Неень шкань тейтерь-аватне эрязат ды колт эрьва тевсэ. Сынь кастыть эйкакшт, ветить эсь тевест, кепедить-виевгавтыть минек масторонь экономиканть ды аштить кеме нежекс цёра- ломантнень туртов. Сынь маштыть эрямо истя, штобу кенеремс эрьва ков ды эрьва мейсэ. Истятнэнь юткс апак кавтолдо эряви совавтомс эрзянь тейтеренть Ольга Дорофеевань.
Сон эйкакшткак тонавты, кенярксчитькак арси-ютавты, эсь тиринь велень эрицятнень культурной ды спортивной мероприятиятнесэяк кенярдовты. Зярдо теевинь содавиксэкс те ёроков тейтеренть марто, пек дивинь сонзэ эрязачинтень ды бажамонтень улемс свал тевсэ ды ломань ютксо. Ансяк весемеденть мельга-мельцек.
Ольга чачсь-кассь Отяжелень райононь Селища велесэ. Тесэ ютась мелявкстомо эйкакш пингезэ, прядызе средней школанть ды мейле тусь тонавтнеме Саранскоев. 2008 иестэ тейтересь кармась Н. П. Огарёв лемсэ МГУ-нь филологиянь факультетэнь финнэнь-угрань отделениянь студенткакс. Тонавтнесь венгрань келенть.
Университетэнть прядомадо мейле Ольга ниле ковс якась Венгрияв, ютась тосо стажировка. Теке марто седе парсте кемекстынзе эсь содамочитнень, эдь венгрань келень кандтниця ломантнень ютксо эрязь, те кельсэнть эсь кортамонть ламоксть седе вадрялгавтсак.
Велявтсь тосто эсь тиринь Отяжелев, кармась роботамо культурань ёнкссонть. Тевесь ульнесь а берянь, ансяк вана мельтне свал чарасть школасо важодеманть перька. Ды пельиешкань ютазь ушодсь вешнеме эстензэ робота республикань школатнева. Истямо тарка муевсь Саранскоенть маласо, Зыковань школасонть. Ольга Дорофеева кармась эрзянь ды мокшонь кельтнень тонавтыцякс.
– Тонавтыцянь тевентень кундынь истямо покш мельсэ, эстеньгак эзь кемеве, – корты тейтересь. – Эйкакштнень марто куроксто муинь кель-вал ды эрьва уроконть ютавтынь истя, штобу вечкевель сыненст, занятиятнес якавольть покш мельсэ. Кавто иеть ульнинь тонавтыцякс, мейле аравтымизь завучонь таркантень, ансяк тонавтоманть эзия кадо, истя жо ветинь тиринь келень уроктнень.
Зярыя шкань ютазь Ольгань эрямосо лиссть сехте кенярксов ды учовикс тевтне, сон кармась никс ды мейле – авакс.
Мирдензэ, Александр марто сынст теинзе содавиксэкс тейтерь ялгазо. Кадык эрястькак вейке районсо (Александр – Аловелень), вастовомскак савкшнось, ансяк сестэ вейкень-вейкень, мерят, эзть редя. А вана мейле од ломантнень ютксо сеске кирвазсь вечкемань толнэсь. Шканть стяко эзть карма ёмавтнеме, зярсыя вастневсть ды венчасть-урьвакстсть. Покш свадьба пурнамс мелест арасель, инжетнень ютксо ульнесть ансяк сехте малавикс ломанест.
– Шкань ютазь минек семиянок аламодо кассь – чачсь васенце цёрыньканок. Лем тензэ максынек – Миша. Мон кода-бути уш васенце чистэ саезь содылинь, карми цёранок ды лемдясынек покштям лемсэ, – ёвтни Ольга. – Эрьва тейтерь-аванть туртов эйкакшонь чачтомась – истямо тев, зярдо тон целанек полавтоват. Тон весе шкат алтасак эсь эйкакшонтень, эсь седейпелькскентень. Нама, эсеть лангс шкась а кадовкшныяк. Чавачамонть (зеркало) малава ютамояк пелят, бажат эсь рунгонь полавтовоматнень а неемс. Эдь зярдо роботат, тон свал ломань ютксо, бажат улемс вадрякс, мазыекс. А эйкакш марто аштемстэ теде стувтат. Ды истя эрси малав эрьва од аванть марто. Веенст тень кадыть мельтеме, лият путыть весе вийтнень полавтовоматненень. Мон арсинь-ванынь ды кемекстынь эстень – эрявить полавтомат. Секскак эйкакш марто аштемстэ шканть эзинь ёмавтне – ютынь эрьва кодамо курсат, тонавтнинь, пурнынь превть. Ютко шкасто карминь ветямо кенярксчинь мероприятият.
