Четверг, июня 20, 2024
Важное

 

«ООО МАПО и К» ТНВ-сь – велень хозяйствань покш предприятиятнестэ вейкесь. Сонзэ юрс совить зярыя отделеният, конатне аштить Пятинасо, Вишка Березниксэ, Кочуновасо (Ромодановань район) ды Эрьмезёнкасо (Чаунзань район). Предприятиянть прявтсо ламо иетнень перть ашти тевень содыця, виев аграрникесь Николай Всеволодович Ютяев.



Неть читнестэ минь ульнинек товариществанть «Ремезёнское» ООО-сонть. Сонзэ вети «ООО МАПО и К» ТНВ-нь генеральной директоронь полавтыцясь Александр Борисович Ботайкин. Александр Борисович минек сеске саимизь ферматнень ёнов, косо мольсь виев робота – ванстома латкотнес пештявсь сенажось. Хозяйствасонть мольсь тикшетнень ледемась-пурнамось.


– Минек хозяйствасонть веиень тикшетне (те каргонь кснавось (вика) човор лия тикшетнень марто) теевить сенажокс ды пештявить латкотнес, косо сон вадрясто ванстови ламо шкань перть. Сенажось юты андомапелекс сюракшов ракшатненень. Неень шкасто ферматнесэ кирдевить малав 1100 ракшат, – корты Александр Ботайкин.

Кода жо тешкстызе «Ремезёнское» ООО-нь прявт агрономось Андрей Алексеевич Алексин, сенажонь ванстома латкось малав од, теезель ниле-вете иеде икеле. Тезэнь кельги малав 6 тёжат тоннат андомапель.
– Тезэнь арсеви пештямс весемезэ малав 5 тёжат тоннат. Минек хозяйствань сюракшов ракшатнень иень перть андоманть туртов те саты, – ёвтнесь Андрей Алексин.

Теке марто агрономось тешкстась, те иестэ Покш Эрьмезёнкань отделениянь паксятнесэ веиень тикшетнеде видезельть 340 гектарт. Зярыя чиде икеле тикшесь ледевсь, аламодо коштавтовсь, штобу летькесь улевель эрявикс, ды ней комбайнатне сонзэ теить сенажокс.
Кодамо лувсо те тевесь ветяви: ледезь тикшесь пурнави комбайнань чарыця барабанонтень, весе сон керсеви-вишкалгавтови ды тестэ жо ютыця коштонть вийсэ ёртови комбайнанть вакссо ардыця тракторонь эли машинань крандазс. Чинзэ перть истямо комбайнась пурны-теи аволь вейке сядот тоннат сенаж.


Хозяйствасонть улемстэ ванынек, кода паксясто ускозь сенажонть пештить латкотнес. Тесэ важодить техникань колмо единицат. Эряви меремс, тевесь а шожда ды ответственной. Эдь бути сенажонь пештямось-каямось тееви эрявикс аравтлувтнень апак кирде, ракшатне кадовить вачосто. Ледезь тикшесь зярыя шкань ютазь «яказеви» ды чапаськады. Секскак ансяк стака техникасо сон матрави ды калгодкстомтови.

– Течи тикшетнень ледемантень-ускомантень максозь весе вийтне. Сенажонь пештямо латкосонть важодить колмо тракторт, конатнень руль экшсэ эсь тевень содыця механизатортнэ Владимир Панков, Иван Солгунов ды Сергей Майоров. Усксить сенажонть кемгавтово автомашинат. Истя жо паксясо важодить кавто комбайнат ды тикшень пурнамка марто тракторт. Весе техникась эсенек, сон вадря, ламо мезе рамазь меельце иетнестэ, – тешксты хозяйствань агрономось. – Сенажонть вадрячизэ ламова ашти минек важодицятнень эйстэ. Эдь сонзэ анокстамонь технологиятнень акирдемадонть андомапелесь коли. Скалтнэ истямо коромдонть ярсамо а кармить. Секскак минек важодицятне шканть стяко а ёмавтнить. Свал бажить теемс весементь шкастонзо, вадрясто. Тень кисэ тенст покш сюкпря! Лангозост ули кемема.


