«Депутатонь чи» проектэнть лувсо течи минек редакциянь инженек – Мордовия Республикань Государственной Собраниянь депутатось, Покш Игнатовань райононь крестьянонь-фермерэнь хозяйствань прявтось Владимир Юрьевич Кабаев. Эсь роботасонть сон аволь ансяк вансты-вельмевти тиринь Вармазейка веленть, истя жо максы важодема таркат райононь лия велетнень эрицятнененьгак.
Весемесь ушодовсь 2004 иестэ. Владимир Кабаев Н. П. Огарёв лемсэ МГУ-нь Аграрной институтонть прядомадо мейле варчинзе виензэ ветеринарной врачонь ды зоотехникень тевсэнть, важодсь зярыя предприятиятнесэ ды райононь велень хозяйствань управлениясо. Роботась тензэ вечкевсь ды зярыя иетнень перть топавтсь сонзэ покш мельсэ. Ансяк вана Владимирэнь ульнесь вейке покш мелезэ-бажамозо – ушодомс эсензэ тев. Эдь эштё овсе вишкине цёрынькакс сон свал чийниль фермав ваномо, кода аватне потявтыть скалтнэнь, бажиль тенст лездамс. Ды те меленть-бажамонть, ракшатненень вечкеманть сон кирдсь ламо иетнень перть. Секскак специальностентень тонавтнемадо ды эрявикс содамочитнень пурнамодо мейле арсезевсь панжомс эсь хозяйства ды целанек алтызе эсь прянзо вечкевикс тевентень.
– Ламот сестэ эйсэнь кевкстнесть, мезекс те монень эряви, – ледстни Владимир, – мерилинь свал истя: мон чачинь велесэ ды пек покш мелем, штобу тиринь ёнксом эряволь.
Владимирэнь тетязо, Юрий Алексеевич, васняяк мольсь каршо цёранзо арсеманть коряс. Сон пек парсте содыль весе неть тевтнеде. Нинзэ Надежда Андреевна марто весе эрямост алтызь колхозсо важодемантень ды фермерэнь тевентень. Ансяк цёраст эзь кунсоло ды кеместэ ютась эсь тешкставт целентень. Ды, эряви меремс, эсь меленть сон топавтызе.
Эсь хозяйстванть Владимир Кабаев ушодызе весемезэ кемень скалсто ды 50 гектаронь покшолмасо модастонть. Аламонь-аламонь стаданть кастызе комсь скалс. Маризе эсь прянзо азорокс, весемесь моли парсте, мельс тусь. 2007 иестэ цёрась кортнесь тетянзо марто, ды сынь сайсть кредит. Неть ярмактнень лангс «Развитие семейных животноводческих ферм на базе крестьянских (фермерских) хозяйств» программанть лувсо стявтызь сядо скалс эсь васенце фермаст. Теде мейле ушодовсь эштёяк седе виев робота.
Неень шкане В. Ю. Кабаевень хозяйствасонть лововить 1200 ламо сюракшов ракшат, конатнень эйстэ 552 – потявтовиця скалт. Кавксть кассть ловсонь саеманть коряс невтевкстнэяк. Бути 2008 иестэ эрьва скалсто иезэнзэ потявтовиль 3652кг ловсо, 2022 иестэ – 7750 кг. Ней эрьва чистэ хозяйствасонть потявтыть 14 тоннат ловсо.
