Вторник, мая 21, 2024
Важное
Ютазь иень сёксня, Вирьсэ важодицятнень кенярксчинть тешкстамонь шкастонть, редакцияв гайневтсь Мордовия Республикань Вирень, охотямонь хозяйствань ды природопользованиянь министерствань Саранскоень территориальной лесничествань главной лесничеесь Юрий Васильевич Чикнайкин.
Тешкстаса, «Эрзянь правда» газетась ламо иень перть кирди ояксчинь ды важодемань сюлмот те учреждениянть ды сонзэ прявтонть марто. Ней вана Юрий Васильевич тердимизь Кочкуровань районов, тувталось, мерсь, кенярксов. Тешкстась, умонь шкасто саезь Саранскоень территориальной лесничествань Кочкуровань участковой лесничествась ды Сурвелень школань тонавтницятне важодить вейсэ. Тосо теезь «Сосёнки» школань лесничествась вейсэ прявтост Валентина Нуштайкина марто невтить ёрокчист муниципальной, республикань ды весероссиянь пелькстамотнесэ.

– Ютазь кавто иетнестэ «Лучшее школьное лесничество» пелькстамосонть «Сосёнки» лесничествась совась изницятнень юткс. «Ёлочка, живи!» конкурссонть «Лучшая стенгазета» номинациясонть сынь лиссть колмоце таркас. 2022-2023 иетнестэ «Сосёнки» агитбригадась «Есть дело до лесного дела» республикань пелькстамосонть истя жо совась изницятнень юткс, косо максызь тенст нилеце тарканть, – покш кенярксчисэ сестэ пачтясь тенек Юрий Чикнайкин. – Эйкакштнень эрявить мелест кепедемс ды максомс казне сынст прявтонтень Валентина Никитичнанень.
Алкукскак, сёксень маней се чистэнть неть паро тевтне топавтовсть. «Сосёнки» школань лесничествань агитбригадас совицятнень туртов казнекс ульнесь «Кречет» охотямонь хозяйствав якамось, тосо уликс идем ракшатнень андомась ды пертьпельксэнь мазычитнень ванномась. Сынст прявтонтень, тонавтыцянтень Валентина Нуштайкинанень максовсь вирень ванстомань ведомствань Почётонь грамотась.

Эйкакштнень марто важодеманть – васень таркас

Тешкстаса, Юрий Васильевич Чикнайкиндэ ёвтнеманок а стяко ушодыя эйкакштнень марто важодемадо, сынст вишкапингстэ вирень вечкеме ды ванстомо тонавтомадо сонзэ покш тевдензэ. Сон сеедьстэ эрси эйдень кужотнесэ, школатнесэ. Кода вишкинетнень, истя жо покштнень мартояк сон свал кортни седе, кода эряви прянть ветямс вирьсэ улемстэ ды кодамо чумондома учи сетнень, кить кармить пожаронь а нолдамонь правилатнень коламо. Неень шкане а лововияк, зяро эрьва кодат пелькстамот, акцият ютавтовсть республикасонок сонзэ ушодксонзо коряс.
Ледстяса, кеменьшка иеде икеле «Эрзянь правда» тиринь газетась вейсэ «Саранское территориальное лесничество» МР-нь ГКУ-нть марто тейсь вейсэнь проект, ушодсь республикань лисьмапрятнень перька чувтонь озавтомо.

Юрий Васильевичень лезксэнзэ вельде васенце истямо акциясь ульнесь 2012 иестэ Саранскоень Октябрьской райононь Куликовка велесэ Пазонь Авань Казанень пазаванть лемсэ лисьмапрянть маласо. Сонзэ перька озавтозельть сизьгеменде ламо пичеть, кузт ды лия чувтот.
Шкань ютазь эштё истямо паро тев топавтовсь Ташто Шайговань Новотроицкой средней школань тонавтницятнень – «Росток» школань лесничествас совицятнень марто. Сестэ мазылгавтовсь те ёнксонь Од Акшина велесэ уликс иневанькс лисьмапрясь. Виде, истят лезэв ды мелень витемань тевтнеде Юрий Чикнайкинэнь эрямосо ульнесть пек ламо. Сон пек парсте содасы вечкевикс тевензэ.
Эдь сонськак эрзянь цёрась чачсь-кассь вирень ванстыцянь семиясо ды, ловт, малав весе малавиксэнзэ пингест алтызь те а шожда тевентень.

