Важное



Ютазь недлясто Мордовиянь оштнесэ, велетнесэ, школатнесэ, эйдень кужотнесэ ды лия таркатнесэ ютавтнесть вастовомат, конат алтазельть Авань чинтень. Истямо вастовома ютазь пецясто ульнесь Кочкурбуень Сурвелесэяк (Сабаевасо). Тосонь клубось се чистэнть пешкелесь ломанде, конатнень ютксольть седе ламотне – ават. Весе сынь – эйдень трицят. Эрьвась эйстэст содасы, мезе истямось эйкакшонь кастомась. Секс весе лембе валтнэ, гайтев моротне алтазельть сыненст.


Те карми мейле. Васня невтезель «Мамы» лем ало видеофильма, конасонть ёвтнемась моли седе, зяро вий авантень савкшны путомс, зяро веть печтямс апак удо, зяро талномат седей пачка ютавтомс эйкакшонь трямсто-кастомсто. Аватненень поздоровонь ёвтамсто тень лангс невтсь Сурвелень прявтось Л.И.Четайкингак. Сон тердинзе весень седе покш мель явомс шкинень аватненень, а стувтнемс сынст, лездамс тенст косо тевсэ, косо чевте валсо. Эрьва авантень те карми сехте покш ды питней казнекс.

Валтнэде мейле морот. Васенценть серьгедизь «Сурань зорюват» ансамблянь морыцятне. Эряви меремс, те морокурось Сурвелесэ чачсь 1954 иестэ. Се шкастонть саезь ламоксть полавтневсть эйсэнзэ морыцятне. Меельце иетнестэ сынь лотксесть марсевемеде. Тень редизь аволь ансяк велень эрицятне, сетнеяк, кить чачсть тесэ, ней эрить лия таркава. Чачома веленть ялатеке а стувтнить. Троицясто ды лия покш чистэ сакшныть кулозтнень лемест кундамо, тиринь кельсэ кортнеме, моронь кунсоломо. Весе тонадсть «Сурань зорюват» ансамблянь морыцятненень ды свал учость сынст морост. Ды зярдо сынь лоткасть лиснемеде, ламот натой якасть пеняцямо Кочкурбуень прявттнэнень. Келя, ков вантадо, мекс максынк ёмавтомс истямо паро ансамблянть? Улема, ломантнень тердемаст маризь. Курок «Сурань зорюват» ансамблясь пурназель одс. Мусть ярмакт ставтомс од оршамоткак. Ней эйсэнзэ кото морыцят, кото ават. Весе сынст улить эйкакшост ды аволь вейте-вейтень. Тень лангс апак вано, мукшныть шка яксемс морсемеяк. Те вастовомасонть сынь весенень казсть зярыя морот. Вейкесь эйстэст – эрзянь кельс Р.Жегалинань ютавтовт «Кортнек мартон, кортнек, авинем» морось. Моронть гайгемстэ проекторсо (сонзэ мельга, келя, якасть райцентрав) лиснесть авань чачот, кить эрясть Сурвелесэ ды трясть-кастсть ламо эйкакшт.

Парсте ладясть вайгелест «Виринея» ансамблясо морыцятненьгак, конатнень ютксо школасо тонавтыцят. Те морокурось чачсь зярыя иеде икеле ды кенерсь эсь лемензэ гайневтемс пек васолга.
Моронь казнесэ пурнавозтнень седеест эждизь тердезь инжетнеяк. Сынст ютксо Р.М.Пронькина ды В.И.Аверкина. Кавонест аватне чачсть Сурвелесэ, ловт, вишка пингестэ саезь морсесть ськамосткак, ансамблясояк. Нейгак, зярдо эйсэст иляст терде, весе тевест кадсызь, сыть эсест велень ломантнень марто вастовомо, моронь морамо.
Седеяк пек весень седеест токизь моротне, конатне гайгсть эйкакшонь вайгельсэ. Васня лиссть кадетэнь оршамосо зярыя цёрынеть. Мейле эрзянь оршамосо колмо тейтернеть ды цёрыне. Те – «Потешки» эйкакшонь ансамблясо морыцятне. «Вай, Ванине» моронть сынь морасть аволь ансяк вайгельсэст, мазылгавтсть эйсэнзэ музыкальной инструментэнь гайгемасо. Гармониясо седицясь – Татьяна Александровна Владимирова, кона тонавты морамо. Сон эсензэ лангс саинзе «Сурань зорюват» ансамблянь прявтонь тевтненьгак.

Клубось кадык уштневи, мероприятиянь ютавтома таркасонть ялатеке экшель. Ломантне аштесть лембе оршамост апак кайсе. Тень лангс апак вано, сонсь вастовомась ютась пек лембестэ, весень туртов кадсь ансяк паро ёжо ды валдо ледстнемат. Тень кис а кода а ёвтамс сюкпря сонзэ анокстыцятненень ды ютавтыцятненень. Васняяк А.В.Владимировнень, кона топавты Сурвелень клубонь прявтонь тевтнень. Кода кортыть тосонь эрицятне, сонзэ пингстэ клубсо эрямось неявиксстэ полавтовсь паро ёнов. Эрьва покш чистэ ютавтневить вастовомат, чокшнеть, вейсэнь промкст. А аштить ве ёно «Шумбрат, Мордовия!» фестиваленть эйстэяк. Тедеде Кочкурбуень концертсэнть комсь номертнэнь эйстэ вететне анокстазельть Сурвелень артисттнэнь вийсэ.

Паро тевтне редявикст. Те, видькстан, кецявты моньгак. Сурвелесэ чачозь, моньгак седеем ризны веленть сы шкань уцясканзо кувалма. Кода эрьва косо, сон ков ие чами, эрицятне аламолгадыть. Кармась стувтовомо тиринь келеськак. Паряк, истят вастовоматне весень оймесэ одов сыремтьсызь вечкемань толнэнть се келентень, кона максови тенек шкинень аванок ловсонзо марто?

Раиса ЩАНКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».