Вторник, марта 19, 2024
Важное


2020 иень якшамковонь 1-це чистэнть саезь Мордовиясо тевс нолдави «Комплексное развитие сельских территорий» федеральной программась. Сон теезь РФ-нь Президентэнть В.В.Путинэнь ушодксонзо коряс. «Велень ипотекась» - пек паро тев весе масторонь эрицятнень туртов. Виде, те эрямонь программантень совамодо икеле васняяк ванкшномат весе ёнкстнэнь.



Льготань коряс кредитэсь максови весенень (21-65 иесэтненень), кинь ули мелезэ рамамс анок эрямо тарка эли путомс од кудо велесэ. Эряви чарькодемс, льготань коряс программанть анокстызе аволь кодамо-бути башка банк. Те государстванть ёндо истямо ушодкс, конань коряс велев тердевить од эрицят ды сынст туртов теевить паро условият.

СУММАСЬ ДЫ КРЕДИТЭНЬ ШКАСЬ

Велень ипотеканть вешеманзо аволь стакат. Видьстэ меремс, те лиятнеде мейстэяк пек а явовиця эрямонь кредит, конань сайсызь велев эрямо туицятне ды кармить сонзэ пандомо сехте ламо 25 иень перть.

ПРОЦЕНТЭНЬ СТАВКАСЬ

Сехте покш ставкась велень ипотеканть коряс эрицятненень карми улеме 3 %. Кредитэнь ды льготань ставканть ютксо разницанть максы федеральной бюджетэсь истямо лувсо, кодамо РФ-нь Центральной банконь ключевой ставкась. Страховкань кемекстыцятненень процентэсь алкиньгавтови 2,7 %. Полисэсь эряви теемс «Россельхозбанк» дочерней стра­ховой компаниясо. Кредитэнь саемань васенце иестэ те вешемась топавтома. Кавто полисэнь кисэ (эрямонь ды шумбрачинь страхованиянь, ули-паронь страхованиянь) сави пандомс 1 % седе ламо тынк долконть эйстэ. Невтемакс, бути кредитэнть покшолмазо 3 млн. целковойть ды тынь цёраломань, кинень 40 иеть, сестэ страховой полисэсь вете иес карми улеме 40 тёжат целковойть. Истя, васенце взносось 3 млн. целковоень пингстэ
- 340 тёжат целковойть (300 тёжат целковойть - неть самай 10% ды 40 тёжат целковойть - страховкась).

Мордовиясь сеть аламо регионтнэстэ вейкесь, конась анок процентэнь ставканть теемс седеяк алкинекс - 1 %. МР-нь Прявтось В.Д.Волков кирдизе РФ-нь Велень хозяйствань министерстванть ушодксонзо.
Сеть, кить арсесть саемс кре­дит, содаст, сынст кредитэнь до­говорось может полавтовомс аволь сынст лезэс. Тенень улить кавто тувталт. Васенцесь: бути сынь коласызь кредитэнь договоронть. Сестэ алтазь 3 % таркас сыненст сави пандомс Центральной банконь ключевой ставканть покшолманзо ;
- течи те 6 % эли стандартноенть (11,5 %) кой-кона вешематнень а топавтомаст кисэ. Омбоцесь: кредитэсь покшолгавтови сестэ, бути РФ-нь Минсельхозось а максы банконтень субсидият бюджетсэ ярмактнень а сатомаст коряс.

КРЕДИТЭНЬ КОРЯС САЕЗЬ
ЯРМАКТНЕ МАКСОВИТЬ:

бути ломанесь сайсь мель рамамс анок эрямо тарка велесэ (улезэ те од кудо эли квартира ламо квартирас кудосо) модань участка марто;
аволь од эрямо таркантень ладявить истят вешемат: эрямо таркась улевель паро, аволь кодамояк садпирень нурька шкас совамонь кудыне эли «вагончик». Кудось уштоволь ды улевель эйсэнзэ электричества;
кинь ули мелезэ стявтомс од кудо велесэ, модань участкань рамамось теема договоронь подрядонь коряс ды теде мейле ушодома кудонть путоманзо;
апак прядо кудонть рамамсто, конась ашти велесэ, теема доле­вой строительствань договоронь коряс;
велень территориясо модань азоронь участкасонть, косо кудось тееви эли теевсь подрядонь договоронь коряс.
Подрядной организациятненень эряви улемс аккредитованноекс банксо. Подрядчиктнень икелев путовить истят вешемат: важодест кавто иеде а седе аламо, те организациянь ули-паронть лангс илязо уле путозь арест, берянь информа­ция исковой вешематнеде. Банконь клиентэнтень мереви эстензэ кочкамс подрядчик ды ильтямс сонзэ «Россельхозбанков» аккредитациянь получамо. Сень туртов, штобу подрядчикесь топавтовлинзе обязательстванзо, «Россельхозбанкось» анокстась финансированиянь колмо этапт: васенцекс - 20% максовить подрядчиктненень кудонь фундаментэнть теемстэ; 30%, зярдо вельтяви латось; 50 % максовить сестэ, зярдо прядови кудонть стявтомазо ды банконтень максовсть кадастровой учётонь документтнэ.

ВАСЕНЦЕ ПАНДОМАНТЬ ПОКШОЛМАЗО

Рамавиця объектэнть эйстэ васенце пандомась - 10 %. Неть
- «живой ярмакт». Велень ипотеканть саемстэ васенце пандомакс а мереви тевс нолдамс авань капиталонть. «Россельхозбанкось» тешксты, те программанть коряс авань капиталось тевс нолдави шкадо икеле кредитэнь пандомсто, лиякс меремс, лия пандоматнестэ.

КИНЬ УЛИ ПРАВАЗО ИПОТЕКАНТЬ САЕМС?

Мейсэ паро льготань коряс велень ипотекась - сон аволь ансяк велень эрицятнень туртов. «Велень кредиттнэ» максовить весенень, кинь ули мелезэ свалшкас туемс эрямо велев. Банктне а ваныть венчамонть-урьвакстоманть, эйкакштнень улеманть ды сынст ламочист лангс. Виде, мельс саевить иетне, РФ-нь гражданинэкс улемась, ды улезэ пропискат се регионсонть, косо ашти банконь отделениясь, ков клиентэсь пшкалесь ипотека мельга, получамс офици­альна зняро, штобу ярмактне сатост кредитэнь пандомс, ды эряви кредитэнь паро история.

КРЕДИТЭНЬ САИЦЯТНЕНЕНЬ ДОКУМЕНТТНЭ

Тешкстасынек, Мордовиясо госпрограмманть тевс нолдыцякс ашти «Россельхозбанкось».
«Велень ипотекань» условиятнень тонавтнемадо мейле ушодтано документэнь пурнамо. Ипотекань кредитэнь саемс эрявить паспорт, СНИЛС, истя жо документ, косо кемекстави заемщикенть ярмаконь улемачись. Содадо: физи­ческой лицятненень - те 2-НДФЛ справкась ды трудовой книжкань копиясь, конань кемекстыть тевень максыцятне. Башка предпринимателентень - налоговой декла­рация. Сеть гражданинтнэнень, кить ветить подсобной хозяйства
- похозяйственной книгасто выпи­ска. Банконь условиятнень коряс мирдть-нить теевить созаемщикекс ды пурныть истят жо документт.
Седе домка информациянть ванодо кредитэнь организациясто эли сонзэ официальной сайтстэ.
Ипотечной кредитэнь саемань яволявтомась ванкшнови колмо- вете чинь перть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».