Чаунзань райононь Мокшалей велень «Тундонь чи» фольклорной ансамблясь пурназель 1976 иестэ. Васенце морыцятнень ютксо ульнесть Лидия Ивановна Сухарникова, Васса Илларионовна Девяткина, Анна Ефимовна Девяткина, Раиса Кузьминична Чарина, Раиса Андреевна Жаркова.
Ней юткстост кадовсь ансяк Лидия Степановна Чарина, конанень 83 иеть. Неть аватне морсесть агитбригадасо. Клубсто ардтнесть паксяв, фермав. Морсесть механизатортнэнь, фермасо важодицятнень икеле. Сынськак важодсть фермасо скалонь потявтыцякс. Кезэрень морост, морамонь койтнень эзизь стувто ды ёмавто. Сынь кадызь мельгаст сыця аватненень. Ансамблясь эри нейгак, ды минь пачколинек тенст инжекс.
– Ней «Тундонь чи» ансамблясонть морсить кавксо ават, – ёвтни Мокшалеень клубонь прявтось ды тесэ морсицясь Галина Самылкина. – Весе сынь од пенсионеркат. Школанть пекстызь – састь клубов, ламот эйстэст тонавтыцякс важодсть. Поладынек морамо сеть кезэрень моротнень, конатнень морсесть сырькайтне, минь мартосткак морсинек, тонавтнинек пельдест. Репертуарсонок улить морот, конатнень морсить ансяк минек велесэ – «Мокшалей велесь», «Адядо, ялгат, минек масторов». Ризнэвти, арась баянистэнек. Ков молемс, косто муемс? Эсенек вийсэ ютавттано кенярксчить. Бажатано вейсэндямс ломантнень, мейсэяк кецявтомс. Саемга, июлень 8-це чистэ Мокшалейсэ ютавтынек «Прякань чи» раськень койтнень райононь фестиваль. Сон эрси эрьва иестэ, кочкави кодамояк веле, тедеде минек кедьсэль. Икеле иетнестэ те фестивалесь мольсь истямо лемтнень ало: «Кашань чи», «Модамарень чи», «Салведень чи», «Пачалксень чи», «Позань чи». Райононь эрьва велесь уски мартонзо ярсамопелень выставкат. Кие мезес машты, мейсэ ансяк а дивавтыть!
Мокшалейсэ вечкить прякань панеме. Эрьва кенярксчинть улить эсензэ пряканзо. Саемга, Инечистэ пантяно лукшепряка. Чапаксонть ичить тантей сдобасто (ловсо, ал, сахар марто). Васня теить прякань алксонть. Лангозонзо каить топо марто човорязь алт, сахар, изюм, конфеткат. Седе тов вельтясызь кадовикс чапакссонть, конань мазылгавтсызь цецинесэ, пангинесэ ды куншкас свал теить крёст. Троицянь прякась – пиже чурька марто алонь. Петровонь чистэ якить калмолангов, те чинтень панекшнить эрьва кодамо ягодань прякат. Спасонь чистэ – умарень. Успениясто – морковонь, пангонь, опёнкань. Сёксня, зярдо уш якшавты, – сывелень прякат, минек мерить – биляшт, панжакайть. Весе неть прякатнеде каванявить кенярксчинь инжетне.
Клубсонть мельспаросо тешкстатано Сыре ломанень чинть, Авань чинть, Телень ильтямот, Мартонь 8-це чинть. Сехте пек ломантне вечксызь Од иень кенярксчинть. Минь мазыйстэ оршнетяно, сёрмадтано сценарий, мезе ансяк а сы превезэнек, секскак лиси мельстуиця кенярксчи. Инжеть сакшныть натой лия велестэяк.
Аватнень улить эрзянь оршамопелест. Зярдо-бути умок максокшнызь райононь Культурань кудосто. Эйсэст морсесть сырькайтне. Сынь пек умонь. Се шкань, зярдо пурнавсь ансамблясь. Кортыть, неть костюмтне – алкуксонь экспонатт. Сынь эйсэст пек ванстыть. Лияназонь, човинеть, келейть, теке кескавт, ды кельгить куш кинень. Оршасызь, перькаст сюлмить икельга пацят. Пряс путомаст стызь ташто фартуксто-икельга пацясто, потмозост путсть картон. Чарькодеви, спонсорост кияк арась. Аватнень покш мелест рамамс од палят.