Уцяскав важодемасо, уцяскав семиясо

Эрьва ломаненть эсензэ эрямонь кизэ, кинь марто ютавтомс пингенть, нать, аволь свал минек эйстэяк ашти. Ансяк шкань ютазь, вейсэ кенярксчитнень ды талноматнень ютазь, минь чарькодтяно ды ёвтатано сюкпря Пазонтень самай те ломаненть марто вейсэндямонть ды пингенть ютавтоманзо кисэ! Юрий Васильевич, кода сонзэ покштятнеяк, ве ёндо нинть эзь карма вешнеме, урьвакстсь эсест велень мазый тейтеренть Елена Литяйкинань лангс. Елена Николаевна профессиянь коряс медсестра, сон важоди Республиканской клинической больницянь кардиохирургической отделениясо. Эсь шкастонзо Темниковань медицинской училищанть прядомадо мейле вана уш 35 иеть важоди медицинасо. Виде, сон аволь ансяк чить важодема таркасо, эрсить вень дежурстваткак, сестэ лезды тенст авазо, кие малав комсь иеть эри мартост. Нина Фёдоровна лездась тенст кастомс Ирина тейтерест, кие ней уш сонсь ава. Тешкстасынек, Ирина Юрьевна Яушева эрямонь тевекс, аванзо ладсо, кочкизе медицинанть. Сон важоди 5 № Республиканской клинической больницясо врачокс-кардиологокс. Вейсэ кастыть ды кенярдыть Илюша цёрынест ды нуцькинест коряс.

А мезть сёпомс, эрьва ломаненть ули вечкевикс тевезэ, конанень сон максы весе юткошканзо. Лиякс меремс, хоббизэ. Кие вечки калонь кундсеманть, кие чапи банят, кие кирди ракшат... Юрий Васильевич ламо иень перть кирдсь мекшть. Сон пек вечкиль мартост котьмамо. Ансяк сыль тундось, сон капшиль Покш Березникень Од Пермезь велев. Мезесь кенярдовты, Чикнайкинтнэнь семиясо покш ояксчисэ эрить ды свал важодить аволь ансяк колмонест цёратне, сынст марто вейсэ свал сазорост Любовь Васильевнань мирдезэ – содамост Геннадий Александрович Агейкин. Ламо тевень топавтомо сынст тонавтынзе тетяст Василий Сафронович.
Аволь пек умок, кизэнь вейке пси чистэ, Од Пермезь велесэ лиссь покш кажо, сестэ ламотнень палсть кудост, Чикнайкинтнэнь юртось ванстовсь! Лисни, а ёми сынст раськесь, паряк, сыть шкат, зярдо тиринь велев эрямо ды важодеме сыть сынст нуцькаст ды правнуцькаст….

Чачома таркась сехте питней

Масторлангсо эрьва ломанентень сехте питней се таркась, косо ютась эйкакш пингезэ, косо теевсть васень эскельксэнзэ, косо ёвтавсть васень валонзо. Тосо эрьва таркась ледстни тетядонзо-авадонзо ды весе малавикстэнзэ… Юрий Чикнайкинэнь туртов истямо таркась – Покш Березникень Од Пермезь (Хониновка) велинесь, конась сови Пермезентень.
Тетязо-авазо, Василий Сафронович ды Нина Ивановна, тиринь велесэ путсть покш мазый кудо, косо сынь, ояксчисэ эрязь, трясть-кастсть ниле эйкакшт: колмо цёрат ды вейке тейтерь. Кудазорось Василий Сафронович, ловт, пингензэ перть важодсь вирьваныкс. Пертьпельксэнь вечкеманть, вирень тевенть парсте содамонть сон максызе колмонест цёранзо туртов. Васня васенце эйкакшост, Виктор Васильевич, поладызе тетянзо тевенть, мельганзо – Юрий Васильевич, Иван Васильевич, сынь весе эрямост сюлмизь виренть марто. А вана Любовь Васильевна, вишка сазорост, куш эри ды важоди велесэ, лия тевсэ.

Тешкстасынек, омбоце цёраст, Юрий Васильевич, Пермезень средней школасо кавксо класстнэнь парсте прядомадо мейле тонавтнеманзо поладызе Краснобаковской вирень хозяйствань техникумсо. 2003 иестэ Йошкар-Ола ошсо сон заочна прядызе Марийской государственной технической университетэнть «Лесное и лесопарковое хозяйство» специальностенть коряс. Эсь шкастонзо служась армиясо, топавтызе масторонть икеле долгонзо. Юрий Васильевичень, косо бу аволь уле, седеесь свал тердсь тиринь ёнксов, свал ульнесь мелезэ велявтомс тиринь Мордовияв. Трудовой кинзэ ушодызе 1983 иестэ Покш Березникень мехлесхозсо вирень мастерэнь тевстэнть. Пингень перть эрямозо сюлмазь вирьсэ важодеманть марто, ламо иень перть топавты главной лесничеень тевенть. Тевензэ парсте топавтоманть кисэ сон казезь «За сбережение и приумножение лесных богатств России» ведомственной знаксо, «Почётный работник лесного хозяйства» ведомствань отличиянь знаксо, 2017 иестэ сонензэ максозь «Мордовия Республикань вирень хозяйствань заслуженной роботник» почётонь лемесь.

Течи, январень 9-це чистэ Юрий Васильевич тешксты чачома чинь юбилеензэ. Сонзэ лемс ёвтавсть ламо поздоровт. «Эрзянь правда» газетань коллективесь вейсэндяви неть паро валтнэс ды арси тензэ кеме шумбрачи, кувака пинге ды весе арсезенть топавтома.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».