Вторник, марта 19, 2024
Важное

 

Аволь сеедьстэ савкшны эрсемс Мордовиянь томбалень эрзятнень кедьсэ. Истят вастовоматне свал кепедить меленть. Неть читнестэ журналистэнь китне-янтнэ ветякшнымизь Нижегородской областень Покш Болдинань райононь Пикшня эрзянь велев.

Бути ардат Саранскоенть ды Покш Игнатованть ёндо Покш Болдинань А.С.Пушкин лемсэ музеень комплексэнтень, Пикшнясь кодаяк а менстяви. Седе икеле а весть савкшнось ардтнемс те веленть пачк ды кода-бути эзинь арсеяк, сон кезэрень эрзянь ды тесэ чачсь содавикс поэтэсь Павел Кириллович Любаев. Покш Игнатовань райононь Протасовасо командировкасо улемстэ Пикшняв тердекшнимим умонь оям Иван Иванович Вечканов. Сон физикань ды математикань тонавтыця. Протасовасо школанть пекстамодо мейле роботась Пикшнянь школасо. Ней тосо роботы козяйказо.

Протасовасто Пикшняс кеменьшка вайгельбеть. Веленть тарказо пек мазый. Содазь, эрзятне свал вечкильть эрямо вирь маласо.

Сехте васенцекс кинек лангс понгсь велень администрациясь. Владимир Романович Святкин, сонзэ прявтось, таркасонзоль. Тесэ свал ламо ломанть. Эрицятне тей сакшныть эрьва кодамо кевкстемань коряс. Вана нейгак кабинетсэнзэ ульнесть кавто ломанть, мезде-бути толковасть. Куш самодонок эзинек гайневтекшне, Владимир Романович прянзо покшкавтнеме эзь карма, ильтинзе тензэ сыцятнень ды кармась мартонок кортамо. Ёвтнесь веледенть. Зярдо-бути Пикшнясь совиль Мордовиянь Покш Игнатовань райононтень. Истя ульнесь аволь кувать, мейле мекев велявтызь Покш Болдинань районов.

– Неень шкане велесэнек эрить 453 ломанть. Роботыть школаськак, микшнемань лавкатнеяк, ули почта, медпункт, Культурань кудо, библиотека, – ёвтни Владимир Романович. – Икелень «Михайловский» вельхозпредприятиясь райононсетнестэ ульнесь покштнестэ вейкекс. Перестройкань иетнестэ сон явовкшнось кавтов. «Маяк» ды «Пикшенское» хозяйстватне цидярдсть аволь кувать. Сыньгак каладсть. Ней од ломантненень роботась а сатны. Ламот семияст трямга ардтнить Московов ды Нижнеев. Седе ламотне эрить эсест хозяйстватнень вельде: путнить эмежть, трить ракшат, кирдить мекшть.

Владимир Романович Святкин тешкстызе, велень эрямонтень хозяйстванть каладомась кадсь сехте покш тешкс. Паро сеяк, те шкас велень соцкультбытэнь структуратне роботыть. Те кепеди ломантнень мелест. Пикшнясо лаказь лаки спортонь эрямось. Футболонь, волейболонь командатне свал сайнесть таркат райононь турниртнэсэ. Тенень невтемакс добовазь кубоктне. Сынь аштить администрациянь стендтнэсэ. Икелень иетнестэ валыльть хоккейсэ налксеманть туртов таркаяк. Тесэнь хоккеисттнэ истя жо ульнесть васенцетнень ютксо.

Владимир Романович Святкин покш мельспаросо ашти «Чилисема» ды «Пикшенский» самодеятельной коллективтнень артисттнэнь кувалма. Сынст программасонть седе ламо эрзянь морот.

