Воскресенье, июля 21, 2024
Важное

 

Отяжбуень Аловелесэ земской васенце школась панжозель 1880 иестэ. 1930-це иетнестэ ниле классонь начальной школанть таркас колхозонь од ломантнень кармасть тонавтомо сисем иеть.

1937 иестэ Аловелесэ панжовсь кемень иень школа, районсонть сон ульнесь средней учебной васенце заведениякс. Тей сакшность тонавтнеме эйкакшт маласо аштиця весе велетнестэ: Дюрькинасто, Манадышистэ, Паранеистэ, Сабанцелестэ, Таразбуестэ, Сырезьвелестэ ды Хмелевкасто. 1968 иестэ стявтозель школань од здания. Сонзэ строямонть-стявтоманть ветясь колхозонь председателесь А. А. Климбовский. Тедеде те школась тешксты 55 иень юбилеензэ.

– Аловелень средней школасо сехте ламо тонавтницят ульнесть ютазь пингень 70-це иетнестэ. Малав тёжа эйкакшт. Эрьва ие школанть прядсть сядодо ламо тонавтницят. Эрьва ульцясо важодсь начальной школа. Ней шкатне пек полавтовсть. Велетнесэ арасть эйкакшт, школатне пекставить. Течи школасонок тонавтнить 45 эйкакшт. Юткстост кементнень усксить шабра велетнестэ: 9 – Дюрькинасто, 1 – Мордовские Сыреси велестэ. 11-це классонть тедеде прядыть кото ломанть. 9-це классонть – вете, – ёвтни школань прявтось Раиса Николаевна Синькова.

2020 иестэ школасонть кармась важодеме «Точка роста» цифровой ды гуманитарной профилень образованиянь центрась. Сон панжовсь «Образование» национальной проектэнть лувсо. Вети эйсэнзэ Раиса Николаевна. Аловелень школань прядыцятне малав весе тукшныть тонавтнеме вузга. Школась совась программас, конань вельде 2025 иенть самс тесэ одс витневи-петневи латось. Тень умок учить тонавтыцятне ды тонавтницятне.

Р. Н. Синькова 1996 иестэ прядызе М. Е. Евсевьев лемсэ МГПИ-нь (ней – МГПУ) физико-математической факультетэнть. Сеске сась важодеме школав, кармась ветямо математика. 2011 иестэ ладязель учебно-воспитательной тевтнень коряс завучокс. 2015 иестэ саезь – школань прявт. Сон нейгак вети математика. Пек кецни, зярдо тонавтницянзо школанть прядомадо мейле кочкить математикань факультет.
Школасонть важодить кемзисемге тонавтыцят. Эрзянь келесь ды тиринь литературась ветявить Аловелень школасо эрьва классо – недлязонзо кавто част. Сонзэ ветить Татьяна Ивановна Захарова ды Татьяна Михайловна Козина.


– Монь авам, Мария Васильевна Майорова, малав 30 иеть важодсь теке жо школасонть, ветясь эрзянь кель. Ней пенсиясо. Сонзэ киява туинь монгак. Теде башка, бабань сазорозо, Елизавета Павловна Понетайкина, ульнесь тесэ тонавтыцякс. Покш классо тонавтнемстэ авам максыль тень ванномс 5-6-це классо тонавтницятнень тетрадест. Истя тензэ лездынь, – ледстни Татьяна Захарова.

Сон 2003 иестэ прядызе школанзо сиянь медаль марто. Мольсь тонавтнеме М. Е. Евсевьев лемсэ МГПИ-нь филологиянь факультетэв. Тейтерентень эзь эрявкшно лиятнень ладсо максомс экзамен. Тердизь собеседованияв, косо кевкстнесть эрзянь келень ды литературань весе программанть коряс. Вузсо теевсь содавиксэкс аванзо тонавтыцянть Р. С. Ширманкинань марто. Студенткакс улемстэ сон лиссь мирденень, чачтызе васенце эйкакшонть, секскак вузонть прядызе заочна.
2011 иестэ саезь кармась роботамо школасо. Васня ветясь эрзянь кель ды тиринь литература, мейле – рузонь кельгак. Чарькодеви, васенце шкастонть стакаль тензэ. Эрявсь сёрмадомс плант, анокстамс эрьва уроконтень, ламо ловномс, содамс весементь, мезе максат эйкакштненень. Седе тов тевесь тонадовсь ды тусь шождасто. Ней Татьяна Ивановна тонавты 5–11-це класстнэсэ тонавтницятнень. Тедеде классозо пряды 11-це класс, туить эсест покш киява.

Тонавтницянзо эрьва ие невтить пряст эрзянь келень ды литературань олимпиадатнесэ. Сайнить изнямонь таркат районсо ды республикань этаптнесэ. Саемга, Саша Шеянов лиснесь изницякс республикань олимпиадасонть, Олег Удалов лиссь литературань коряс призёрокс.
Апрельстэ Эрзянь келень чинтень (апрелень 16-це чи) Аловелень средней школасонть ютавтневить Эрзянь келень недлят. Молить панжадо урокт, ветявить классной част, ютавтовить артовксонь ды стихень ловномань пелькстамот. Истя жо тешкстыть Тиринь келень раськеютконь чинть (февралень 21-це чи). Эйкакштне мельспаросо сёрмадыть эрзянь кельсэ Тотальной диктантонть.


