Вторник, марта 19, 2024
Важное

Умарьковонь 7-це чистэ Мордовия Республикань Прявтось Владимир Волков онлайн лувсо ульнесь кенярксчинь промкссонть, кона алтазель Строителень чинтень, сон ютавтовсь Республикань Кудосо.

Региононь руководителесь пшкадсь пурнавозтненень поздоровонь ды сюкпрянь вал марто:

Монь туртов те лиятнень ёнов а молиця кенярксчи. Оймесэ ульнинь ды кадован строителекс. Кизна строямонь таркатнесэ ютавтан пек ламо шка. Самай тосо маряви созиданиянь алкуксонь виесь, топавтовиця тевтнень покшчист, неяви важодемань результатось. Секскак ёвтан седейшкавань поздоровт тыненк ды мартонк важодицятненень минек вейсэнь кенярксчинть – Строителень чинть кувалма!

Владимир Волков тешкстызе, Мордовиянь строительтне пек виевстэ ды лезэвстэ важодсть пандемиянть каршо бороцямонь стака шкастонть, топавтсть покш важодема больницятнень, поликлиникатнень, обсерватортнэнь анокстамост коряс.

– Строямонь организациятне васенцетнень ютксо каясть яволявтомат тевтеемаст одкстомтоманть коряс, тень пингстэ топавтовсть санитарно-эпидемической весе вешематне. Ды минь, нама, лездынек тенст, – мерсь Мордовиянь Прявтось. – Весе вейсэ миненек удалась печтямс те стака шканть. Васенце пельиень невтевкстнэнь коряс строямонь тевтне кассть 8 % (ютазь иень теке шкантень), ды кармасть малав 8 млрд. целковойть. Те пек покш изнявкс, кона топавтовсь пандемиянть шкасто, зярдо экономикась печтясь покш стакачить. Ней республикань стройплощадкатнесэ тевтне аштить вановт ало. Инфекциянь «кирваземат» апак нолда.

Республикань икеле молиця строямонь весе организациятне ванстозь. Прявтось – 30 тёжадо ламо важодицятне те шканть перть топавтсть эсь тевест ды получасть зарплата, андсть семияст.

Покш тевть ветявить нацпроекттнэнь лувсо. Тедеде сынст топавтомс явовить малав 17 млрд. целковойть, арсевить строямс ды витнемс 120 ламо объектт. Ярмактне максовить социальной ды промышленной инфраструктурантень, жилищно-коммунальной хозяйстванть одкстомтомантень ды лия ёнкстнэс.

Таштамковонь 1-це чистэ од школа панжови Торбеевань райононь Дракина велесэ, истя жо школа стявтови Лямбирень райононь Аксенова велесэ. Эйдень кужот строявить Ялга посёлкасо, Дубёнкасо, Белозерьясо, Орданьбуесэ ды Рузаевкасо.

Покш проектт топавтовить шумбрачинь ванстомань ёнкссонть. Тедеде эйкакшонь од поликлиника панжозь Химмашсо, покштнень туртов поликлиника – «Юбилейный» микрорайонсонть. Панжиковсто ушодозь Республикань эйкакшонь больницянь хирургиянь од корпусонть строямось. Сы иестэ панжови онкодиспансерэнь од поликлиникась.

Республикань Прявтось ледстизе, маласо шкастонть витневи онкодиспансерэнь ташто зданиясь, эйкакшонь поликлиника строяви Рузаевкасо, покштнень туртов поликлиника – Саранскойсэ, стационар ды поликлиника – Краснослободскойсэ ды зярыя лия объектт.

Республикасонть строявить промышленной од предприятият ды цехть. Од производстват нолдазь «Биохимик», «Лидер-Компаунд», «Сарансккабель-Оптика», «ВКМ Сталь» предприятиятнесэ. «Рузхиммаш» заводось одкстомтызе Саранскоень площадканть тевтееманзо. Одс ушодызе важодеманзо Рузаевкань суликань заводось.  

Эрязасто стявтовить велень хозяйствань комплекст. Дубенкань ёнкссо ловсонь комплексэсь карми Россиясо сехте покштнень ютксто вейкекс. Теде башка, Ковылкинань ёнкссо тедеде строявить «Талина» компаниянь ракшань кастомань сеске колмо корпуст. Эрьвасонть кармить кирдевеме 100 тёжат тувот. Одкстомтови Красное Сельцо велесэ ловсонь комплексэсь. Строяви «Рузово» заводонь од корпусось, те лезды колмоксть покшолгавтомс предприятиянь вийтнень. Таштамковсто Кадошкинасо панжови теплицань од комплекс, тосо кармить кастовомо кавксть седе ламо розат.

Владимир Волков тешкстызе, весе неть объекттнэ строязь Россиянь Президентэнть В.В.Путинэнь лезксэнзэ вельде.