Седе тов кинек таргавсь велень эрзянь культурань ды бытэнь музеентень. Пикшнясо истямояк ули! Сон ашти куншкакуронь ульцянть песэ. Асодыцятненень ардома кинть кувалма путнезь тешкст, косо стрелкасо невтеви тов кись. Вастымизь музеень прявтось Василий Никифорович Любаев. Сон Павел Кирилловичень племянникезэ. Чачсь ды кассь тесэ. Мейле кувать роботась Саранскоень «Резинотехника» предприятиясо инженерэкс-механикекс. Пенсияс лисемадо мейле сась тиринь велев ды покш мельсэ кундась музеень тевентень. Тонась панжозель 2010 иестэ ды ней сови Покш Болдинань историко-художественной комплексэнтень. Мезть тесэ ансяк арасть. Музейсэнть теезь экспозиция, кона невти эрзятнень кезэрень эрямост. Экспонаттнэнень таркаськак а сатны. Василий Никифорович ёвтызе мельспаронзо – курок музеесь панжи эштё вейке пелькс. Икелень администрациянь прявтось Василий Леонидович Жариков эсь ярмак лангс рамась кудо ды усковтызе тей. Сон поладозь музеень кудонтень. Вана истят ломанть эрить Пикшнясо. Ванат экспонаттнэнь лангс ды сельметь икельга юты минек историясь. Весементь ютксо тесэ ашти 1967 иень «Эрзянь правда» газетаськак. Лия стендтнэсэ содавикс эрзятнень портреттнэ: А.М.Доронинэнь, К.Г.Абрамовонь, П.К.Любаевень. Музеенть марто велувсо роботы «Чилисема» коллективеськак. Сынь музеенть марто вейсэ ютавтнить экскурсиянь программа. Лемезэ: «Васттано инжетнень эрзякс». 2012 иестэ те программась лиснесь изницякс «Лучшая музейная программа Нижегородской области» номинациясонть. 2014 иестэ те проектэнтень максозель Российской Федерациянь Культурань министерствань диплом. Сонсь Василий Никифорович творческой ломань. 2009 иестэ лиссь книгазо. Лемезэ – «Пикшень». Авторось ёвтни тиринь веленть историядо, эйсэнзэ эрицятнеде.

Музеень экспонаттнэнь ванномадо мейле совинек велень школав. Сонзэ историясь пек сюпав. Школась ашти автомагистральденть аволь васоло, кирьпецень кудосо. Эряви тешкстамс, Пикшня велесэнть школась васенцеде панжозель 1890 иестэ. Сон ульнесь церковно-приходской. Васенце тонавтыцякс ульнесть священникесь Алексей Раевский ды диаконось Алексей Преображенский. Уш 1904 иестэ Пикшнянь школасо тонавтнесть ведьгемень эйкакшт. Велень эрицятнень ледстнематнестэ содазь, веленть куншкасо ульнесь покш площадь, косо стявтозель чувтонь церькова, вакссонзо священникень кудо ды кавто школат. Се шкане тейтерькатне ды цёрынькатне тонавтнесть башка-башка.

1928 иестэ Пикшня велень школасо кармасть тонавтомо сисем иеть. Эряви меремс, кодат стака шкат историянть перть велесь эзь печтякшно, школась свал роботась. Ульнесть шкат, зярдо те школась районсонть сехте вадряль. Тесэнь педагогической коллективесь покш мельспаросо ашти эсь выпускниктнень кувалма. Тестэ лиссть ламо содавикс ломанть. Тесэ тонавтнесть Советской Союзонь Героесь Григорий Яковлевич Ямушев, генерал-лейтенантось Григорий Фёдорович Туршатов.

Пикшня велень школасто лиссть зярыя учёнойть: физико-математической наукань докторось Александр Кузьмич Батькин, психологической наукань кандидатось, доцентэсь Вера Ивановна Богданова, юридической наукань кандидатось, Н.И.Лобачевский лемсэ ННГУ-нь юридической факультетэнь деканось Виктор Иванович Цыганов, физико-математической наукань кандидатось Евгений Николаевич Богданов, Мордовиянь заслуженной писателесь Павел Кириллович Любаев.

Ней Пикшня велень школась 9 иень. Сон ловови Болдинань райононь школань филиалокс. 1979 иестэ саезь директорокс тесэ роботы Владимир Александрович Ичков. Сон руз, тесэнь эрзятнень марто сеске мусь кель-вал. Эйкакштнеде тесэ – 33. Вейксэ иеде мейле, кинь ули мелезэ, тонавтнеманть поладсы Покш Болдинасо. Сон тестэ нилешка вайгельбеде ве ёно. Пикшнянь школасо истя жо ули музей. Экспонаттнэнь мукшнызь ды кандтнизь сынсь эйкакштне. Директоронть кевкстнинек эрзянь кельдентькак.

Минек школасо эйкакштне тиринь келенть тонавтнить факультативсэ омбоце классто саезь ветеце классос. Литературанок ды учебникенек улить. Саранскойстэ сеедьстэ кучнить «Чилисема» ды «Сятко» журналтнэнь, – ёвтни В.А.Ичков. – Тонавтыцянок улить. Шабра Мордовиянь велетнесэ пекставсть зярыя школат, тосонь педагогтнестэ ламот кадовсть роботавтомо, ламонь саинек тей.

Директоронть кунсолозь, кевкстия, кода аштить тевтне тень коряс Нижегородской ёнкссо. Кевкстемам лангс каршо валонзо дивавтымизь: «Минек Нижегородской областьсэ снартнить ванстомс национальной образованиянть», – мерсь Владимир Александрович. Лисни, рузтнэ ванстыть келенек. Эрзятнененьгак теде а эряви стувтнемс!

Николай Евдокимов.

Нижней Новгородонь ёнкс,

 Пикшня веле

Фототне Э.Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».