творчествань центратнень ды кудотнень марто ванстыть ды кастыть-кемекстыть Россиянь раськетнень койтнень-кирдатнень. Миннацкультонь прявтось Светлана Баулина етнесь минек республикасо раськень кенярксчитнень ютавтомань практикатнеде.
Чокшне теплоходсонть, кода эрьва чистэ, ютасть эрзянь ды мокшонь кельтнень тонавтнемань урокт, конатнень ветясть школасо тонавтыцятне Александр Данильчев ды Светлана Сокорова. Седе тов творческой концертэнзэ невтизе «Мерема» этнографической фольклорной студиясь (художественной руководителесь – Екатерина Модина) ды морсесть «Федор Достоевский» теплоходонь инжетне, Волгоградсто «Покров» ансамблясь (прявтось – Виктория Путиловская).
Нилеце чись.
НИКОЛЬСКОЕ ВЕЛЕСЬ
Астраханень енксонь Никольское велесь содавикс православной Пресвятой Богородицань Рождествань храмсонть, конась эзь пекставкшно Ине Отечественной войнань шкастонтькак. Тесэ Саранскоень епархиянь секретарентень, протоиереентень Виктор Хохловнень макссть шка ютавтомс служба минек делегациянть туртов, ловнозель акафист Богородицанень ды проповедь.
Седе тов теплоходсонть ушодокшность важодеме колмо площадкат. Участниктне явновсть, мелест коряс, колмо енксов, конатне тенст седе пек малавикст. Кие кунсолось МР-нь Минкультонь проектэнь ды программань отделэнь прявтонть Юлия Елисеевань, конась евтнесь седе, кода анокстамс од проектт, кода сынст идемс. «Вайгель» радионь корреспондентэсь Оксана Белкина пурнынзе вейс журналисттнэнь, блогертнэнь ды сынь вейсэ арсесть, кода седе парсте ветямс вейсэндявкст социальной сеттнесэ. Эсь мелест евтызь Саратовасто – Мария Карманова, Саранскойстэ – Ксения Дементьева. Колмоце площадкасонть «Од веле» МРО-нь прявтось Евгений Ледяйкин евтнесь, кода ванстомс кезэрень культуранть неень шкасто, евтнесь тиринь Парынзэленть вельмевтемань ды кастомань-кемекстамонь тевдензэ. Теде мейле эсь важодемадост евтнесть Пенза енксонь Даньшино велестэ Николай Пиксин, Татарстансто – Елена Макарова, Пенза енкссто – Елена Первушкина ды лиятне. Теке жо чистэнть весе этноэкспедициянь участниктненень ютавтозельть ниле мастер-класст, конатнень невтизь Московсто Мария Шумкина (сон евтнесь, кода кодамс човалясто эрьгть ды каркст), Татьяна Китаева (невтизе, кода стакшномс някат ды мазый каркст), Алина Сорокина (евтнесь, кода кармась кодамо човалясто кирьгава каямот ды мазылгавтомапельть) ды Антон Гаушев (невтинзе эсензэ кедьсэ теезь чувтосто керсевкстнэнь). Тешкстама, Антон Гаушев, эйкакшонь школань чувтосто керсемань коряс тонавтыцясь, казизе эсь лишминензэ-налкшкензэ теплоходсо вастовозь содавикс актрисантень Оксана Сташенконень, конась мельспаросо снимсевтсь мартонзо ды пек дивсесь минек раськетнень культуранть, оршамопельтнень мазычист кувалма.
Чокшне енов, коень коряс, таго концерт. Ней морсесть «Росичи» моронь театрась ды Артем Мамаев.
Ветеце чись.
МЕКЕВ – ВОЛГОГРАДОВ
Кие а соды, евтнеса, теплоходось мекев велявты кудов Астраханьсэ ды таго сови Волгоград ошонтень, косо миненек максозельть эште вете част ванномс те мазый ды покш Рав чирень ошонть.
Ансяк теде икеле минь весе вейсэ ютавтынек акция: стинек омбоце ды колмоце палубатнес ды таго морынек содавикс моро. Ней «Эх, земля ты, матушка Россия!»
А те шкане теплоходсонть ушодозель «Тиринь келесь, национальной культурась, литературась: касомань-кемекстамонь инновационной вектортнэ» форсайт-сессиясь, конань прявтсольть
М. Е. Евсевьев лемсэ МГПУ-нь филологиянь факультетэнь тиринь келень ды литературань кафедрань прявтось Ольга Налдеева ды Мордовиянь Правительстванть юрсо НИИГН-нь ведущей научной сотрудникесь Александра Каторова.
Волгоградсто туемстэ минь карминек эште вейке акциянь участникекс, конанть ютавтнить весе теплоходтнэсэ: каинек цецят Равонтень Ине Отечественной войнань шкасто Мамаев Кургансо чавовозь солдаттнэнь лемс. Те ледстнемань минутась кадовсь весень седейс, ламонь натой эзть кирдеве сельведест.
А седе тов ушодовсь «Равось – ояксчинь лей. Рав чиресэ эриця раськетнень культурань диалог» XXI-це этнокультурной экспедициянть-фестиваленть торжественной пекстамось. Евтазельть этноэкспедициянь "тештетне", сехте вадря проекттнэ, тешкстазельть 15 регионтнэстэ сазетне, участниктненень максозельть дипломт,
МР-нь Минкультонь прявтось Светлана Баулина весенень мусь паро валт. Нама, кода концерттэме? Меельце чистэнть эсь докачист невтизь весе: профессиональной артисттнэ ды аволь ансяк.
Омбоце чистэнть минь пачкодинек Саратовав ды простинек "Федор Достоевский" мазый ды мельстуиця теплоходонть марто од моросо. Те этноэкспедициясь прядовсь ды курок ушодови сыця иенсентень анокстамось! Вастомазонок, Рав лей! Минь эште куватьс карматано ледстнеме тонь чивалгоматнень ды чилисематнень!
Марина Девятова