– Течи весе вейсэ ёвтатано сюкпря Президентэнтень республикантень мелень явоманть кисэ! – мерсь Владимир Волков.

Покш тевть топавтовить «Безопасные и качественные дороги» нацпроектэнть лувсо. Тедеде витневить 165 вайгельбеть кить, сы иестэ арсеви витнемс седеяк ламо.

Мордовиянь Прявтось тешкстызе, коронавирусонть лангс апак вано, эзь лоткавтово важодемась таркатнень вадрялгавтомаст-мазылгавтомаст коряс. Иенть прядовомс республикасонть арсевить педе-пев витнемс ламо квартирань 720 кудот, вадрялгавтомс-мазылгавтомс кудотнень перька ды общественной 200 ламо таркат. Владимир Волков ёвтнесь, мелят одкстомтозь Атюрьевань, Покш Березникень, Ромодановань ды Инсаронь парктне, Темников ошонь исторической пельксэсь.

Тедеде одкстомтовить Орданьбуень, Отяжбуень, Кочкуровань ды Ковылкинань парктне, вадрялгавтовить Тёжа иень площадесь Рузаевкасо ды прявт площадесь Теньгушевасо. Саранскойсэ топавтови Ленинской райононь парконть витнемань-одкстомтомань проектэсь. Сы иестэ ушодовить тевтне Таня Бибинань куросо парконть теемга ды Саранка лейчиренть мазылгавтомга-одкстомтомга.

Тешкстызе, стакачить улить эрямо таркань стявтомасонть. Тедеде республикасонть эряви строямс эрямо таркань 360 тёжат кавонзазь метрат.

 – Эрязасто нолдама тевс «Жилье и городская среда» нацпроектэнть, семиянь ды велень ипотекатнень, истя жо льготань ипотекань программанть (6,5 % иезэнзэ), конанть яволявтызе Россиянь Президентэсь, – тешкстызе Мордовиянь Прявтось.

Ней эрямо таркань коряс республикань рынкасонть ули мейстэ кочкамс, топавтовить ипотекань эрьва кодат программат. Кавонзазь метранть питнезэ мелень кондямо (малав 42 тёжат целковойть). Топавтовить проектт «Юбилейноень» колмоце ды нилеце микрорайонтнэсэ строямонть коряс, арсеви стявтомс котоце микрорайон. Од кудот стявтовить Лесная, Анна Лусс куротнесэ, «Леруа Мерлен» лавканть, «Макс» микшнемань центранть вакссо, Коммунистической, Полежаевень, Фурмановонь ды Гагаринэнь куротнень ёнкссо.

Владимир Волков кармавтсь: эряви седе эрязасто важодемс ломантнень марто, сундерьковонь 1-це чинтень республикань седе ламо эрицят саест льготань ипотека (6,5 % иезэнзэ).

Кортамось истя жо мольсь велень ипотекадонть. Неень шкантень банктне кемекстасть 400 кредитт, 190-тне – максозь. Мордовиянь Прявтось тешкстызе, неть невтевкстнэ республиканть туртов пек вишкинеть, эдь ломантнестэ 40 проценттнэ эрить ды важодить велетнесэ. Сон кармавтсь эрьва ёнкссонть анокстамс площадкат эрямо таркатнень строямонть туртов, ломантнень улест возможностест стявтомс кудо се велесэнть, косо ули мелест.

Эсь кортамосонзо Владимир Волков тешкстынзе сеть предприятиятнень, конат невтсть покш изнявкст важодемасост. Неть: «ДСК», «Мордовдорстрой» компаниятне, «Саранскстройзаказчик» холдингесь, «Анелия», «Транс-Север», «МАПО-Транс», «Строитель», «ЭкоЛайф», «Ремстрой», «СМУ 27», «Мордовавтодор», «Мостострой»  обществатне ды ламот лият.

– Строямось – те свал икелев молема ды од тёкштнень саема. Мельспаро, республикань строямонь отраслясь эпидемиянть шкастояк нежеди сы шкантень, кеместэ моли икелев. Прявтось ней – а лоткамс изнязенть лангс! – тешкстызе Владимир Волков.

Строительтненень покш чинть кувалма поздоровт истя жо ёвтась МР-нь Правительствань Председателесь Владимир Сушков. Ёвтызе, сынст тевтеемаст сюлмавозь прявт тевтнень топавтоманть марто – Мордовиянь эрицятнень туртов стявтомс вадря ды рамавиця эрямо таркат, теемс социальной ды транспортонь инфраструктура.

МР-нь Правительствань Председателень полавтыцясь – Строительствань, транспортонь ды китнень хозяйствань министрась Виктор Цыганов эсензэ пельде ёвтась сюкпрянь валт республикань строительтненень Мордовиянь социально-экономической виевгавтомантень покш путовксонть кисэ.

Строямонь отраслянь сехте вадря важодицятненень те кенярксчистэнть максозь покш казнеть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».