Вторник, марта 19, 2024
Важное




Неть читнестэ Кочкурбуесь тешкстызе эсензэ чачома чинзэ. Сонензэ топодсть 92 иеть. Райононть историясь пек сюпав, сон трясь-кастсь ламо содавикс ломанть, печтясь масторонть марто стакачить ды кенярдсь изнявкстнэнень. Минь арсинек содавтомс те эрзянь райононть, вастовомс сонзэ прявтонть Светлана Николаевна Герасимова марто ды кевкстнемс седе, кода неень шкане эри Кочкурбуесь, кодат од тевть топавты ды мезес бажи сыця шкастонть.

Сеске тешкстасынек, минек журналисттнэ те районсонть свалшкань инжеть, тесэ вастыть эйсэнек седейшкава. Кочкурбуень эрзянь велетнесэ эрить мельвановикс сёрмадстыцянок, сындест ды сынст туртов минь свал бажатано анокстамс мельстуиця материалт.

Васенце кевкстемась, конань максынек Светлана Николаевнанень, ульнесь национальной проек-ттнэнь топавтомась. Сындест ламо кортави, ды Мордовиясо эрьва районось важоди зярыя проектэнь коряс. Кода содатадо, весемезэ эйстэст кемгавтово. Кочкуровасо кой-кона проекттнэнь коряс зярыя мероприятият уш прядозельть мелят, зярыя ютасть 2020 иентень. Невтемакс, «Жилье и городская среда» проектэнть лувсо поладови Кочку рвелесэ оймсемань парконь одкстомтомась ды кудо икелькстнэнь ванськавтомась-мазылгавтомась. «Культура» нацпроектэнть лувсо одкстомтови Сурвелесэ (Сабаевасо) Культурно-досуговой центрась.

- Мелят «Демография» нацпроектэнть лувсо Кочкур велень школасо теезель хоккейсэ налксемань корт, - ёвтни Светлана Николаевна. - Теке жо школасонть «Образование» нацпроектэнть лувсо витнезель спортзалось ды стявтовсь плоскостной сооружения. «Неень шкань школа» федеральной проектэнть лувсо панжозь «Точка роста» Цифровой ды гуманитарной профильтнень образованиянь центра. Кенярдовтымизь школань тонавтыцятнеяк. Кочкуровань средней школань рузонь ды литературань тонавтыцясь Валентина Фёдоровна Герасимова кармась РФ-нь Президен-тэнь Премиянь саицякс.
Покш важодема ветявсь ды ветяви жилищно-коммунальной хозяйствань сферасонть. Сон свал аволь шождатнестэ, ялатеке минек улить изнявксонок. 2019 иестэ совавтозь эксплуатацияс 70 кудот, вейсэнь площадест 9244 кавонзазь метрат, эрьвась 127 кв. метрань покшолмасо. Планонть топавтынек 193 процентс. Те сехте паро невтевксэсь республиканть келес. Тешкстаса, уш зярыя иеть райононок те ёнксонть коряс саи васенце таркат.

«Безопасные и качественные автомобильные дороги» нацпроектэнть лувсо районсонть витневить 40 вайгельбень кувалмосо кить. «Формирование комфортной городской среды на территории Кочкуровского сельского поселения на 2018-2022 годы» программанть лувсо одкстомтозельть колмо кудонь икелькстнэ. Лия содавикс программатнень коряс витнезельть ламо квартирас кудотнень фасадтнэ, ветязель газопровод Од Пурнясо, Вирь Тавласо, ды Кочкуровасо витнезель-петнезель автомобилень кись. Ламо эйкакшонь триця вейке семиянтень максозь 1 миллиондо ламо целковойть кудонь рамамс. Кавто миллиондо ламо социальной выплатат пандозельть кавто семиянень, конатне кадовсть эрямо ды важодеме велес.

«Демография» нацпроектэнть лувсо тедеде декретсэ аштиця колмо аватне райононь занятостень центранть вельде питневтеме тонавтнесть од профессияс - кастызь квалификацияст. А мезть сёпомс, эйкакшонь чачомань коряс неень шкане весе районтнэсэ тевтне молить а пек вадрясто. Ламот бажить туемс ошов. Кочкуровань районось Саранск ошонть эйстэ ашти маласо, сонськак районось аволь покштнестэ ды тесэ те мелявксось седеяк редявикс. Мелят чачсть 68 эйдеть. Ансяк тедедень коронавирусонь инфекциясь ламонь кармавтынзе варштамс велесэ эрямо таркатнень лангс лия ёндо. Кочкурбуесь тень кувалма кармась ёнксокс, конась оштонтькак а васоло (ансяк 25 вайгельбеть) ды совияк сеть районтнэс, косо топавтови «Сельская ипотека» программась. Секскак тедедень кизна кевкстематне-арсематне тосто кудонь рамамодо ды эрямо кадовомадо кассть зярыяксть. Ды те пек кенярдовты райононь прявтонть. Кочкурбуесэ важодить колмо филиал марто колмо общеобразовательной учрежденият, колмо эйдень кужот ды вейке эйкакшонь допобразованиянь учреждения.

