Вторник, марта 19, 2024
Важное


Малавгали шкась, зярдо карматано тешкстамо Ине Изнямонь 75 иетнень топодеманть. Весе содыть, Россиясо арасель вейкеяк кудо, конань аволизе тока Ине Отечественной войнась.
Секс Изнямонь чись умок уш теевсь минек масторсо эриця эрьва ломанень кенярксчикс, сонзэ вастомо анокстыть эрьва кудосо. Монгак свал талнозь учан те чинть. Ды свал покш мельсэ ледстнян 1975 иенть, зярдо минек масторось тешкстась Ине Изнямонь 30 иетнень топодеманть. Се иестэнть Советской Союзсо ВЛКСМ-нь ЦК-нть ушодксонзо коряс ютавтозель покштояк покш акция: масторонок келес весе комсомолецтнэнь ютксто кочказельть сехте вадрятне, кить кучозельть Московов Изнямонь Знамянть икеле снимамо. Мордовиясто якасть кевейксэе ломанть. Эрьва районсто – вейке ломань. Кочкурбуенть пельде кучокшнымизь монь. Сестэ тонавтнинь 9-це классо. Сабаева велень школань комсомолецтнэ кочкакшнымизь эсест прявтокс.

Нейгак Московов се якамодонть ды Изнямонь Знамянть икеле снимамодонть ледстнян а ёвтавияк кодамо талнома марто, сестэ жо весе потмован, теке мерят, коткудавт чийнесть. Ки лангов пурнамсто виде-паро ёном маштнесь. Мезе саемс, кода оршнемс? Видькстан, оршамопелень сестэ а пек ламольть. Пароль се: эрявсть саемс школасо тонавтнемань оршамотнень, икельгапацясь (фартукось) улезэ ашо.
Васня пурнавинек Саранскойсэ Комсомолонь обкомонь кудосонть. Делегациясонть – од ломанть, кить кенерсть невтеме эсь пряст паро ёндо: тонавтнемасо, шкинемань-мезень тевсэ. Ламотне, монь ладсо, ульнесть велестэ.

Саранскойстэ ильтясть эйсэнек комсомолонь обкомсо важодицят, Московсо вастсть автобуссо. Тосо ульнинек аволь вейке чи. Удсинек «Россия» инжекудосо. Юткошканок арасель овсе. Московонть содавтомга усксесть эйсэнек содавикс таркатнева: Ленинэнь Мавзолеев, ВДНХ-в, эрьва кодамо музейга. Кувать якинек Якстере площадьганть. Ды вана сась шкась, зярдо совавтымизь СССР-нь Вооруженной Вийтнень Центральной музеев, косо сниминек Изнямонь Знамянть икеле. Минь пек талнынек. А стувтовить тень комсешка эскелькстнэ, конатнень теинек Изнямонь Знамянть икелев молемстэ. Марявсь тень, те Коцтонть эйстэ моли сеть солдаттнэнь лексемаст, кинь кедьсэ сон понгавтозель Берлинсэ Рейхстагонть вельксэс 1945 иень чадыковонь 30-це чистэ.

Секе музейсэнть вастовинек ды кортнинек войнань шкань зярыя содавикс ломань марто. Кудов туемадо икеле эрьвантень макссть якстере ланго папка, конань потсоль Изнямонь Знамянть икеле теезь фотографиясь. Потсо, лия лопанть лангсо, печатазь валт: «За большие успехи в социалистическом соревновании в честь 30-летия Победы в Великой Отечественной войне 1941−1945 гг., за самоотверженный труд, высокое качество работы, отличную учебу, активное научно-техническое творчество тов. Дулкина Раиса Борисовна сфотографирована у святыни советского народа – ЗНАМЕНИ ПОБЕДЫ».

Мон ванстан те фотографиянть кода сехте питней казненть, те шкас мельспаросо ледстнян васоло се читнень, зярдо якинек Московов Изнямонь Знамянть икеле снимамо.
Вана истя, Ине Изнямонь 30 иетнень тешкстамо иестэнть ютавтозель Весемасторонь од ломанень пелькстамо, конань эйсэ 30 тёжат изницятненень теезель истямо покш казне – снимазельть Изнямонь Знамянть икеле.


Изнямонь Знамясь – ютазь войнадонть сехте питней
ледстнема
Изнямонь Знамясь – Кутузовонь II степенень 150-це Идрицкой стрелковой дивизиянь знамясь, кона стявтозель 1945 иень чадыковонь 30-це чистэ Берлин ошсо Рейхстагонть пряс. Стявтыцятне – Якстере Армиянь солдаттнэ Алексей Берест, Михаил Егоров, Мелитон Кантария. Россиянь законодательствасо тешкстазь: «Изнямонь Знамясь – Ине Отечественной войнасо фашистской Германиянть лангсо советской раськенть ды Вооруженной Вийтнень изнямонь ледстнемань тешкс». Ванстови Россиянь Вооруженной Вийтнень Центральной Музейсэ.

Мейсэ явови Изнямонь Знамясь лиятнень эйстэ
Коцтось, кона кепедезель Берлинсэ Рейхстагонть пряс 1945 иень чадыковонь 30-це чистэ, лангс ваномс мейсэяк а явови лиятнень эйстэ. Сонзэ лангсо арасть мазыйстэ керьксазь сурепулот, арасть сырнень суресэ викшневкст. Тень таркас, бути варштамс пштистэ, редявить пулятнень ды осколкатнень эйстэ варинетне, конатне пандтнезь ёроков кедьсэ, ды вить ёно ало песэнть сезезь таркась, кона истя жо аредявиксстэ стазь. Сынь кортыть Берлинсэ меельце виевдеяк виев ды кежейдеяк кежей тюремадонть, зярдо минек солдаттнэ апак пеле каявсть Рейхстагонть лангс. Коцтонть эрявсь кепедемс ды стявтомс Рейхстагонь сехте вере тёкшонтень, мейсэ се войнантень путозель пе.

Раиса ДУЛКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».