Вторник, марта 19, 2024
Важное


2019 иень октябрянь 23-це чистэ Приморьянь Дальнереченск ошсо ютасть кенярксчинь ламо покш мероприятият. Ошонтень топодсть 160 иеть. Кенярксчинь программасонть ульнесь вейке мероприятия, кона видьстэ сюлмавозь Мордовиянть марто.
Ошонь центральной библиотекасо ютась книгань презентация. Журналистэсь, писателесь-дальневосточникесь Сергей Рослый нолдась книга алкуксонь факттнэнь коряс Советской Союзонь Героенть Ефим Владимирович Тягушевень подвигтензэ. Дальнереченск ошонь эрицятне ловить сонзэ эсест героекс. Истямо праваст ули Мордовиянь эрицятненьгак.

Ефим Владимирович Тягушев чачсь 1919 иень январень 26-це чистэ Мордовиянь Ицяло ёнксонь Кендя велесэ. Сон эрзяль. Тонавтнесь ды прядсь 7 класст. Се шкане истят ломантне лововсть сурсо. Ушодсь роботамо «Новый путь» колхозсо, теде мейле ульнесь налоговой агентэкс, мейле зярыя иеть роботась торфопредприятиясо. 1939 иестэ Ицялонь райвоенкоматось тердизе Якстере Армияв. Полковой школасо тонавтнизе радистэнь специальностенть. Войнась сонзэ туртов ушодовкшнось 1939 иестэ. Иень перть участвовась Финляндиянть каршо боевой действиятнесэ. Мейле службанзо поладызе. Ине Отечественной войнанть вастызе Одесса ошонть маласо. Се шкантень тетязо-авазо ды малавиксэнзэ Мордовиясто туекшнесть эрямо Приморьяв.

1942 иень апрельстэ 78 отдельной бригадась, конань составсо воёвась Ефим Тягушев, ветясь стака бойть Северский Донец леенть чиресэ, Красный Лиман ошонть маласо. Апрелень 20-це чиденть мейле веньперть сынст стрелковой ротась пачкодекшнесь чивалгома ёнксонь берёконтень ды апак учо каявкшнось немецтнень лангс. Десантонть составсо ульнесь якстереармеецэсь Ефим Тягушевгак. Немецень кадозь блиндажсонть сынь нолдызь радиостанциянть ды кармасть лездамо артиллериянтень. Немецтне курок чарькодсть, косто лездыть артиллеристтнэнень, ды снартнесть маштомс корректировщиктнень. Сынь а весть сыргсесть атакас, теке жо шкастонть немецень снарядтнэ пря эзть максне кепсемс. Ефим Тягушев оянзо марто леднесь ятонть ланга. Вийтне а вейкетельть. Маштовсь стрелковой отделениянь командирэсь. Тягушев варштась живстэ кадовозтнень лангс. Сындест ульнесть колмо ломанть: сон ды стрелоктне Александр Радченков ды Иван Козулин. Неть колмо солдаттнэ котоксть лоткавтокшнызь немецтнень атакатнень, зярс эзть прядовкшно патронтнэ. Сестэ Ефим Тягушев нолдызе радиостанциянть ды артиллеристтнэнень эфирга мерсь леднемс сынст дзотонть ланга. Эсь юткова колмо солдаттнэ уш простясть.

Артиллериянь леднематне соказь сокизь моданть дзотонть малава. Маштозельть ламо гитлеровецт. Омбоце чистэнть минектне таго саизь те тарканть. Геройтнень уловтнень калмизь маштовома таркадонть аволь васоло. Радистэнтень, старшей сержантонтень Михаил Ильич Синельниковнень ды рядовоентень Ефим Владимирович Тягушевнень СССР-нь Верховной Советэнь Президиумонть Указонзо коряс максозельть Советской Союзонь Героень лемтне маштовомадо мейле.
Кода невтизь седе мейлень тевтне, геройтне аволь весе маштовкшность. Зярдо сезевкшнесь дзотсонть покш снарядось, сезевемань виесь ёртокшнызе Тягушевень ламодо ве ёнов. Сон контузявкшнось. Зярдо сась превс ды панжинзе сельмензэ, неизе, кода немецесь ладизе лангозонзо автоматонть. Сонзэ саизь полонс.

