Важное


Мордовиянь Прявтось В.Д.Волков вастневсь раськеютконь олимпиадань изницятнень марто ды казинзе сынст премиясо.

Те вастовомасонть истя жо ульнесть эйкакштнень тонавтыцяст ды тетяст-аваст. Самай сынст туртов алтазельть ламо сюкпрянь валт.
– Ёроков эйкакшонь республикань лицеень изнявкстнэ минек пек кецявтыть. Аволь стяко те тонавтнема таркась ашти Московонь ды Санкт-Петербургонь содавикс лицейтнень марто вейсэ. Течи минь бажатано совавтомс истямо тонавтома лув республикань лия школатнескак, – кортась Владимир Волков.
Сон пачтясь, сы иестэ Технопарксо панжови Волоконной оптикань инжиниринговой центра. Тосо пек эрявить превей, эсь тевень содыця од ломанть.

Ёроков эйкакшонь республикань лицеесь панжовсь малав кемень иеде икеле. Тесэ тонавтнить эсенек ёнксонь ды лия регионсто саезь эйкакштне. Мартост важодить виев тонавтыцят. Васенце выпусконь прядыцятне вуздо мейле састь важодеме лицеев. Саемга, физикань, астрономиянь педагогтне Алексей Шушпанов ды Ирина Безбородова.
Эрьва ие лицеень тонавтницятне невтить пряст весероссиянь ды масторлангонь олимпиадатнесэ ды саить изнямонь таркат. Кода ёвтнесть те вастовомасонть эйкакштне, пелькстамосонть сынь свал талныть. Ансяк весемесь ашти ломаненть эйстэ, кодамо сонзэ мелезэ, ули бажамозо важодемс эли арась.

– Ламо предметтнэнь коряс Россиянь сборноень командатне сехте виевть. Неть командатнень ютксо свал улить тынк лицеень тонавтницятне. Сюкпря ёвтан весенень, кие важоди эйкакштнень марто, кие лезды тенст. Тынк лицеесь вадря невтевкс лиятнень туртов, – кортась Санкт-Петербургонь государственной университетэнь тонавтыцясь Б.Б.Эскин.

Сулейман Казимов 2019 иестэ изнясь Астрономиянь коряс раськеютконь олимпиадасо (Румыния); лиссь призёрокс Астрономиянь ды астрофизикань коряс раськеютконь олимпиадасо (Венгрия); сиянь медаль сайсь Экспериментальной физикань коряс раськеютконь олимпиадасо (Беларусь).

Кирилл Хайдуков изнясь Астрономиянь коряс раськеютконь олимпиадасо (Румыния).

Руслан Антонов лиссь призёрокс Астрономиянь коряс Раськеютконь олимпиадасо (Румыния).

Алексей Кадыков лиссь призёрокс Астрономиянь ды астрофизикань коряс раськеютконь олимпиадасо (Венгрия); сайсь сиянь ды бронзань медальть Раськеютконь эштё кавто олимпиадасо.

Илья Просяной лиссь сиянь призёрокс Естественнонаучной раськеютконь олимпиадасо (Катар). Тонавтницятне казевсть 200 ды 300 тёжат целковоень премиясо.

Сынст тонавтыцяст казевсть «За личный вклад в развитие Республики Мордовия» Почётонь тешкссэ. Тетятне-аватне – Благодарностьсэ.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».