Пятница, октября 30, 2020
Важное

ЭРЬВА МАСТОРСО ЛЕМЕНЬ МАКСОМАНЬ КОЕСТ ЭСЕСТ. КОНА МАСТОРСОНТЬ ЭЙКАКШТНЕНЕНЬ МАКСНИТЬ КОДАТ ПОНГСЬ ЛЕМТЬ. ЛИЯТНЕСЭ ТЕНЬ МЕЛЬГА ВАНЫ ГОСУДАРСТВАСЬ.

КОДАТ ЛЕМТЬ НЕЙ МАКСНИТЬ РОССИЯСО, СОДАСЫНЕК. МИНЕК МАСТОРСО ЭРЬВА ЛОМАНЕНТЬ ЛЕМЕЗЭ АШТИ КОЛМО ВАЛСТО: ЧАЧОМСТОНЗО МАКСОЗЬ ЛЕМСТЭ, ТЕТЯЛЕМСТЭ ДЫ ФАМИЛИЯСТО. МЕЕЛЬЦЕСЬ МАКСОВИ СЕЕДЬСТЭ ТЕТЯНТЬ ПЕЛЬДЕ, ЛИЯСТО – АВАНТЬ ПЕЛЬДЕ. КОЙ-ЗЯРДО ЭРСИ КАВОНЗАЗЬ. НЕВТЕМГА, МИХАИЛ ЕВГРАФОВИЧ САЛТЫКОВ-ЩЕДРИН. АНСЯК ИСТЯ УЛЬНЕСЬ АВОЛЬ СВАЛ. ВАРШТАТАНО ЮТАЗЬ ШКАНТЕНЬ.

«В КРЕЩЕНИИ ИОСИФ,
А МИРСКИЙ ОСТРОМИР»
Славянтнэнь (сынст ютксо рузтнэнь) кудораськесэ умоктояк умонь шкасто ансяк чачозь эйкакшонтень макснесть лем уликс лия эйкакштнень марто а човорямонзо кис. Лемтнень кочкасть сынсь тетятне-аватне, кинень кодамось седе ладиль ды педиль. Невтемга, кона эйкакшось кинь мельга ды кодамо чистэ чачсь, макснесть тенст истят лемть: Первуша, Вторышка, Третьяк, Девятко, Субботка. Лиятнень лемест сюлмазельть сынст чачост марто (Беляк, Ушак, Худяк, Русинко, Черныш), эли обуцянь башка ёнксост марто (Угрюм, Буян, Смеян, Молчанка, Злобко). Башка таркасо аштить истят лемтне, конатнень вельде авась невтсь эсензэ эйкакшонтень эсь вечкеманть – Богдан, Любава, Любим. Сехте кезэрень лемтнень ютксо ульнесть истяткак, конат саезь ракшатнень пельде (Волк, Медведь, Конь, Орёл, Селезень ды истя седе тов). Истя эйкакшонтень мерсть вишкинестэ. Седе покшсто касозь, сонензэ макснесть куринкань лем, лиякс мерезь, продештя (Гуляйко, Пьянко, Лихачко, Кисляк, Чудинко, Кисель).

Христианстванть самодо мейле кезэрень лемтнень таркас кармасть макснеме лия лемть – церьковань. Те ушодозель 989 иестэ, зярдо Владимир чинязось кармась крестямо киевлянтнэнь. Летописьстэ ловнотано: Днепра леенть чирес панезельть ламо ломанть: башка – цёрат, башка – ават. Сынст явизь зярыянь-зярыянь курова ды кармавтсть совамс ведьс. Озныцятне, чеказь-показь, ведьстэ лисезь ломантненень макснесть лия лемть. Эрьва куронтень вейке-вейкень лем, цёратненень – эсест, аватненень – эсест. Весемеде куроксто славянтнэнь эрямос совасть истят лемтне, кода Иван, Фёдор, апостолтнэнь лемест Пётр, Павел, Андрей, Филипп, Марк. Греческой лемтнень юткс понгсть ламо евреень, римень, сириянь, египетэнь иневанькстнэнь лемест.

Аволь сеске стувтозельть кезэрень рузонь лемтне. Сынь вастневить XI-XIV пингень сёрмадовкстнэсэ: («в крещении Иосиф, а мирский Остромир»). XVII-XVIII пингетнестэ саезь рузонь кезэрень лемтне педе-пев полавтозельть церьковань лемтнесэ. Сынь ялатеке допрок эзть ёма. Сынст юрокс саезельть рузонь фамилиятне: Беляевтне, Глазковтне, Третьяковтне, Орловтне, Рагозинтнэ, Медведевтне ды ламо-ламо лиятне.

Те шкас пазнэнь кемицятне ансяк чачозь эйкакшост туртов макснить лем церьковань ковкерьксэнть коряс, ков совить 330 цёрань ды 64 авань лемть. Теке марто меельце шкастонть ламот од ломантне эсест эйкакшост туртов вешнить истят лемть, конат чуросто вастневить минек эрямосонть. Паряк, текень кувалма кармасть велявтомо истят лемтне, кода Глафира, Василиса, Елисей, Фома.