Зярыяксть седе ламолгадсть модатнеяк. Течинь чинтень модауматнеде 2500 гектарт. Сынст вадрялгавтоманть коряс ветяви покш робота. Ламо иетнень перть неть модатне вадрясто эзть соксеве-изаво, эзть видневе. Секскак ней, од технологиятнень тевс нолдазь, тееви весемесь сюронь норовонть кастомга. Тень туртов хозяйствасонть свалшкане вадрялгавтови материально-технической базась ды теевить вадря условият важодеманть туртов. Истя, 2019–2023 иетнень перть рамазь сюронь нуеманть туртов кавто од комбайнат, тикшетнень ледиця комбайна, К-744 кавто тракторт, МТЗ-82.1 кавто тракторт, вете автомашинат, видемань колмо агрегатт, изамот, культиваторт, сокат, пресс-подборщик, андомапельтнень анокстыця агрегат ды ламо лия мезе эрявиксэсь. Теде башка, 2022 иестэ теезель вазонь кардо, сюротнень ванстомань утом, техниканть туртов лембе гараж. Ламо аравтлувт хозяйстванть кастомга-виевгавтомга кемекстазь маласо шкантень. Тедеде арсеви стявтомс ракшатнень кирдемань од комплекс нилесядт таркас, теемс ловсонь комплекс, тинге ланго, ламолгавтомс КРС-нть 2000 пряс, поладомс тевтнень од модатнень вадрялгавтоманть коряс, панжомс важодемань од таркат ды кастомс зарплататнень.
Теке марто Владимир Кабаев, кода депутат, башка мель яви тиринь велень ды целанек райононь социальной эрямонтень. Куш кодамо тевсэ максови эрьва ёндонь лезкс. Истя, фермерэнь хозяйстванть лезксэнзэ вельде Вармазейкасо теезель эйкакштнень туртов налксемань вадря тарка, витнезель-вадрялгавтозель 1941-1945 иетнестэ Ине Отечественной войнасо чавовозтненень кеврунгось. «Комплексное развитие сельских территорий» программанть лувсо хозяйствань важодицятнень туртов стявтовсь эрямо кудо (истямо робота ветяви нейгак). Истя жо депутатонть ды КФХ-нть лезксэст вельде витнезельть-вадрялгавтозельть Вармазейка ды Од Чамза велетнень калмоланготнень перька таркатне.
Кода тешксты Владимир Юрьевич, эряви весементь теемс велетнень ванстомга. Штобу ломантнень аволь уле мелест туемс покш ошов, эряви вадрялгавтомс велесэ эрямонть, панжомс важодема таркат.
– Кода кортыть, ськамот паксясо а тюриця. Тесэяк истя, весе теезесь, весе саевкстнэ ды изнявкстнэ – те минек хозяйствань коллективенть вейсэнь важодемазо, – кемексты Владимир Кабаев. – Покш сюкпря минек масторонь, республикань ды райононь прявттнэнень велень хозяйствантень лезксэнь максоманть кисэ, государственной эрявикс программатнень тевс нолдамонть кисэ. Неть программатне миненек максыть пек эрявикс лезкс.
Владимир Юрьевич Кабаевень хозяйствась а ашти ве ёно специальной военной операциянь тевтнеде ды мобилизованнойтненень гуманитарной эрявикс лезксэнь максоманть коряс. Ветяви робота СВО-нь участниктнень семиятненень лезксэнь максомгаяк.
– Масторонь сэтьмечинть ванстомась – минек вейсэнь тев. Цёратне неть аравтлувтнень топавтыть СВО-нь таркатнесэ. Миненек жо, сыненст лездамга, эряви важодемс тесэ ды малавгавтомс изнямонть! – тешкстась Владимир Кабаев.
В. Ю. Кабаевень КФХ-сь иестэ иес касы-виевгады. Покш ды эрявикс робота теезель ютазь иестэ. Фермасонть стявтовсть зярыя од объектт: вазонь кардо, сюракшов ракшатнень андомань туртов тарка (600 пряс), кизэнь шкань калда ды склад. Те иестэ вадрялгавтовсть кизэнь шкасто скалтнэнь кирдема таркатне. Истя жо покш робота ветяви ракшатнень туртов 400 таркас кардонть тееманзо коряс, косо скалтнэ кармить кирдевеме апак содо. Арсеви кастомс поголовиянтькак (2000 пряс). Ды теемс ловсонь эштё вейке комплекс. Весе неть од совавтоматне лездыть ламолгавтомс важодема таркатнень ды седе кастомс зарплататненьгак. Теке марто производстванть виевгавтомазо лезды кастомс райононь бюджетс пандовиця налогтнень покшолматнень ды седе покш мель явомс Вармазейка велень поселениянть вадрялгавтомантень. Тень лангсо хозяйствась течи важодияк.
Юлия Еремина