Сон понгсь концентрационной лагерьс. Ефим Тягушев вийтеме аштесь кунст кевень кельме кияксонть лангсо. Колмо чинь перть тенст эзть максне ярсамс. Пилензэ контузиядонть мейле овсе эзть маря. Аламонь-аламонь кармась само ёжос. Полонс понгомась цёранть туртов ульнесь покш седейризксэкс. Оргодемадо арсематне чачокшность сеске ды зярдояк оймамо эзизь кадокшно. Полонсто Ефим Тягушев снартнесь оргодемс кавксть, ансяк теньстэ мезеяк эзь лисне. Колмоце оргодемась удалась. Те ульнесь 1943 иень январень 21-це чистэ.

Оргодицясь ютась чокшне ды веньперть. Чить аштесь кекшема таркасо. Ёнксонть муилизе Чинть ды тештетнень коряс. Ярсаськак мезде понгсь. Ютась ковонь перть. Теке жо иень февралень 28-це чистэ сон лиссь минек икельце подразделениятнень позициятнес.
Ды вана Ефим Тягушев таго стройсэ. Участвовась Крыменть, Болгариянть, Румыниянть, Югославиянть олякстомтомасо. Войнанть прядызе Австриясо.

Войнанть прядовомадо мейле Тягушевтнень семиясь цёраст пельде получась телеграмма, косо кортавсь: демобилизациянь коряс курок сы кудов, Хабаровскоев. Самодо мейле кармась содамо, конёвтнень коряс сонензэ максозь Советской Союзонь Героень лемесь маштовомадо мейле. Лисни, неть конёвтнень коряс Ефим Тягушев живтнень ютксо арась. Кода ней улемс? Фронтовикесь эзь сода, мезе теемс, лездыця вакссонзо арасель. Ушосо сон пшкадсь вастозь васенце военной ломанентень. Тонась ульнесь полковник. Ёвтнизе эсь историянзо. Полковникесь тензэ ёвтась мель, совамс краевой библиотекас ды Верховной Советэнь ведомосттнестэ муемс Указонть, косо кортави сонзэ каземадо. Ефим истя тейськак. Сельметне вешнить эрявикс строчкатнень ды вана: «За… проявленные… отвагу и геройство присвоить звание «Герой Советского Союза» красноармейцу Ефиму Владимировичу Тягушеву…» Те шкастонть цёранть лавтовонзо сорнозевсть ды теизе сень, мезенть эзизе теекшне мик войнань стакачитнестэяк. Сон авардезевсь.

Ансяк зярыя чиде мейле сон таго совась библиотекав, сёрмадызе Указонть ды кучизе Верховной Советэнь Президиумс. 1948 иень июльстэ Кремлясо Ефим Тягушевнень максызь те лементь эрямо шкасто.
1952 иестэ Ефим Владимирович прядызе Благовещенск ошонь речной училищанть, мейле роботась Дальнереченск ошонь леень пристаньсэ. 1971 иень январень 27-це чистэ Ефим Владимирович Тягушев тусь эрямосто. Тензэ ульнесть 52 иеть. Героесь калмазь Дальнереченск ошонь калмазырень куншка аллеясо.

Тиринь ёнксов Героесь сакшнось зярыяксть. Ней кадовсть овсе аламо ломанть, конатне эштё эзизь стувто неть вастовоматнень. Сонзэ примерсэ патриотической воспитаниядонть кортамскак а мезть. Вана мезе мерсь тень коряс Кендя велень администрациянь прявтось Людмила Николаевна Базаева: «Зярдо-бути Кендя велесэ эрямось лаказь лакась. Героенть кис мельспаросо аштесть велень весе эрицятне. Ней шкатне теизь эсест тевест: колхозось каладсь, школась пекстазь. Кадовсть ансяк сыре ломантне, конатне чиде-чис аламолгадыть. Кендя велень клубсо понгавтозь Героенть покш фотографиязо, ансяк тевесь сеньсэ, тов совсицятне сурсо лововить».
Лия тевесь Приморья ёнкссо. Тесэ Геройденть а стувтнить. Дальнереченск ошонь музейсэ Ефим Владимировичнень алтазь башка стенд. Школасо тонавтницятнень вийсэ роботазь ярмактнень лангс сонензэ панжсть обелиск. Тесэнь поэттнэ Тягушев ланга сёрмадсть ды сёрмадыть стихть… Героенть лемензэ ледстнемга ютавтневить стрелковой турнирт. Зярыя иеде икеле ошонь калмазырьсэ витнезель Е.В.Тягушевень калмозо ды сонензэ кеврунгось.

Николай ЕВДОКИМОВ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».