Четверг, июня 20, 2024
Важное

«Сабанчеевское» ООО-нь паксятнесэ, кода республикань ламо лия хозяйстватнесэяк, молить сехте пси шкатне – сюронь нуемась. Зярс ушось маней, эряви кенеремс пивсэмс паксятнень. Минь пачколинек Отяжбуев ды вастневинек тесэнь механизатортнэнь марто, конат валскестэ саезь чокшнес нуить комбайнатнесэ, покш машинатне усксить сюротнень тинге лангов. Весе тевтне хозяйствань прявтонть Дмитрий Николаевич Игушкинэнь пшти вановт ало.



– Тедеде сюронь нуеме лисинек июлень 23-це чистэ, – ёвтни «Сабанчеевское» ООО-нь растениеводствань коряс прявтонь полавтыцясь Вера Кочурина. – Васня ушодынек Дюрькинань паксятнестэ, седе тов ютынек Аловелев. Озимой товзюрось вадря – вейке гектарсто лиси 45-46 центнерт. Улить истят таркат, косо урожаесь пачколи 50 центнерс ды седе ламос. Озимойть видинек 2 тёжат гектарт, яровойть – 4 тёжат гектарт. Сюротне парт, меляткак истят ульнесть. Летькечись 16–18%. Кой-конанть усктано костямо. Видьмексэкс саинек 500 тоннат сюро, озимойтнес весемезэ кадтано 700 тоннат.

– Вера Сергеевна, мезе эштё видиде тунда?

– 1325 гектарт яровой товзюро, 2900 гектарт шуж, 100 гектарт кснав, 300 гектарт рапс, 200 гектарт сюрокс кукуруза, 700 гектарт силосокс кукуруза, 2 тёжат гектарт ламбамо якстерькай. Озимойтнень лангс ванозь, эзинек учнеяк истят вадря невтевкст. Сёксня пек коське ульнесь, видинек пуль потс. Теленть лангскак эзинек кеме, ульнесть лавшо таркат. Но тундось сась ранаяк, модасонть ульнесь сатышка летьке, шкастонзо ютасть пиземеть, весе те пек лездась, сюрось чачсь паро. Ней аволь ансяк пивсэтяно, анокстатано паксятнень озимойтнень видемс. Моли кавшакавтома-дискования. Озимой товзюродо мейле паро ули те таркантень видемс ламбамо якстерькай. Сон парсте карми касомо.

– Ламо техника ней важоди сюротнень нуемасо?

– Малав комсь единицат. Сюротнень нуить кемгавтово комбайнат, эйсэст вейкень-вейкень, косо кавтонь-кавтонь комбайнёрт. Прицеп марто КамАЗтнэ усксить сюротнень, те эсенек транспортось, ды эштё сиведезь ули. Сюронть ускить Сабанцелень ды Дюрькинань тингелангтнес. Бути товзюрось коське – сестэ утомс, летькенть – костямо. Чизэнзэ пивсэтяно малав тёжа тоннат сюро. Таго ёвтаса, кой-кона таркатнесэ сюрось пек виев. Эдь сёксня ды тунда каинек эрявикс удобреният. Тунда, касома шкастост, валнотано гербицидсэ, илязо касо зыянов тикше, илязт педя унжат ды ормат. Васенце таркасо ашти ломантнень важодемась. Кодамо покш мель ломанесь яви тевентень – истят учок невтевксткак. Сюкпря ёвтавлинь тесэнь роботыцятненень. Ламо иень перть некеть, а тукшныть ковгак ве ёнга. Эсь тевест содасызь парсте. Неть: А. Ю. Аньчков, Н. Д. Кажаев, А. С. Туров, В. М. Пшеничников ды ламо лиятне.

Паксятнесэ нуить «Акрос-530», «Акрос-585», «Дон», «Ростсельмаш» комбайнатне. Маныть ды мелят рамазельть «Полесье» од комбайнат. Одтнэ, нама, а путовить таштотнень ваксс, сынь пек виевть. Вансынек, кодамо карми пертьпельксэсь, бути а улить пиземеть, нуемась поладови комсьветее чить.

Чарькодеви, комбайнёртнэнь ней тунь арась шкаст мартонок кортнемс. Ансяк кода а ледстямс лемест, кода а ёвтнемс прявт геройтнеде?
Владимир Кокуркин школанть прядомадо мейле тонавтнесь Отяжбуень аграрной техникумсо. Мейле служась армиясо. Седе тов мольсь тонавтнеме Н. П. Огарёв лемсэ МГУ-нь Аграрной институтов, ней тонавтни заочна нилеце курссо. Уш армиядо икеле озась комбайнань руль экшс. Мелезэнзэ пек тусь. Роботась «АГРО-Атяшевасо» колмо кизэть. Васенце ие, кода сон «Сабанчеевское» ООО-со. Нуи «Ростсельмаш» комбайнасо. Сон эсенек, Россиянь. Потмозонзо кельги 8 тоннат сюро. Ансяк карми пештяво бункерэсь – сеске ваксозонзо арды ды лотки КамАЗось, конань кузовонтень чамдови сюрось.
Комбайнасо сонензэ лездамо кармась тетязояк, Александр Николаевич. Тетят-цёрат Аловелень. А. Н. Кокуркин тонавтнесь Отяжбуень СПТУ-со, Краснослободскойсэ – техникекс-механикекс. Ламо иеть роботы трактористэкс. Сёксня ды тунда соки весе модатнень, конат совить «Сабанчеевское» ООО-нтень, неть – Аловелень, Дюрькинань, Сабанцелень, Таразбуень паксятне.

А вана Иван Сергеевич Кочурин комбайнасо пивсы кемготово иеть. Чачсь сон Капазэлесэ. Школанть прядомадо мейле сайсь мель тонавтнемс Кемлянь техникумсо. Важодеме кармась эсензэ велесэ механикекс. Кизна, нама, озыльть комбайнас. Ледстни, кода васня кармась нуеме «Нивасо», варчнесь «Акроссо», ней нуи «Донсо». Корты, тедеде сюротне парт, коськеть. Бути ушось карми пиземевтеме, нуеманть прядсызь шкастонзо.

Алексей Аньчков нилеце ие важоди «Сабанчеевское» ООО-со механизаторокс. Тельня роботы тракторсо. Кизна ойсекшни кормоуборочной комбайнас, седе тов – сюронь нуемань. Васенце тонавтыцякс тензэ кармась тетязо – Юрий Анатольевич Аньчков, сон роботы Отяжбуень аграрной техникумсо механизациянь коряс тонавтыцякс, автоинструкторокс. Сонсь Алексей васня тонавтнесь Отяжелесэ программистэкс, мейле – Н. П. Огарёв лемсэ МГУ-нь светотехнической факультетсэ, мелят заочна прядызе МГУ-нть, максовсь тензэ механизаторонь специальность. Валонзо коряс, программистэнь содамочитне лездыть чарькодемс од техниканть. Сонзэ комбайназо покш, од, эйсэнзэ ламо эрьва кодат неень шкань механизмат. Потсонть аволь пси, ули музыкаяк, ансяк шка арась сонзэ кунсоломс.

Зярс ульнинек комбайнёртнэнь вакссо, сась чикуншкась, усксть обед. Цёратне куроксто ярсасть ды эрязкадозь кузнесть комбайнатнес. Окойники, Аловеле вакссо Маське пандонь паксясь нуевсь-изнявсь...

Татьяна Маторкина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».