2020 иестэ покш витнемадо-петнемадо мейле панжовсь Кочкурбуень Сурвелень культурань кудось. Клубось умонь, сон стявтозель 1967 иестэ ды покш витнемат тосо вестькак арасельть.
Ней жо «Культура» национальной проектэнть вельде Культурань кудось прок одс теезь. Сон лиссь алкуксонь дворецэкс, кона мазылгавтызе веленть, кармась мельстуиця таркакс велень эрицятненень. Ней тесэ свал ютавтневить эрьва кодат вастовомат ды кенярксчить. Минь пачколинек инжекс Сурвелев ды ёвтнетяно тенк, кода полавтовсь велесэ культурань эрямось.
– Ломантне пек учость Культурань кудонь витнеманть. Сынь секе тев совсесть, ванность, кода моли покш витнемась-петнемась. Мейле, прядовома малав, натой, токшесть стенатнень, эзть кемеяк, кодамо мазычи кармась. Рамазель мебель, оборудования, музыкальной инструментт. Минек ней улить гитаранок, гармошканок, балалайканок, гуслянок, барабанонок. Ули эрявикс звуковой аппаратуранок. Залсо – лия, ушосо концертэнь ветямс – лия. Те: колонкат, микрофонт. Аппаратуранть марто важодить школань тонавтницятне, цёрынеть, сынст тенень тонавтызь районсо. Чарькодить, кода ды мезе.
Комсте ламо миллионт целковойть ютавтовсть витнемантень. Залонок покш, эйсэнзэ 100 чевте озамо таркат. Эрси, таркат весенень а сатыть, ломантне стядояк аштить. Эрьва кенярксчистэ ютавттано вастовомат. Районсто сакшныть морыцят. Кочкуровасто свал сакшны «Сударушка» ансамблясь. Тедеде Велень чинтень тердтнинек Мордовиянь государственной филармониянь морыцятнень Олеся ды Владимир Фоминтнэнь. Ней карматано учомост тагояк – сыть сольной концерт марто. Истя жо сакшнось «Вармава» ансамблясь. Свал паро мельсэ васттано «Ламзурь» фольклорной коллективенть, конань вети минек велесэ чачозесь Р. Б. Щанкина. Ушосо ули кизэнь эстраданок, лембе шкане кенярксчитне ды дискотекатне ютнить тосо, – ёвтни Культурань кудонь прявтось Елена Горбунова.
Кода панжовсь од клубось – эйкакштне тестэ а тукшныть. Кортыть: бути а пекставлизь, минь тесэ удовлинекак. Эйкакштнень туртов улить зярыя кружокт – «Умелые ручки», «Веселая кисточка». Сынь пек вечкить тейнеме мезеяк эсь кедьсэ. Васня сайсызь теевксэст кудосо невтемс, мейле кандсызь мекев клубов, косо сынь весе ванстовить. Кизна седеяк ламо эйкакшт. Сынст марто налксематне ютыть ушосо, косо стявтозь эйкакшонь площадка. Покштне пек уш вечкить налксеме бильярдсо. Тесэ эштё ули теннис, аэрохоккей, столь лангсо футбол. Аватне совсить библиотекав книгань ды журналонь ловномо.
Клубонь артисттнэнь туртов ставтозельть-рамазельть од оршамопельть. А вана Якшаматянь ды Ловняськень костюмт лездась рамамс те велесэнть чачозесь В. Н. Кияев.
Сурвелень Культурань кудонть юрсо важодить «Потешки» эйкакшонь ансамблясь (вети тонавтыцясь Л. Н. Нуштайкина), «Виринея» рузонь фольклорной ансамблясь, «Сурань зорюват» морамонь коллективесь, «Сурвеле» футболонь командась (вети Ю. П. Дадаев), ули «Азоравине» сыре ломанень клуб.
– Башка валт ёвтавлинь «Сурань зорюват» фольклорной ансамблядонть. Сон умонь. Морсить кото ават. Велень эрьва кенярксчисэ сынст морамось – алкуксонь казне. Сюкпря ёвтавлинь морыцянтень Елена Фроловна Акулькинанень. Мон свал тензэ пшкалян превс путома мельга, лезды, ёвтни. Умок тосо морси Валентина Ивановна Аверкина. Минек весе ломантне парт, эрязачи мартот, бути пшкадят лезкс мельга – лездыть, а туить ве ёнов. Парсте важодтяно школанть марто. Эйкакштнеяк мельспаросо лездыть. Эряви морамс эли ловномс стихотворения – паро мельсэ топавтсызь. Клубсонок ветявить ёжомарязь ловномань коряс урокт. Тов якицятнень эрьва ков тердтнян, лездыть эрьва мейсэ. Школасо роботы Михаил Григорьевич Миронов, сон сёрмады стихть, кенярксчитнесэ ловны эйсэст сцена лангсо, – ёвтни Е. Ф. Горбунова.
