Воскресенье, февраля 23, 2020
Важное

 

Даволковонь 4-8-це читнестэ Саранскоень Эень дворецсэнть ютавтовсь Юниортнэнь ютксо фигурной кирякстнемань коряс Россиянь пелькстамось.

Сонзэ панжомо сакшнось Мордовиянь Прявтось Владимир Волков. Сон ёвтась поздоровт весе пелькстыцятненень ды ваныцятненень, истя жо шумбракстнесь покш инжетнень марто – Россиянь Фигурной кирякстнемань федерациянь президентэсь, олимпийской чемпионось Александр Горшков,  Федерациянь генеральной директорось Александр Коган ды СССР-нь ды Россиянь заслуженной тренерэсь Елена Чайковская.

– Минек туртов покш каштанчи ютавтомс истят пелькстамот. Саранскоесь ловови фигурной кирякстнемань коряс Россиянь прявт куншкакуротнестэ вейкекс, – мерсь Владимир Волков.

Те чемпионатсонть изницятне жо совить Россиянь од ломанень сборноентень, кить кармить пелькстамо масторлангонь чемпионатсонть те иень эйзюрковсто Таллинсэ.

– Курок эштё вейке, неень шкань арена панжови Саранскоень Универсальной залсонть. Сонзэ трибунатнес кармить кельгеме 8 тёжат ломанть. Ды минь покш мель марто одс карматано учомо тынк Мордовиянь прявт ошсо! – мерсь Владимир Волков.

Россиянь Фигурной кирякстнемань федерациянь президентэсь Александр Горшков тешкстызе: Саранскоень эень аренась макссь ушодкс ламот од спортсментнэнень, конат мейле кармасть масторлангонь ды европань спортонь пелькстамонь призёрокс ды изницякс, истя жо олимпийской чемпионокс.

Тешкстасынек, Мордовиянть пелькстамотнесэ невтизе конькасо фигурной кирякстнемань коряс СШОР-нь воспитанникесь Артём Тимакин.

Истя, цёратнень ютксо изнясь Даниил Самсонов, тейтертнень ютксо сехте вадрякс кармась Камила Валиева. Эй лангсо киштематнесэ изнясть Елизавета Шанаева ды Дэвид Нарижный, парной кирякстнемасонть – Аполлинария Панфилова ды Дмитрий Рылов.

Татьяна Иконникова

Фотось саезь Фигурное катание России вк куростонть

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».