Ютазь оймсема читнестэ «Шумбрат, Мордовия!» фестивальсэнть концерт невтсть Зубова-Полянань, Торбеевань, Инсаронь ды Ицялбуень ёнкстнэ. Тешкстасынек, «Шумбрат, Мордовия!» раськень творчествань фестивалесь-конкурсось ютавтови РФ-нь Культурань министерстванть лезксэнзэ вельде «Культура» Национальной проектэнть лувсо.

Теевсь паро коекс неть концерттнэнь пингстэ седямс ды морамс республикань культурань кудонь фойесэ. Гармониятне жойнить, вайгельтне зэрнить, пильгетне киштить!

Зубова-Полянань районсто мельспароль неемс «Добры молодцы», «Поляне» ансамблятнень. Эрьва ие сынь арсить од номерт, кочкить седейстокиця морот. Весенень мельс тусь «Сявомань шись» невтемась, сонзэ анокстызь те ёнксонь фольклорной коллективтне. Ваныцятне содавтовсть урьвакстомань-мирденень лисемань мокшонь коенть марто.

Ицялбуень артисттнэ невтсть мазый ды мельстуиця концерт. Сцена лангс лиснесть «Вастома» эрзянь моронь ансамблясь, «Килейне», «Эрзяночка» фольклорной коллективтне. Истя жо «Вармине» образцовой киштемань коллективесь, конань вети МР-нь культурань заслуженной роботникесь Анатолий Занкин.

Те районось анокстась рузонь народной аволь аламо киштемат ды морот. Неинек «Русская песня», «Сударушка», «Здравица» ды лия коллективтнень.

Ней сыця оймсема читнестэ концерт невтить Покш Игнатбуень, Ковылкинань ды Саранск ошонь округонь артисттнэ. Ледстясынек, Гала-концертэсь карми декабрянь 15-це чистэ ды невтеви кавксть.