Понедельник, октября 18, 2021
Важное

Ков седе ламо эрят, тов седеяк пек кармат чарькодеме, кодамо нурькине минек эрямось. А кенерят кеняркшнеме од порантень, вант, уш авакс тееват. Юты таго зярыя шка – сырькаекс велявтат. Эрьва ломанесь иестэ иес аволь одкстоми, сон сыреди. Ды тень эйстэ кияк а оргодеви ды а мени.

Секс а мезекс янксемс ды ризнэмс ютазь иетнень кувалма. Тень таркас седе паро ули ледстямс, мезе ульнесь эрямосонк истямо, мезенть кувалма нейгак а визькс аштемс мельспаросо.

Юлия Сергеевна Цыпинанень, киде арсетяно ёвтнемс седе тов, ули мезде ледстнемс ютазь шкань эрямостонзо. Сон чачсь-кассь Кочкурбуень (ней Октябрьской район) Пакся Тавла велесэ. Тетязо, Сергей Андреевич, ютызе войнанть, нилексть ранязель. Велявтсь тосто, ансяк эрямо кенерсь аволь кувать, чавовсь. Аванзо Фёкла Михайловнань сявдикс лангс кадовсть кавксо эйкакшт. Валт а муят ёвтамс, зяро стакачить ды майсемат савсь печтямс аванстэнь. Дивамос прат, кода сон цидярдсь, кода эзть новоле кедензэ ды эзь казякадо седеезэ сынст трямсто ды пильге лангс стявтомсто? Ней, ванат-теят, вейкине эйденть мартояк од аватне а содыть, мезе теемс. А вана сестэ кавксо ды седеяк ламо эйкакшт трильть-кастыльть ды мезеяк! Истят, нать, нардевть ды весемень цидярдыцят ульнесть минек аватне седикеле. Юлия Сергеевна те шкас ансяк лембе валсо ледстни эсензэ авадонзо. «Авам монь пек превеель, эрямонь чарькодицяль. Ламо савсь цидярдомс тензэ. Тень лангс апак вано, весе минек кастымизь шумбрасто ды ильтимизь покш эрямов», – мартонзо кортнемстэ ёвтнесь Юлия Сергеевна ды видькстась: «Вийть аванень макснесть эрзянь моротне. Сон сындест содась пек ламо. Монгак кой-конатнень тонавтнинь пельдензэ ды сеедьстэ, сехте пек сестэ, зярдо стака тень, морсян эйсэст».

Моронтень вечкемась кармавтызе кундамс морыцянь куронь пурнамо. Сонензэ лездыцякс ульнесь патязо – артисткась, театрань режиссёрось Елена Сергеевна Грачёва. Истя (1990-це иетнестэ саезь) чачсь «Норовава» ансамблясь, кона мейле ламо таркава яксесь, пачколесь натой Финляндияв.
Кавонест патят-сазорт сестэ пек мелявтсть эсь раськенть сы шкань уцясканзо кис ды весе виест, шумбрачист макссть сонзэ лезэс. Ды тень тейсть эрьвась эсензэ таркасо. Елена Сергеевна, кода актриса, режиссёр, кода театральной педагог. Юлия Сергеевна эсензэ лангс сайсь седеяк покш канст. Сон зярыя иеть ульнесь эрзянь, мокшонь раськетнень регионъютконь вейсэндявксонь советэнь ответственной секретарекс. Те тевесь лангозонзо путозель эрзянь-мокшонь васенце Инекужосонть, кона ульнесь 1992 иестэ. Седе тов те таркантень сон кочкавкшнось таго нилексть. Меельцеде – нилеце Инекужосонть, кона ульнесь 2004 иестэ. Лисни, эрзянь, мокшонь культурань вельмевтема тевентень, седе икелень иетнень ловозь, сон макссь комсте ламо иеть.