Мокшалеень клубось покш, стявтозь умок, зярдо-бути зэрнесь веленть келес. Залов совамсто тандавтымизь потолокось. Мезе парось, а чуди, ансяк весе раужкадсь, аволь мазый. Кода-бути ушодокшность латонть витнеме, строительтнень эзь сато материалост. Латонть калавтызь – а тесэ тусть пиземеть. Недлянь перть пизесь. Весе потолокось раужкадсь ды те шкас ашти истямо. Каладсть кузтемапрятнеяк. Сехте покш зыянось уштома таркасонть, косо аштить расширительтне, тосо, секень вант, латось пры лангозот. Пиземень ведесь чуди витьстэ светэнь щитэнть лангс. Эряза аватне мусть материалгак – ташто шиферт, усковтызь. Ансяк кие карми витнеме? Эдь тагояк эрявить ломанть, кить кармавольть теемензэ, ды, нама, сыненст эряви пандомс важодемань кис. Эрявить лазт. Ярмакост, чарькодеви, арасть. Мокшалейсэ ней эрить ансяк 165 ломанть. Косто учомс лезкс? Вейке кецявты – вишка велинесэнть вишка толнэкс типельди культурань эрямось.
Истя уш лиссь, «Тундонь чи» ансамблясо морсиця аватне – весе Мокшалеень урьват. Сынь чачсть лия велесэ, лия районсо, тей лиссть мирденень. Икеле кода ульнесь? Тонавтнеманть прядомадо мейле кучтадызь ковгак роботамо, сат учителекс – лисят мирденень шофёрнэнь эли трактористнэнь. Истя тей понгсть аватнеяк. Неть: Надежда Васильевна Явкина, Нина Андреевна Явкина, Лидия Петровна Нуштайкина, Зинаида Ефимовна Болотина, Татьяна Николаевна Дораева, Надежда Васильевна Кимеева, Ирина Ивановна Письмаркина (сон художественной руководитель) ды Галина Николаевна Самылкина.
Надежда Васильевна Явкина чачсь Покш Маризь велесэ 1960 иестэ. Школанть прядомадо мейле тонавтнесь Н. П. Огарёв лемсэ МГУ-нь филологиянь факультетсэ. Седе тов кучизь роботамо Покш Игнатовань райононь Ташто Селищань школав эрзянь ды рузонь келень тонавтыцякс. Лиссь мирденень. Ды аволь кувать савсь вейсэ эрямс, од тейтерь-авась ульнесь пешксесэ, кода мирдезэ чавовсь. Чачсь цёрынест. Надежда вете иеть эрясь атявтонзо-ававтонзо марто, мейле сась эсензэ велев. Покш Маризь велесэ робота тензэ арасель. Мокшалейсэ эрясь сазорозо, кона тердизе эстензэ, тесэ лиссь тарка эйдень кужосо. Кавто иеть сон эйдензэ марто эрясь сазоронзо семиясо, косо ульнесть кавто эйкакшт. Седе тов Надежда Васильевна омбоцеде лиссь мирденень, стявтсть кудо, чачсь омбоце цёразо. Авась кармась важодеме школасо. Истя ютасть 28 иеть. Велесь састыне чамсь. 2010 иестэ школанть пекстызь. Зярс ульнесть эйкакшт, эйсэст усксесть Покш Маризь велев. Ней тонавтницят арасть.
– Мон эрян школанть каршо. Вальмава сон парсте неяви, натой классомгак неявсь. Пек апароль школанть пекстамсто. Эйкакштнеде аламо ульнесть, ве классо вейке-кавто тонавтницят. Авардинекак, ансяк мезеяк а теят. Школась кавто этажсоль, покшоль, вадряль. Ней уш малав кавто иеть, кода сонзэ калавтызь… Пек пароль школань прявтоськак. Кодат ансяк панжадо урокт ды покш чить эзинек ютавтне, натой республикань тонавтомань кенярксчить, – ледстни Надежда Васильевна.
