Важное

 

Сынь а пеняцить стака важодемаст лангс. Сетне, кить кочкизь эрямонь тевекс полициясо важодеманть, чарькодить – шожда тенст а ули. Кеме обуця марто роботыцятне топавтыть эсь тевест весе виень путозь, парсте ды педе-пес. «Эрзянь правдань» ютазь номерсэнть минь пачтинек эрзянь алкуксонь цёратнеде, конат важодить полициясо. Течи поладтано ёвтнеме «Чамзинский» Россиянь МВД-нь ММО-нь Дубёнкань ёнксканть 17№ полициянь отделениянь уголовной розыскень важодицятнеде.

 

Оперуполномоченноесь Андрей Николаевич Бояркин важоди тесэ 2010 иестэ саезь. Чачсь теске, Дубёнкань районсо. Школань прядомадо мейле тонавтнесь М.Е.Евсевьев лемсэ МГПИ-нь историянь ды правань факультетсэ. Седе тов – Правовой академиясо. Васня важодсь Чаунзасо следователекс. Мейле сась Дубёнкав. Кода ледстни Андрей Николаевич, уш вишкинестэ ды школасо тонавтнемстэ милициянь зданиянть вакска ютамсто ёжозо полавтовиль: ульнесь мелезэ тов совамс, содамс, мезе тосо теить, кода важодить? Мелесь топавтовсь, зярдо кассь, прядызе тонавтнеманзо, ульнесь образованиязо ды сась тей роботамо.

– Минек важодемась кадык стака, сон ялатеке тукшны мелезэнь. Максы эрямонь опыт. Савкшны кортамс эрьва кодамо ломань марто. Ве ёндо уш неяви: кие ломанесь ды кодамо обуцязо, кода мартонзо кортамс. Роботась мельстуиця.

Кодамо обуця марто эряви роботамс уголовной розысксэ?

– Эрявить вийть, цидярдома, кеме обуця. Муемс весень марто кель-вал. Роботамс сави ламо. Пелевидьс тевенть а кадсак, эряви прядомс педе-пес. Эрьва тевенть весе вейсэ кортасынек, кода ды мезе, арсетяно аравтлув: мейстэ ушодомс, кода ветямс тевенть. Эрьванть эсензэ версиязо. Мейле пратано ве мельс. Нама, аволь весе преступлениятне сеске панжовить. Минек тия юты трасса. Сеедьстэ зыянт тейнить ве ёндонь ломантне. Покш сюкпря ёвтавлинек Саранскоень МВД-нь важодицятнень туртов, конат лездыть тенек. Зярыя службатнень вейсэнь важодемась канды лезэ. Нама, ошонь коряс тевтнеде аволь пек ламо. Тень лангс апак вано, роботавтомо а аштетяно, свал улить тевть.

Саемга, тунда ошонь эрицятне сыть пирест путомо ды несызь порксазь-яжазь эрямо таркаст. Салыцятне – од ломанть, конат косояк а важодить ды арась мелест важодемс.

Андрей Николаевич, кодамо тев лангсо савсь тенк кувать важодемс ды панжомс сонзэ?

– Ульнесь истямо тев. 2013 иестэ саласть машина, таргизь весе потмонзо. Преступлениясь ульнесь стакатнень ютксо. Иешка ды седе ламо эзь панжово тевесь. Арасель мезеяк, а мезестэ кундамс тевентень. Мейле карминек рузонь велетнева ардтнеме, од ломантнень марто кортамо. Понгсь эрявикс информация. Карминек содамо, цёрась армиясоль. Учинек, зярдо сы. Мартонзо кортынек. Сеске мезеяк эзь ёвтне. Ансяк ульнесть те тевенть неицят, конат ёвтнесть: салыцясь сон. Теевемс а ков. Туизе салазенть, максызе сонсь, азоронть икеле нолдавтызе чумонзо. Суд ульнесь. Теде мейле зыянов тевть эзь тейне, урьвакстсь ды стясь виде килангс. Те тевенть лангсо ламо важодинек, секскак эзь стувтово.

Кодамо тев ветятадо профилактиканть коряс?

– Вастневтяно кемгавксово иеде седе вишкинетнень марто, якатано школав, кортатано. Тесэ ули техникум. Общежитияв чокшне якатано. Пелест эйкакштне ве ёндонь. Улить урозт. Мартост кортатано: куваяк авольть чара, ковгак иляст понго, васов иляст ёмсе. Арась мелест тонавтнемс, туить кудов, тонавтыцяст туртов телефононь номер а максыть. Сынь мелявтыть. Пшкадить тенек. Минь мартост вастовтано, эрьванть марто сельмеде сельмс кортатано, толковатано.

 Андрей Николаевичень чуросто эрси юткошказо. Неть уцяскав минутатнень сон ютавты кавто эйдензэ ды нинзэ марто, конат свал учить эйсэнзэ кудосо.

* * *

Алексей Юрьевич Буячев васня важодсь лия таркасо. Мейле «Чамзинский» Россиянь МВД-нь ММО-нь Дубёнкань ёнксканть 17№ полициянь отделениянь прявтось В.В.Кабаков тердизе ды мерсь варчамс эсь прянзо полициясо. Сась сон тей важодеме 2013 иестэ ды роботы уголовной розыскень группань оперуполномоченноекс. Вана мезе ёвтнесь эсь прядонзо:

– Чачинь Дубёнка ёнксонь Красные Луга посёлкасо. Тонавтнинь М.Е.Евсевьев лемсэ МГПИ-нь историянь ды правань факультетсэ. Омбоце образованиям юридической. Важодемась тукшны мелезэнь. Те монь. Савкшны роботамс читькак ды ветькак. Те монь а тандавтни.

Алексей Юрьевич, ледстяви васенце тевенк?

 

– Важодемань васенце чистэнть сыргинек участковоенть марто ульцянь патрулировамо. Шказоль вень колмо част. Косояк мезеяк а маряви. Рединек машина, конань номерэнзэ ваднезельть рудазов ловсо. Молинек ваксозост. Карминек кортамо, чарькодинек, тесэ мезе-бути а истя, саинек отделс. Теде икеле ульнесть зярыя саламот. Колмо лавкат саласть. Салыцятне – самай сынь. Салазенть муинек. Прявтост ды ветицяст ульнесь минек ёнксонь. Вана истямо тев роботамонь васенце чистэ. Эрьва кодат тевть эрсить. Седе сеедьстэ саламот. 2016 иестэ лиссь вейке тев. Мольсь сумка марто бабине. Лавка икеле аштесть кавто од ломанть, конат сонзэ редизь. Парксо сасызь бабанть, вачкодизь, тона прась, сумканзо нельгизь. Кундынек сынст Отяжбуестэ. Истят тевтнеде ламо.

Роботатано вейке командасо. Минек полициянь отделениясо эрьвась монь туртов пример. Ули кинь лангс ваномс ды кинь пельде тонавтнемс. Кецят, зярдо муевить салыцятне ды зыянов тевень лия теицятне, муеви видечись ды чумондовить апаронь кандыцятне.

 

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».