Ташто Чамза веледенть сёрмадомань шкасто тенек сась вейке пек паро куля: республикань Велень хозяйствань ды перерабатывающей промышленностень роботникень чистэнть покш казнесэ тешкстазель Покш Игнатбуень «8 Марта» ООО-сь ды сонзэ прявтось Николай Иванович Куманёв. Велень хозяйствась кармась республикань трудонь соперничествань изницякс растениеводствань отраслясо. Тосонь роботниктне тедеде пурнасть 95 тёжат тоннат ламбамо якстерькай! Сюро пивсэсть 19,4 тёжат тоннат, гектарсто сайсть 40,9 центнерт, нолдазь продукция 3 миллионт 384 тёжат целковойс!

Республикань Культурань кудонь сценанть лангсо Н.И.Куманёвнень покш казненть максызе МР-нь Государственной Собраниянь Председателесь В.В.Чибиркин.
Покш Игнатовань райононть туртов кенярксчистэнть те ульнесь аволь вейкине казне. Районось кармась изницякс 3-це зонасонть «Район эффективного ведения сельскохозяйственного производства» номинациясонть. Сюродонть Покш Игнатбуесэ пурнасть 40,6 тёжат тоннат, вейке гектарсто сайсть 27,8 центнерт. Ламбамо якстерькайденть пурнасть 432 центнерт гектарсто! Скалтнэнь ды вазтнэнь туртов анокстазь 37,2 центнерт кормовой единицат эрьва кодамо кором. Покш казненть райононь прявтонтень Т.Н.Полозованень максызе Мордовиянь Прявтось В.Д.Волков. Татьяна Николаевна ламо иень перть важодеманзо ды местной самоуправлениянть виевгавтоманзо кисэ истя жо казезель муниципальной образованиятнень Весероссиянь Конгрессэнь «За заслуги в развитии местного самоуправления в Российской Федерации» почетонь знаксо, конань максызе РФ-нь Федеральной Собраниянь Государственной Думань депутатось В.Б.Кидяев.
Марина Девятова.