Среда, июня 03, 2020
Важное


Эрзянь сермадыцясь, журналистэсь, "Чилисема" эйкакшонь журналонь важодицясь Татьяна Швецова (Мокшанова) те шканть семиянзо марто истя жо ютавты кудосо.


– Важодеманть ютавтынек дистанционной лувонтень ды ней весементь тейтяно кудосо. Паро, минек роботась истямо, кудосояк тевенть ладямс а стака, – корты Татьяна. – Эйкакштнень марто теинек весе кудоютконь тевенек. Сень лангс апак вано, што аштетяно кудосо, тонавтнемась ашти васень таркасо. Эйкакшон кавонест школасо тонавтницят, секскак эрьва чистэ мартост ловнотано, решатано задачат. Сынст тонавтнемась истя жо ветяви дистанционной лувсонть – Интернет вельде.

Теке марто, Татьяна тешксты, весе тевтнень лангс апак вано, ютко шкадонтькак сатышка. Ды те шканть тейтересь ютавты эсь седеенть ды потмо ёжонть кенярдовтомга - викшни.

– Меельце зярыя иетнень перть викшнемантень яван башка мель. Тевесь тень пек вечкеви. Ансяк вана ютко шкась викшнеманть а сатни. Ды ней, зярдо шкась прась, куроксто кундынь тевс. Ней викшнян эрзянь покай. Артонть (узоронть) арсян монсь, викшнян сурень ловозь, лиси весе валанясто, видестэ. Покаенть викшнян уш вете иеть, тевесь а шожда, ды шкаськак а сатни, – тешксты Татьяна.

Эряви меремс, тейтересь викшнесь икелеяк. Сестэ озясь крестиксэ викшнезь картинатнень марто. Седе икеле кодась оршамопельть. Татьянань ули ерокчизэ викшнемань-кодамонь тевсэнть, ды те тензэ вечкеви.

– Викшнезь картинкатнень эйстэ эстень вейкеяк эзь кадово – весе явшинь-казнинь ялгатненень, малавикстнэнень. Кодазь оршамопельтнедеяк казинь ламо. Кадык якить эйсэст. Те монь тевентень максы питне, а стяко шкам ютавтозь, – корты тейтересь.
Меельце кавто недлятнень перть сатышка шка кадновкшны кудоютконь тевтнескак. Татьяна цюлансто таргизе кшинь панема каштомнензэ ды кенярдовты малавикстнэнь эсь паневть кшисэ. Лавкавгак лиснемс а эряви ды эсеть паневть кшись ков седе тантейгак.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».