Важное


Покш Игнатбуень Ташто Чамзась аволь вишкинетнестэ (эйсэнзэ эрить 440 ламо ломанть), ялатеке сельмс а каявиця, сэтьме веле. Эрить аволь каштант, эсь тевень содыця, важодиця ломанть. Велесь мейсэяк пек а явови республикань лия истямо жо эрзянь велетнеде. Теке марто, бути васенцеде тезэнь пачкодят, неяви: тесэнь эрицятне вечксызь эсь велест ды теить весементь сонзэ паролгавтоманть туртов. Велень ульцятне апак сравтне ве ёнга, кезэрень Чамзань ломантне, нать, арсесть теде ды стявтнизь кудост вейке покш куринкас. Те седе мейле уш, Советэнь шкатнестэ, ве ульцянтень педявтнезельть зярыя седе вишкинеть ды сыньгак кадовсть вейке курынес.



Куншкакурось – Ташто Чамзань ломантнень «прянь шнамкаст», тесэ маласо аштить велень весе учреждениятне: школась, эйдень кужось, клубось, фельдшерско-акушерской пунктось, почтась, велень администрациясь, лавкась, эйдетнень туртов налксемань площадкась ды футболонь-волейболонь кортось. Велень администрацияв минек ильтицякс прянзо сиведизе Павел Яковлевич Наумов, тесэнь «8-ое Марта» агропредприятиянь СТФ-нь прявтось. Павел Яковлевичень важодемань стажозо, кода нейгак весе мерить, «колхозсонть» – 37 иеть. Наумовонь валонзо коряс, весе иетнень перть, ютазь пингень 30-це иетнестэ саезь, зярдо колхозось панжозель, велень хозяйствась зярдояк эзизе полавтне лемензэ. Сонзэ пельде карминек содамо, 70-це иетнес «8-ое Марта» колхозонь председателекс ульнесь МАССР-нь велень хозяйствань заслуженной роботникесь, Ленинэнь ды «Знак Почета» орденсэ казезесь С.Ф.Наумов. 1996 иестэ саезь колхозось теевсь СХПК-кс. 33 иеть сонзэ прявтсоль РФ-нь велень хозяйствань заслуженной роботникесь Алексей Николаевич Дорофеев, кона те иестэ тусь эрямосто. Тешкстама, лемезэнзэ велень школасонть панжозь «Героень парта» ды анокстазь а покш выставка. Ней прявтонь тевтнень велень хозяйствасонть топавты Николай Иванович Куманев. Хозяйствась икелеяк ды нейгак каднови велень кирдицякс, тензэ лездыцякс, важодема таркань максыцякс, ды, нама, ламова эйстэнзэ ашти, кодамо карми Ташто Чамзанть сы шказо.

Велень азоравась, эли официальна, прявтось, Татьяна Николаевна Куманёва, вастымизь крыльця песэ ды энялдсь пек а снимсемс сынст зданиянть. Келя, те сонзэ сэредьксэзэ, вадряль бу администрациянть ушо ёндо витнемс-петнемс, ансяк ярмакт ковгак а сатыть ды тевесь таркастонзо а сыргси. Куманёва велень прявтокс роботы комськавтово иеть. Сонсь – мокшава, ансяк мирденень лисемадо мейле мокшонь келесь куроксто полавтовсь эрзянсенть лангс. Татьяна Николаевнань туртов Чамзась умок уш теевсь тиринь велекс. Те эряза авась весе оймензэ максы веленть кисэ, бажи анокстамс проектт, совавтомс сынст эрявикс программатнес. Истя идесть эстест налксемань площадка «Устойчивое развитие сельских территорий» программанть вельде, ней бажить витнемс велень китнень. Куншкакуросонть кись эштё а берянь, лиятне жо учить витнема. Уш анокстызь проектэст, сметань документэст, кадовсь понгомс программас. «Бути а аштемс ве таркасо ды а нувсемс, сестэ ламо мезе тееви!» – арси Татьяна Николаевна. Вейсэ велень эряза цёратнень ды аватнень, школань, Культурань кудонь роботниктнень марто свал бажить кенярдовтомс Ташто Чамзань эрицятнень. Кода маштыть! Тунда видить-кастыть куншкакурованть цецяпандят, анокстыть спектаклят, тиринь велень чить, козонь эрьва ульцясь аноксты эсензэ куронь выставка. Весе покш кенярксчитнестэ эрицятне тердевить вастовомас, пурныть стольть, рамить-пидить каванямкат. Пенсионертнэнь туртов, конатнеде велесэнть сядодо ламо, истят вастовоматне теке ванькс коштто лексема. Аволь умок пурнавкшность Сыре ломанень ковонть тешкстамо, истя баян мельга киштсть ды морасть сырькайтне – од ломантнень дивавтсть!
Татьяна Николаевна вети «Одноклассники» сайтсэнть велень администрациянь официальной лопа, козонь снартни путомс весе фотографиятнень ды кулятнень. Кадык эйкакштне, оятне ваныть тиринь ломанест лангс масторлангонь келес.

Кеняркстнэде башка, Ташто Чамзасо мелявкстнэдеяк сатышка. Арась велесэнть свалшкань фельдшер. Л.В.Рычагова роботы кавто велес, ве чи Аржадеевасо, ве чи – Ташто Чамзасо. Орматне жо фельдшерэнть учнеме а кармить, кой-кона сырькайтнень туртов медсестрань лезксэсь эрявкшны эрьва чистэ. Од ломантнеяк велесэнть иеде иес аламолгадыть, эйкакштнедеяк чачить аламо. 415 эрицятнень эйстэ ансяк 53-тне 16 иес эйкакшт. Мезе кенярдовты Куманёвань, улить од семият, конатне чачтсть эйкакшт, строясть кудот. Украинасто сазь ниле семиятнененьгак строязь од ульця, ды, келя, сынь одов туеме а бажить.

ШКОЛАСЬ – ВЕЛЕНЬ НАРДЕ


Кода улемс велесэ ды а совамс школас?! Ташто Чамзасо сон ули, роботы ды пекстамодонзо а кортыть. Тесэнь содамочинь кудось сови «Большеигнатовская СОШ» МБУ-с ды ловови сонзэ структурной подразделениякс. Школась ней 9 классонь, эйсэнзэ комськотово тонавтницят. Юрсонзо роботы эйдень кужонь группа, козонь эрьва чистэ сакшныть кемень эйдеть. Сынь тесэ анокставить школав, налксить, киштить-морсить 9 чассто саезь 12 часос. Тетятнень-аватнень, покштятнень-бабатнень туртов те группась максы шка теемс кодаткак эрявикс тевть, ардомс райцентрав, молемс больницяв. Паро, Покш Игнатовась а васоло, кавксо вайгельбеть ансяк, ды автобустнэяк ардтнить эрьва чистэ.

Велень школань прявтось Наталья Николаевна Семёнова коллективдензэ корты пек лембестэ. Тонавтыцятнеде тесэ кевейкее ломань, весе, ловт, састь те школанть панжома 1986 иестэ од тейтерькакс ды роботыть 30 ламо иеть.
(Пезэ сы номерсэнть).

Марина ДЕВЯТОВА
Фототне: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».