Вторник, марта 19, 2024
Важное
 
Мордовия Республикань прокуратурань органтнэсэ содавикс ломантнестэ вейкентень – Матвей Михайлович Казаковнень, ноябрянь 22-це чистэ топодевельть бу 66 иеть. Ризксэнтень, ормась седе виевель, ды те иень апрелень 19-це чистэ сон тусь эрямостонть. Тусь пек вадря ломань, паро оя, коллега.


Эсь шкасто Матвей Михайлович ульнесь республикань прокуратурань органтнэнь аволь ансяк паро специалистэкс ды эсь тевень профессионалокс, сон эштё пек вечкилизе спортонть ды весень тердсь эрямонь шумбра лувонь ветямо. Секс Дубёнкань райононь Орданьбуе велень эрицятне ды, васняяк, М.М.Казаков лемсэ шахматонь-шашкань клубонь прявтось Н.А.Чаткин, састь мельс М.М.Казаковонь лемензэ а стувтомга чачома чистэнзэ районсонть ютавтнемс шахматсо налксемань коряс пелькстамо.

Матвей Михайлович пек вечкилизе тиринь ёнксонзо – велензэ, райононть, республиканть. Тень эштё весть кемевтизе М.М.Казаков лемсэ шахматонь коряс турнирэнть панжомсто сонзэ наставникесь, 1990-2000 иетнестэ Мордовия Республикань прокурорось, РФ-нь заслуженной юристэсь П.Е.Сенькин: «Улемс эсь тиринь ёнксонь патриотокс – те покш достоинства!»

Самай истя характеризовизе минек земляконть Павел Ефимович.
«А се, што Матвей Михайлович спортсменэль, кемевтемс тенень а эряви. Сон ульнесь мини-футболонь коряс республикань прокуратурань сборной командань свалшкань капитанокс, участвовась эрьва кодамо оштнева ламо тёжат вайгельбень велопробегтнесэ. Эсензэ велосипедсэнть сон пачколесь Берлинс, Мурманскойс, Байкалс ды масторлангонь лия таркатнес, мезенть кувалма Матвей Михайлович аштесь каштанчисэ…» – тешкстась Павел Ефимович.
Эрьва велопробегтенть мейле М.М.Казаков мельспаросо ёвтнесь мартонзо апак учне лисезь тевтнеде, ютксост ульнесть истят, конатне кандсть зыян шумбрачинтень ды мик целанек эрямонтень. Ансяк эрьвастонть сон муиль лисемань ки, изнилизе икелензэ путозенть ды свал оптимистичнасто вансь икелепелев. Мезеськак эйсэнзэ эзь тандавто, ды шкань ютазь таго сыргиль килангов. Дивавтсь весень стакачиде а пелемасонть, энтузиазмасонть, пертьпельксэнтень ды ломантненень вечкемасонть.

П.Е.Сенькин истя жо ёвтась сюкпря шахматонь-шашкань клубонтень ушодксонь теицянтень, кона максызе сонензэ М.М.Казаковонь лементь, – Н.А.Чаткиннэнь; райононь прявтонтень С.Г.Плешаковнень спортсментнэнень лездамонть кис; шашечной турнирэнь пурныцятненень – ютавтоманть кис. Меельцекс П.Е.Сенькин кармавтсь а стувтнемс те паро ломанденть.
Мельстуиця куля пелькстамонть панжомсто пачтясь райононь Администрациянь Социальной роботань коряс управлениянь прявтось Е.Г.Маркова:

– Шахматсо налксемань коенть карматано ванстомо ды виевгавтомо седе товгак. Карматано ветямо робота од ломантнень ютксо, штобу сынь явовольть мель те налксемантень, ды аволь ансяк минсенек райононсетне, истя жо шабра веленсетне ды райононсетне. Тейсынек весементь районтнэнь ютксо М.М.Казаков лемсэ истят пелькстамотнень ютавтнемга. Минь арсинек МР-нь заслуженной юристэнть М.М.Казаковонь ледстнемга шахматонь турнирс изницянь переходящей кубок.
Тешкстасынек, те пелькстамосонть ёрокчист невтизь шабра Сурской ды Ардатовской районтнэстэ, Поводелень ды Чиндяновань школатнестэ шахматисттнэ.
Почетной инжекс ульнесть МР-ва РФ-нь СК-нь СУ-нь сотрудниктне: А.В.Ситников, С.А.Андреев, А.Н.Данилов, М.М.Казаковонь паро оязо И.П.Сырескин, 17 № ОП-нь прявтось В.В.Кабаков.
Е.Г.Маркова турнирэнь участниктненень ёвтась сюкпря райононь прявтонть пельде, истя жо мероприятиянть ютавтыцятненень.
Пелькстамонть панжомадо икеле пурнавозтнень икеле кортасть МР-ва РФ-нь СК-нь Следственной управлениянь прявтось А.В.Ситников, Матвей Михайловичень цёранзо – Артём ды Михаил, конатне мельспаросольть тетяст лементь а стувтоманзо кувалма. Сынь теизьгак налксемантень ушодксонть.
Налксематнень прядовомадо мейле теезельть итогтне. Вейсэнь командасо 1-це тарканть ды изницянь переходящей кубоконть саизе Дубёнкань райононь командась, конантень совасть Р.В.Фехрутдинов ды Д.П.Еряшев.

Изницятне казевсть Грамотасо ды ярмаконь премиясо.
Турнирэнь ютавтыцятне ёвтыть сюкпря лездыцятненень – М.М.Казаковонь семиянтень, МР-нь Прокуратурантень, МР-ва РФ-нь СК-нь Следственной управлениянтень, «СтройИнвест и К» ООО-нь директоронтень С.С.Пиянзиннэнь.
Тешкстасынек, пелькстамосонть ёрокчист невтсть эйкакштнеяк: Матвей Качалов, Николай Русскин, Иван Куданкин, Максим Святкин. Сыньгак эзть кадово казневтеме.
Башка казнесэ тешкстазельть Саранскойстэ Илья Коломенцев ды Алексей Ларькин.

Владимир СУЛЬДИН
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».