Паро мельсэ теевинек содавиксэкс англань келень тонавтыцянть Анна Васильевна Скворцовань марто. Сон тесэ важоди 42 иеть, трудонь ветеран, казезь «Почётный работник общего образования РФ» тешкссэ ды ламо лия казнесэ. Сонгак тонавтыцянь семиясто. Авазо, Антонина Тихоновна, ульнесь начальной классонь тонавтыцякс, мейле важодсь библиотекарекс. Тетязо роботась колхозсо полеводческой бригадань бригадирэкс, сон чавовсь 50 иесэ. Авазо ськамонзо трясь-кепедсь колмо эйкакшт.

Школанть прядомадо мейле Анна Васильевна мольсь тонавтнеме М. Е. Евсевьев лемсэ МГПИ-нь омбо масторонь келень факультетэв. Валонзо коряс, тов кучизе авазо. Пейдезь мерсь, бути кочкасак филологиянть, пек уш ламо тетрадть сави теть ванкшномс. Группаст виевель, вадряль, весе эсь ютковаст теевсть ялгакс ды те шкас кирдить ояксчи.
1980 иестэ, вузонть прядомадо мейле, кармась важодеме Аловелень школасо. Ней сон вети англань кель 8-11-це класстнэсэ. Лия коллегазо важоди вишка класстнэнь марто.

– Эйкакштне иеде иес полавтовить. Икелень шкане ульнесть седе виздицят ды чатьмоницят. Ней а пелить ёвтамс эсь мелест-арсемаст. Ды те монень пек вечкеви. Сынь – чевте седейть ды паронь арсицят. Мезе мерят ды кармавтат – свал тейсызь. Саемга, кода парсте анокстыть школань кенярксчить! Монсь важодинь комсь иеть организаторокс, секскак содан, кода а шожда ветямс те тевенть. Сюкпря ёвтавлинь коллективенек туртов. Раиса Николаевна эсь тевензэ парсте содыця, школань вадря прявт. Сон свал ашти кисэнек ды лезды, бути эряви, – корты тонавтыцясь.

2018 иестэ Анна Васильевна невтизе прянзо «Учитель года» райононь пелькстамосонть. Мелезэнзэ тусь варчамс виензэ те покш тевсэнть. Эйкакштнень марто сеске мусь кель-вал. Тонавтницятнень марто сон ютавтсь «Бессмертный полконь» коряс классонь час. Анна Васильевнань покштязо чавовсь Ине Отечественной войнасо. Теде кулясь сась 1945 иень маень 8-це чистэ. Омбоце чистэнть весе ломантнень ульнесь покш кеняркс – Ине Изнямо. Сынст кудосо жо – сельведть. Вана теде сон ёвтнесь, эйкакштненьгак энялдсь ёвтнемс эсест малавикстнэде.

Футболонь коряс масторлангонь чемпионатсо, конась ютась 2018 иестэ, А. В. Скворцова ульнесь волонтёрокс. Сонзэ ды республикань лия тонавтыцятнень сайнизь кельстэ кельс ютавтыцякс. Анна Васильевна понгсь важодеме аэропортов. Сон те шкас ледстни неть читнень, сынь кадовсть мельс-превс лембедеяк лембе ледстнемакс.

– Мелезэнь тусь кортнемс омбо масторонь инжетнень марто. Вейке англичанканть марто ламо мезде кортынек. Аэропортсо вастынек Мексикань, Япониянь инжетнень. Пек дивавтымизь Мексикасто сазь футболонь ваныцятне. Свал паро ёжосольть, мизолдсть, аштить-аштить – сыргить киштеме, малазост молить лиятнеяк, эсест масторонсетне ды весе вейсэ киштить. Кидеяк а виздить, истямо паро ёжост. Организациясь ульнесь пек вадря. Миненек макснесть экипировка. Мон васня кавтолдынь, молемс эли а молемс. Зяро кеняркс ульнесь ниле матчтнеде мейле! – ледстни Анна Васильевна.

Чемпионатсо волонтёрстванть кисэ сон казевсь РФ-нь Президентэнть пельде Благодарственной сёрмасо.
Те ломанесь – эрямонь вечкиця, сон зярдояк а ашти тевтеме, свал ломань ютксо. Анна Васильевна морси «Лисьмапря» Аловелень ансамблясо. Мирдезэ, Михаил Михайлович, вети школасо ОБЖ ды музыкань урокт, образованиянь коряс – музыкант. Ансамблясонть сон седи баянсо ды топавты художественной руководителень тевтнень. «Лисьмапрясо» морсить кото ават, весе пенсиясот, юткстост важодицясь ансяк Анна Васильевна. Нама, улить эрзянь мазый оршамопелест. Вастневить велень Культурань кудосо, косо ютавтнить репетицият. Велень кенярксчитнестэ ансамблясь свал морси, невти концертт. «Лисьмапря» ансамблясь морси эсест районсо, ардтнесть морамо Покш Игнатбуев Раськень Озксов, Саранскоевгак. Содыть ламо эрзянь морот. Куш кодамо шкане аватне мельспаросо пурнавить вейс. Анна Васильевна ёвты сюкпря тенст ды весе седейстэ – шнамонь валт. Алкукс, зярс улить истят ломанть, велесь эри.

Татьяна МАТОРКИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».