Клубсонть натой пурнасть кезэрень ули-паронь вишка музей. Сурвелень эрицятне кандсть тей ламо экспонатт. Ламо курмот-кармот пурнась Лидия Ивановна Аверкина. Вишка музейнесь ардтни эрьва кува, бути эряви молемс лия велень кенярксчив. Тесэ ламонень вечкевикс экспонатось – казезь самоварось, сон маштови, эйкакштне пек вечкить симеме эйстэнзэ чайде.
– Миненек алтасть каземс пивтемпарь. Умок бажинек кирдемс истямо экспонат. Маряви, овсе аволь умок эйсэнзэ пивтсть тетянок-аванок, сырькаенек – а уш минек эйкакштне тунь а содыть сондензэ. Сон тенст маряви тамашань тевекс. Экскурсиятнень ветян эрзянь кельсэ. Мейле ютавтса кортамом рузокс, кие эзь чарькоде. Свал кевкстнить, мезе те «коромыслась». Ведь мельгаяк мартонзо якинек. Варчизь тевсэяк, кандсть ведь. Эйкакштнень марто вадря важодемс, сынь бажить ламонь содамо. Весть ютавтынек мартост кшинь панемань коряс мастер-класс. Те ульнесь алкуксонь приключениякс. Молинек инжекс вейке кудос, косо эштё ули каштомо. Уштынек сонзэ, невтинек, кода паневи кшись, кода видестэ эрявить аравтнемс ухватсо цюгунтнэнь. Эйкакштненень пек вечкевсь. Ней ули мелем невтемс тенст, кода икеле чевсэ (лучина) валдомтсть кудопотмонть, кода те лавшо валдосонть ломантне пидесть-пансть ярсамопельть, викшнесть, кодасть, эрясть!
Тунда тешкстынек Эрзянь келень чинть. Сакшность аватне, кить ванстыть эрзянь авань оршамопельть. Сынь састь панарсо-руцясо, пулайсэ. Мейле оршневтинек эйкакштнень, невтинек, кода видестэ оршамс эрзянь костюмонть. Мерсть, пулаесь пек стака. Онкстызь, натой – 3,5 кг. Стака кандтнемс. А минь ёвтнинек, кода сырькаенек якасть эйсэст, паксясо роботасть. Свал пулай марто, сонтемензэ эзь мереве якамс, – пачтясь клубонь прявтось.
Сонсь Елена Фёдоровна чачсь Семилейсэ. Школанть прядомадо мейле тонавтнесь Саранскоень 22 № училищасо микшницякс. Лиссь мирденень Сурвелев. Заочна прядызе Н. П. Огарёв лемсэ МГУ-нь филологиянь факультетэнть. Важодсь оймсемань базасо, лавкасо. Седе тов тердизь роботамо клубов. Васня ветясь эйкакштненень кружокт. Мейле ладизь культурань кудонь прявтокс.
– Кенкшенек панжадот валскестэ саезь чокшнес. Пецясто-субутасто – чокшне ланга од ломантнень туртов киштемкат. Минь свал бажатано пурнамс ломантнень вейс, ютавтомс тенст мельстуиця вастовомат. Кадык седеест эжи ды ёжост паролгады. Кенярксчитнеде яволявтоматнень шкадо икеле сёрмадтано интернетсэ ды понгавтнетяно лавкань кенкштнес, – мерсь Елена Горбунова.
А вана Наталья Фёдоровна Бигачёва эйкакштнень туртов вети илёвсто кодамонь кружок. Вейсэ сынь тейнить паргинеть, вазат, кандтнемапельть (подност), кшинь путомкат (хлебницат). Клубсонть ули нупалест, козо пурнавкшныть ды авась тонавты сынст те аволь шожда тевентень. Наталья Фёдоровна 15 иеть важодсь Сурвелень лесничествасо. Тундосто саезь сёксес важодсь вирьсэ, озавтсть-кастсть ды вансть питомниксэ чувтынетнень мельга. Кирдсть калень плантацият. Тельня важодсь илёвсто кодамонь цех. Илёвтнеде анокстасть ламо, покш чансо лакавтылизь кавто часонь перть, таргилизь ды сеске ушодыльть кодамо. Истят илёвтне пек менчевицят, кодавить парсте. Сынь эрьва чистэ кодасть пангонь кочкамс паргот. Вейке ломанентень чизэнзэ эрявсь кодамс 2,5 паргот. Валонзо коряс, аволь эрьва ломаненть лиси тевезэ, аволь эрьвась тонады тенень. Мейле те производствась лепамсь.
Зярдо аванть тердизь важодеме эйкакштнень марто, сон мельспаросо сась. Малав эрьва ие важодеманзо невтневить «Шумбрат, Мордовия!» раськень творчествань фестивальсэ. Кодазь паргинензэ мазычисэст дивавтыть сельме. Калень тюсось, теке мерят, артозь, ансяк сон алкуксонь, чувтонть эсензэ тюсозо.
(Сур веледенть лия материалтнэнь ловнодо сыця номертнэсэ)
Татьяна Маторкина