Сонзэ арась вейкеяк чизэ, штобу аштевель тевтеме. Ольга Дорофеева – Саранск ошонь 29-це № гимназиянь воспитательной тевень коряс прявтонь полавтыця. Эйкакштнень марто важодеманть кадомс мелезэ арась. Те сонзэ эрямонь тевезэ. А вана седеень оймавтомакс лови кенярксчинь мероприятиятнень анокстамонть ды ютавтоманть. Истя, кизэнь перть покш мельсэ кенярдовты эсь Селища велень эрицятнень. Куш кодамо кенярксчинтень арси-аноксты культурной ды спортивной мероприятият.
– Кизна велесэнть пек ламо эйкакшт ды покш ломантькак, веенст каникуласот, лиятне отпускост тиринь ёнкссо ютавтыть. Сынст мелест кепедемга арсянгак эрьва кодат пелькстамотнень. Истя аваненьгак лездан. Сон роботы велень Культурань кудонь прявтокс, – тешксты Ольга.
#свояведущая – истямо лем сон макссь эстензэ. Лемесь те чачсь кода-бути сонсь. Ютавтозь эрьва мероприятиядонть мейле Ольганень сюкпрянь вал марто пшкадильть сонзэ сиведицятне ды весе тешкстыльть: «Сюкпря истямо кенярксчинть кисэ! Тон истя парсте чарькодить минек бажамотнень, мерят, эсенек семиянь. Мартот пек шожда». Кода тешксты тейтересь, истят валтнэ – сехте покш питне теезь тевентень. Сынст марязь, чачи эштёяк покш мель молемс ансяк икелев.
Ды Ольга истя тейськак. Мольсь икелев, арсесь мезе-бути од, варчнесь эсь прянзо. Теке шкасто васенце таркасо свал кирдсь эсь семиянзо. Кадык декретэнь шкастояк ульнесь свал тевсэ, ялатеке эзь менстя цёрыньканзо вейкеяк изнявксонзо – кода теизе васенце эскельксэнзэ, ёвтызе васенце валонзо, тонадсь мезень-бути тееме. Те пек питней.
Шкань ютазь Дорофеевтнень семиянть кенярдовтызе эштё вейке кенярксов куля – сынст карми омбоце цёрынест. Омбоцеде пешксесэ улемась Ольгань туртов ульнесь седе стакакс. 6 ковсо улемстэ сон ормалгадсь ковидсэ. Ормалгадсь стакасто. Лиснесь кавтолдома – кавонест эйстэ конань идема: аванть эли эйкакшонть?
– Те чись монь седейс кадовсь пек пштистэ. Ледстнян, больницясо тейсть тень КТ ды мерсть, келя, тевтне берянть, учотано вандыс. Неть валтнэнь марязь, эстень кемекстынь: «Оля, тон весементь цидярдсак, весе карми вадря! Больницясто туят цёрынькат марто. Эйсэнк пек учить кудосо». Неть валтнэнь ёвтазь, чокшне ёнов ёжом седе вадрялгадсь, невтевкстнэяк полавтовсть паро ёнов. Ды сентябрянь 29-це чистэ минек чачсь Максим цёрыненек. Те кармась Пазонь казнекс, – тешксты Ольга Дорофеева.
Весе стакачитнень изнямосо ды эсь арсематнень топавтомасо Ольга покш сюкпря ёвты эсь малавикстнэнень. Семияст покш, весе эрить ояксчисэ ды вечкемасо.
– Покш сюкпря мирдем туртов. Сон васенце лездыцям, весе бажамон топавтыця. Сюкпря тетятненень-аватненень, патянень ды малавикстнэнень. Авам, Надежда Михайловна ды тетям, Сергей Петрович Калугинтнэ – монь нежем ды кемемам. Сынь свал чарькодить эйсэнь ды лездыть весемесэ. Покш сюкпря бабанень – Мария Ивановна Модинанень. Сонензэ ней уш 86 иеть, ансяк тевтеме а ашти, бажи лездамс. Эйкакштнень марто ашти покш мельсэ. А те седе одтнэненьгак аволь весенень виень коряс. Ды эйкакштнедеяк аволь аламо – вете. Кавтотне монь, эштё колмотне Анна патянь. Весенень савтомс пек стака. Бабам мартост озямо машты. Монь ули, кинь лангс кемемс, ули кинь пельде учомс лезкс. Мон содан, аволь ськамон. А те неень шкане пек эрявикс ды покш тев, – кемексты Ольга.
Юлия Еремина