Зярдо ульнинек хозяйствасонть, коромонь урядыця комбайнатне важодсть Покш Эрьмезёнка веледенть аволь васоло. Тесэ пурнасть меельце тикшенть.
Вейке агрегатонть руль экшсэ важодсь ёроков ды покш опыт марто комбайнёрось Николай Игоревич Ситников. Велень хозяйствасо сон важоди малав весе эрямонзо перть, эйкакш шкасто саезь.
Кода миненек ёвтнесь «ООО МАПО и К» ТНВ-нь прявтось Николай Всеволодович Ютяев, конань минь вастынек тесэ жо, паксясонть, Николай Ситников комбайнёрось хозяйствасонть роботы уш малав комсь иеть.

– Важодемадонть а пели, ёроков ды вадря специалист. Истя жо паро мирде ды тетя. Ситниковтнень касыть колмо эйкакшост, – мерсь Николай Ютяев. – Покш цёразо истя жо уш роботась минек хозяйствасонть тундонь ды кизэнь шкатнестэ техникумсо тонавтнемстэ. Лездась видемасояк-нуемасояк. Ней аноксты армияв туемантень. Истя жо Николай Игоревичень тетязояк тесэ механизаторокс роботы, столовойсэ пидицякс авазо. Тесэ лия малавиксэнзэяк. Можна меремс – цела династия.
Сенажонть усксемасо вейсэ лиятнень марто важодсь Александр Викторович Панков. Сонзэ техникась – КамАЗ автомашинась. «ООО МАПО и К» ТНВ-нь хозяйстватнесэ важоди истя жо уш ламо иеть. Тундонь видема шкастонть озакшны тракторс, види сюротнень. Кизна ды сёксня топавты водителень тевенть. Ускси сенаж, сюро, силос, ламбамо якстерькай.

– Мон монсь Ицялонь районсто. Тей эрьва чистэ ардтнян важодеме. Хозяйствасонть роботыть сазором ды ялаксом, сынь тей тердимизьгак. Сынь, варчия, вечкевсь тень. Ды уш зярыя иеть роботан, – корты Александр Панков.


Эштё вейке комбайнасонть важодсь Александр Николаевич Кемаев. Сон хозяйствасонть истя жо комсте ламо иеть.
– Александр Николаевич седе ламо важоди комбайнасо. Ансяк кодамо техникас иляк озавто, эрьванть марто муи кель-вал. Эсь тевенть вечксы ды важоди мелень путозь, – корты эсь важодицянть ланга Николай Ютяев.

Велень хозяйствасо юткошкат а эрсить. Тикшенть анокстамозо прядови, а марявияк, кода сы шка ушодомс сюротнень нуеманть.
– Сюротне пряст невтить а беряньстэ. Озимой товзюрось прянть пурны. Пек вадрясто касы кукурузась. Сон минек эрьва ие вадря. Кукурузанть кастоманзо коряс свал васенцетнень ютксотано. Андрей Алексин агрономось тень коряс важоди ламо, научной ёнкстнэнь тевс нолды. Од специалисттнэ неень технологиятнесэ чарькодить вадрясто. Важодемасо те эрявикс ёнкс, – кемекстась Н. В. Ютяев.


Минек справканок:
Андрей Алексин чачсь-кассь Чаунзань райононь Вишка Маризь велесэ. Школанть прядомадо мейле тонавтнеманзо поладызе Н. П. Огарёв лемсэ госуниверситетэнь Аграрной институтсо. Кочкизе агрономонь тевенть, истямо ульнесь бажамозо. Аграрной институтонть прядомадо мейле од цёрась сась роботамо «Ремезёнское» велень хозяйствань предприятияв. Теске тонавтнизе агрономонь тевентькак: вансь, кода касыть-кенерить сюротне, кода моли сюронь пурнамось, кодат ёнкст тесэ кирдевить. Ды ансяк весементь чарькодезь, кундась тевс. Ансяк аволь кувать савсь важодемс. Кавто иень ютазь саизь служамо армияв.
Служамодо мейле таго сась тей, Покш Эрьмезёнкав. Ладизь прявт агрономокс. Ней од специалистэсь – хозяйстванть нежезэ.

Юлия ЕРЕМИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».