Ней эрямосонзо сехте пек кецявтыть нуцьканзо. Сындест вете: ниле цёрынеть ды аволь умок чачсь тейтернеяк.
Ансамблясонть ули эштё вейке Надежда Васильевна – Кимеева. Сон тей понгсь седеяк ве ёндо. Авась чачсь Ковылкинань районсо. Тонавтнесь Н. П. Огарёв лемсэ МГУ-нь электронной техникань факультетсэ. Колмоце курссо лиссь мирденень военноень экшс. Тусть эрямо Ленинградов. Седе тов кучизь Астраханской областень Ашулук раськеютконь полигонов. Надеждаяк ульнесь военнослужащеекс, прядызе службанзо старшей прапорщикень лемсэ. 2002 иестэ велявтсть Мордовияв. Цёрасткак тусь тетяст-аваст киява, кармась военноекс, тейтерест – врач.
Кимеевтне кода-бути весть сакшность Мокшалеев инжекс. Тесэ эри Надежда Васильевнань пек паро ялгазо, конань марто кирдить ялгаксчи студентэнь шкатнестэ саезь. Пек тусь мелезэст те велесь, аволь покш, сэтьме, весе чувто потсо, ашти, мерят, теке ваканнэсэ. Энялдсть муемс тенст кудыне. Истя, ялгазо Вера Ивановна Девяткина лездась муемс паро кудо. Кимеевтне стявтсть баня, мацт, кармасть озавтнеме пире, путсть кавто теплицат. Пек кецнить велесэ эрямонтень. Велень аватне тердизь Надежда Васильевнань морсеме, ды сон уш кавксоце ие якси «Тундонь чи» ансамбляв. Сонсь рузава, ансяк лия кельсэ морамось эзизе тандавто. «Ломантне тесэ чевте седейть, паронь арсицят. Пек вечкеви тенек тесэ», – ёвтни Надежда Васильевна.
Эрьва велесь мейсэ-бути явови лия велетнень эйстэ. Вана Мокшалееськак, тей совамсто сельмес каявить пижелдыця ламо чувтотне. Теде башка, тесэ ули кевейкее лисьмапря! Эрьвасонть чави симемс маштовиця ведь ды – мазый лемезэ. Ведесь весе лисьмапрятнесэ тантей, чевте, симемскак паро, муськемскак. Ёвтасынек лемест: Ранги лисьма – васов маряви чудемазо; Тейтерь лисьма – тозонь буто ваякшнось тейтерь; Арапка лисьма – сюпав ломанень лемсэ; Куда лисьма – свадьбань кудатнень коряс; Кузниця лисьма – вакссонзо кузниця ульнесь; Желобка лисьма; Кельме лисьма (сехте кельме ведезэ); Сидёр лисьма; Парня лисьма; Устя лисьма; веле куншкасо ашти Лисьмапря лисьмась, тозонь тейсть водопровод. Лисьматне аштить веле потсо ды паксява. Аватне кортыть, ведесь эйсэст мекс тантей? Кевтнеде. Сынь эрить кев лангсо. Зярдо 2010 иестэ пек коськель кизэсь, тердтнесть Баеньбуестэ лисьмань чувицят. Цёратне чувсть-чувсть, комсь кольцят нолдасть – аволь мода – ансяк кевть. Пек стакаль. «Содавлинекак, тесэ кевть, а савлинек чувомо», – мерсть сынь.
Мокшалеень эрицятне пек вечксызь велест. Тесэ улить клуб, почта, вейке лавка, медпунктов кой-зярдо сакшныть врачт. Маласо аштиця вирьсэнть касыть эрьва кодат пангот, ламо ягодат.
Те велесэнть чачсть контр-адмиралось Д. Т. Севастьянов, содавикс учёноесь, кельсодыесь Д. В. Цыганкин, литературоведэсь Е. И. Чернов.
Татьяна Маторкина