ПЕКШАЙ, ТУМАЙ,
НУЯТ, ВИРЯЗ…

Теке кинть ланга савсь ютамс Россиянь лия раськетнененьгак, конатнень юткс понгсть эрзятнеяк. Кодат лемть кандтнесть минек покштятне-бабатне седикеле, тень лангс меельце шкастонть кармасть явомо покш мель кода учёнойтне, истя сынсь ломантнеяк. Кармасть вешнеме кезэрень лемтнень ды таргсеме сынст лангс. Истя, христианстванть самодо икеле шкастонть эрзятнень ды мокшотнень ульнесть эсест лемест ды сындест ловозельть тёжадо ламо!
Кезэрень шкатнестэ минек покштятне-бабатне кемсть эсест пазнэнь ды весе сенень, мезесь сюлмазель пертьпельксэнть марто. Секс эсест эйдест туртов сеедьстэ макснесть истят лемть, конатне молить нармунень, чувтонь, тикшень, ракшань лем ёнов (Каргай – «карго», Пичай – «пиче», Пекшай – «пекше», Тумай – «тумо», Ликшаня – «ликша», Люкшава – «тикше»). Лия лемтне невтсть сень лангс, зярдо ды косо чачтозель эйкакшось (Нуят, Нуянза, Нуякша – нуема шкасто, Пивцай – пивцема шкасто, Ледяй – ледема шкасто, Эйзюраль – тунда соламо шкасто ды Паксяй – паксясо, Виряй – вирь маласо). Ламо лемтне чарькодевтить эйкакшонть обуцянь башка ёнксонзо (Кежай – кежей, Паруш – паро, Ордан – ордакшов); невтить тетятнень-аватнень эйкакшонтень вечкемаст ды лембе ёжомарямост (Учай, Учан – «учомс», Вечкуш, Вечкас – «вечкемс» валонть эйстэ). Улить лемть, конатне теевсть чачонь-рунгонь пельксэнь лемтнестэ (Кочкарь – «кочкаря», Кичанза – «кече», Байгуша – «байге).
Седе покшсто касозь, од ломаненть лемезэ поладозель тетянзо лемсэ, кона путневсь васенце таркас, невтемга: Пивцаень Нуянза, Учватонь Паксют, Кежеватонь Сюмерьге, Москаень Овтай, Сыресень Кавтась ды истя седе тов.

Истямо ладсо тевесь, паряк, молевель седе товгак, XVI пингестэ саезь эрзятнень эрямос а карминдерявольть совамо христианствань койтне. Лия лиякстоматнень марто вейсэ кармасть полавтнеме лемтненьгак. Кезэренсетнень таркас кармасть путнеме церьковань лемть. Эряви меремс, эрзятне ды мокшотне кодаяк эзть тонадо сыненст. Од лемтнень полавтсть эсест ладсо. Невтемга, Аксинья – Окся, Арина – Оряй, Авдотья – Олдай, Николай – Миколь, Григорий – Дрига, Иван – Ивок ды истя седе тов.
Курок эрьва ломаненть лемезэ кармась аштеме колмо валсто: эсензэ лемесь, тетянзо лемесь ды фамилиясь. Фамилиятнень юрокс саезельть кезэрень лемтне (Виряс – Вирясов, Сыресь – Сыреськин, Нуят – Нуянзин).
Эрзянь велетнесэ ломантне нейгак вейкест-вейкест седе парсте содыть кудолемтнень коряс. Кевкстемстэ аламо кить ледстясызь фамилиянть. «Косо эри Курай Миколь?» эли «Мисей Наста». Но аволь Пронькин Николай эли Аверкина Анастасия.

КЕЗЭРЕНЬ ЛЕМТНЕНЬ ВЕЛЬМЕВТЕМАТ ОДОВ

2017 иестэ саезь Россиясо нолдазь закон, конань коряс а мереви макснемс лемть, косо улевельть цётат (цифрат), тешкст, сюдома-сёвнома валт ды истя седе тов.
Теке марто арасть кардамот сеть ломантненень, кить арсить полавтомс лемест кезэрень лем лангс. Истят снартомань тейницят улить ды аволь аламо. Весе содасынек од морыцянть Лияна Бакайкинань. «Лияна» – те кезэрень эрзянь лем. Истя лемдизе тейтеренть авазо Людмила Бакайкина, кона пек вечксы эрзянь келенть.

РОМАН ЧЕВТАЕВ –
ЭРЗЯНЬ МЕЛЬСЕДЕЙ

А кода а ледстямс тень кувалма Роман Чевтаевень. Те цёрась чачсь Пермь ошсо, руз ютксо. Покшсто касозь, сайсь мель содамс, косто саевсть сонзэ ундокстнэ. Фамилиянзо коряс (Чевтаев – чевте) муизе: сон – эрзя. Ине покштязо Рязань ошстоль. Тень кувалма сон аволь апаргадсь, мекевлангт, пек кецнесь. Сон икелеяк ялганзо ютксо прянзо марясь аволь истямокс, кодат весе. Кармась тонавтнеме эрзянь келенть. Мейле превезэнзэ сась арсема полавтомс лементькак. Истя тейськак. Роман лементь таркас кочкась эрзянь – Мельседей. Тень кувалма, келя, полавтызе паспортонзояк.

Анокстызе Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».