Татьяна Фёдорова чачсь Орданьбуень райононь Лувне эрзянь велесэ. Тесэ прядызе школанть ды мольсь тонавтнеме М.Е.Евсевьев лемсэ педагогической институтов, кочкизе начальной классонь тонавтыцянь специальностенть. Тейтересь свал бажась улемс тонавтыцякс, свал ульнесь покш мелезэ роботамс эйкакш марто. Шкась мольсь, студентэкс улема иетне ливтязь ливтясть. Прядовсь тонавтнемась, сась шка кундамс тевс. Ансяк вана Татьяна мольсь аволь школав, ушодсь эйдень кужосто.

– Мон карминь роботамо воспитателекс эйдень кужосо, – ёвтни Татьяна Фёдорова. – Те тевсэнть котьминь вете иеть. Тонавтынь вишкинетнень ды сынст марто тонавтнинь монськак.
Мейле эрямосонть лиссть полавтомат. Татьяна кадызе эйдень кужосо важодеманть, ушодсь вешнеме эстензэ лия вечкевикс тев. 2012 иестэ понгсь «Тепличное» АО-в ды кармась эмежень кастыцякс.
Татьяна Фёдорова роботы 2-це цехсэнть, помидоронь кастома теплицатнесэ.
– Минек теплицатнесэ кастовить помидорт. Тесэ важодицятнень тевест – неть эмежтнень мельга якамось, кенерезь помидортнэнь пурнамось. Эрьва чистэ кавонзазь метрастонть пурнатано 88,3 килограммат помидорт, – ёвтни Татьяна Фёдорова.
Стакаяк, эрявикскак эмежень кастыцятнень роботась. Ансяк Татьяна Фёдорова а лови сонзэ ине тевекс. Сон тешксты: эрьва профессиясь свалшкане эрявикс, эрьва ломанесь эсь тевсэнть канды покш лезэ масторонть туртов.

Юлия ЕРЕМИНА
Фототне: Эдуард Ретунский