Нацпроектэнь коряс аволь умок одкстомтозель Семилей велень эйдень кужось. Вейкеяк веле апак кадо мельтеме: эйкакштнень школав пачтямонть, андоманть, тонавтоманть, спортонтень бажамонть ды эйсэст тиринь ёнксонтень вечкемань кастоманть коряс тевтне ветявить образованиянь, од ломанень политикань весе вешематнень топавтозь.

КУЛЬТУРАСЬ - БАШКА ТАРКАСО

Кочкуровань райононь Раськень культурань, промыслань ды ремеслань центранть панжомась 2018 иестэ кармась весе эрицятнень туртов покш казнекс. Кавто иес культурань те куншкакурось кармась неявикс ды редявикс аволь ансяк районсонть, республикасонтькак. Мелят центрантень, «Культура малой родины» проектэнть лувсо, максозельть 800 тёжат целковойть чувтосто керсицянь ды стыцянь мастерскойтнень пештямс. Рамазельть стамо машинкат, лия эрявикс курмот-кармот. Кочкуровань тештетненень - «Гайги вайгель» эрзянь фольклоронь ансамблянтень - стазельть 250 тёжат целковойс сценань оршамопельть. Культурань центранть юрсо панжозель мини-санатория сыре ломантнень туртов. Арсицязо - «Мы рядом» АНО-сь, конась истя жо сайсь грант ды бажи лездамс покштятненень-бабатненень витемс шумбрачист. Мелят санаториясь рамась инвентарь ды техника, ветясть занятият психолог ды лециця тренер.

Райононь культурань роботниктне зярдояк а аштить тевтеме. Эрьва покш кенярксчись тесэ ютавтови келейстэ, мазыйстэ, эрзянь ды рузонь раськетнень коест-кирдаст невтезь. Ташто Мурзасо Тундонь ильтямось эли Кочкуровасо Якстере горкась - те свал алкуксонь мини-спектаклят, конатнень ваномо сакшныть инжеть весе масторонть келес. Вирь Тавла велесэ В.И.Ромашкинэнь Этно-кудось кармась эрзянь келень, культурань ды койтнень вечкицятнень вастовома таркакс, «Зов Торамы» эрзянь моронь ды «Кой» чувтосто керсицянь фестивальтнень ютавтома таркакс, Мордовиянь картасо сехте содавикс туристической маршрутокс. Тавла велень чувтосто керсицятнень школась ды сонзэ тонавтыцятне - райононь культурань каштанчист. Нама, тедедень мартсто саезь коронавирусонь инфекциянть кувалма весе культурань ды спортонь мероприятиятнень савсь эли ютавтомс онлайн-режимсэ, эли кадомс седе тов. Од лувсо эрямось-важодемась васенце таркас ливтизе Интернетэнть эрявиксчинзэ. Паро, районсонть малав весе культурань учреждениятнесэ ули Интернет. Мелят сон сась Семилей ды Красномайский велетнень библиотекатнескак. А Ташто Мурзань библиотекась кармась республикань велень поселениясо важодиця культурань учреждениятнень ютксо изницякс. Кочкуровань прявтось С.Н. Герасимова тешкстызе «Обряды жизненного цикла эрзян Кочкуровского района Республики Мордовия» историкенть-краеведэнть И.И.Потапкинэнь омбоце книганзо лисеманть. Сонзэ презентациясь ютась Саранск ошсо, ды истямо книгань пурнамось-нолдамось - аволь ансяк райононть туртов изнявкс, сон весе эрзянь литературанть ды фольклористиканть туртов покш казне.

ВЕЛЕНЬ ХОЗЯЙСТВАТНЕ - РАЙОНОНТЬ НЕЖЕ

Кодамо велень хозяйства васенцекс сы мельс Кочкуровань райононть ледстямсто? Нама, «Норов» Агрофирмась. Сондензэ башка жо районсонть эштё зярыя кеме предприятият. Сынст ютксо «Норовский» МПК-сь ды «Норовское молоко» ООО-сь. Меельцесэнть мелят нолдазель 8320,3 тоннат ловсо. «Норов» Агрохолдингенть вийсэ саезель 5680 тоннат сывель, эли 89 % райононь весе показательтнень эйстэ. Тешкстасынек эштё «Тавла» ООО-нть, «Агросоюз-С» кооперативенть, «Ильин» ды «Полевое» КФХ-тнень. Районсонть улить фермерт, конатне а пелить варчамс виест велень хозяйствасо, сывелень, ловсонь производствасо, ды мелят кототненень государстванть пельде максозельть грантт. Вейкесь эйстэст - Сергей Дмитриевич Рябов, КФХ-нь прявтось, касты вешенка пангот ды натой изнясь ушодыця фермертнэнь ютксо республикань трудовой соперничествань пелькстамосонть. «Сырнень сёксь-2019» выставкасонть «Норов» Агрохолдингень продукциянтень максозель Сиянь медаль. Сон казезель А.В.Поздняковнень. «Норовонть» тешкстызе Мордовиянь Прявтоськак агропромышленной комплексэнть важодемань эрьва иень итогтнень ёвтамсто. «За достижение высоких показателей развития отрасли животноводства среди производителей молока» номинациясонть Кочкуровань районось казезель дипломсо.

Марина ДЕВЯТОВ
https://sun9-55.userapi.com/3hOtTy3NRCi4zoEgFp7S9lLs2Q_Jn2-MG7-Afw/nyehrsPiFpY.jpg");">

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».