Те шканть перть Юлия Сергеевнанень ламо мезень пачк савсь ютамс. Сонзэ лангсо ульнесть тевтне, конат сюлмавозельть весе промкстнэнь, кодат ютавтнесь се шкасто исполкомось, вастовоматнень, эрьва кодат покш читнень анокстамост ды ютавтомаст марто. Весе неть промкстнэде, вастовоматнеде знярольть, ней а лововить. А зяро вийть савсь максомс ниле Инекужотнень анокстамсто ды ютавтомсто! Сынст туртов эрявсь анокстамс программат, сценарийть, протоколт ды лия конёвт-документт. Весе тень тейсь Юлия Сергеевна. Теде башка, эрявсь вастомс ве ёндо сазь инжетнень. Нупалесь, косо озадоль сон сеть иетнестэ (те – Советэнь кудосоль), зярдояк эзь эрсе чаво. Сыльть эрьва косто ды эрьва кодамо кевкстема марто. Юлия Сергеевна кенериль эрьванть вастомс, эрьванть марто кортнемс ды ков сатыльть виензэ лездамс. Теке марто лия тевтнедеяк эрявсь а стувтнемс. Ламо мезенть савсь теемс кудосо. Секс Юлия Сергеевнань, ловт, овсе арасель юткошказо, стувтокшнызе, зярдо тукшнось оймсеме.

Тень лангс апак вано, муевкшнесть ломанть, кить сялдсть, видьстэ сельмс чумондсть эйсэнзэ: келя, исполкомось мезеяк а теи, сыненст стяконь кис пандыть ярмакт. Аволь истя апаро Юлия Сергеевнанень улевель марямс неть валтнэнь, пандындерявольть тензэ покш ярмакт. Сындест жо пандсть трёшникть ды сеяк пельиес весть.
Нама, шкань ютазь ламо мезесь стувтови. Неень шкасто исполкомс кочказь ломантнеяк чуросто-зярдо ледстнить сонзэ лементь, зярдо кортамось тукшны покш тевтнеде, конатнень ушодыцякс ульнесь Юлия Сергеевна Цыпина. Саемс, «Равось – ояксчинь лей» экспедициянть, кона тедеде ютавтозель комсецеде. Ледстясынек, истямо мель-арсема васенцекс сась Юлия Сергеевнанень ды П.Ф. Чатуровнень – Саратовасто «САФУН» вейсэндявксонь се шкань прявтонтень.
А кода а ледстямс лия ушодкстнэньгак, конатнень сыргавтыцякс ульнесь Юлия Сергеевна. Те сонзэ мелензэ-арсеманзо коряс 1996 иесь яволявтозель Финнэнь-угрань раськетнень культурань иекс. Арсян, ламот нейгак эзизь стувто, зяро вастовомат ютавтозельть се иестэнть. Икеле истят вастовомат арасельть. Ломантненень се шкасто а косто ульнесь седе ламо ды келейстэ содамс миненек малавикс раськетнень культурадост, эрямонь койдест-кирдадост. Секс ламотнень туртов те ульнесь ванькс коштокс, конанть эйсэ лексезь, марясак прят седе шумбракс ды виевекс.

Те малавгак аволь весе, мезе кенерсь тееме Юлия Сергеевна исполкомонь ответственной секретарекс улемстэ. Сындест пек седе ламольть. Эсензэ весемеде покш изнявксокс авась ялатеке лови сень, кодамо паро ломанекс кастынзе кавто цёранзо. Васенцесь, Сергей, соды зярыя кельть, тень ютксо – эрзянсентькак. Олег, се профессияяк эстензэ кочкась истямо, кона сюлмавозь эсенек культуранть марто. Весть Юлия Сергеевна истя видькстаськак: «Арсян, эсень раськень туртов сехте покш путовксом – те эсень цёрам».
Содан, Юлия Сергеевна а машты кежень кирдеме, натой сетнень каршояк, кить секе-тев ды эрьва кода «ськирясть» эйсэнзэ. Кодамо сон обуцянь коряс, кортыть вана неть валтнэ:

Эзинь невте эсь прям
содыцякс,
Эзинь пракшно ломань
икельга,
Ульнинь, койсэнь,
седеймарицякс,
Свал мелень ванозь молинь
мельга.

Сынь саезь вейке валморосто, конанть сёрмадызе сонсь Юлия Сергеевна. Истя сон сёрмадсь эсь прядонзо. Ды те авась алкукс истямо. Верьга вайгельть эзь пижне, мештес эзь чаво, покш лем мельга эзь пане. Юлия Сергеевна ульнесь ды кадови ломанень вечкицякс, паронь арсицякс, эсь раськентень лезэнь кандыцякс.

Раиса Щанкина

Аволь умок, медьковонь (июлень) 7-це чистэ, Юлия Сергеевна Цыпина тешкстызе чачома чинзэ. «Эрзянь правдасо» важодицятне ёвтыть тензэ седейстэ молиця лембе валт, арсить кеме шумбрачи, валдо превть, шожда мельть, кувака эрямо.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».