Саранскойсэ ютась «ИНЕНАРМУНЬ» конкурсось
Недлячинь чокшнесь Нацтеатрасо ульнесь «пси». Минек республикасо васенцеде ютавтовсь «Иненармунь» раськеютконь мазычинь пелькстамось, косо эсь ёрокчист невтизь 18 иестэ саезь 35 иес эрзянь ды мокшонь кемголмово тейтерть. Мария Шумкина ды Мария Маршакова састь Московсто. Марина Несяева пачкодсь Пензасто, кевкстеманок лангс, мезе пачтизе те пелькстамонтень, мерсь: «Мон бажан невтемс минек кезэрень культуранок ды мазый эрзянь келенек».
Лиятне – весе Мордовиянь районтнэстэ. Эйстэст ламотне важодить культурасо ды СМИ-тнесэ. Кавто ковонь перть анокстамось ды кавто чинь (пеця ды субута) мастер-класстнэ (хореографиянь, сцена лангсо кортамонь ды актёронь ёрокчинь) лездасть тейтертненень путомс колмо номерт: эсь прянь невтемась, творческой номер ды раськень оршамонь невтемась. Хореографиянь мастер-классонть ютавтызе Ольга Котт, конкурсонь режиссёрось Дмитрий Крюков ёвтнинзе актёрской мастерствань салавачитнень. Пелькстамонь анокстыцятне: «Ассоциация мокшанских женщин «Юрхтава» ды МР-нь Культурань, раськень политикань ды архивень тевень министерствась.
«Иненармунь» пелькстамодонть икеле минь вастневинек раськень театрань ды «Юрхтавань» прявтонть Светлана Дорогайкина марто, кона ёвтнизе, кода весемесь ушодовсь.
– Светлана Ивановна, косто сась истямо мелесь – невтемс эрзянь ды мокшонь тейтертнень мазычист?
– Истямо пелькстамо минек республикасо икеле эзь ютавтневе. Тейтеренек жо пек мазыйть. Ды, штобу кепедемс минек тейтертнень мельёжонть, тешкстамс, кодат сынь ёроковт ды лиятнеде а седе берянть, арсезельгак истямо конкурсось. Изницятне казевсть питней казнесэ. Проектэсь мольсь колмо чить, конань пингстэ сынь теевсть содавиксэкс вейке-омбоце марто, кортнесть тиринь кельсэ, кармасть седе ламо содамо эсь культурадонть. Истя меремс, тесэ теезель ялгаксчинь тарка, косо а эряви виздемс эсь прядонть (мекс мон эрзян эли мокшан) ды тиринь кельденть. Кадык весе содыть: минек тейтертне пек мазыйть, превейть, ёроковт!
Те пелькстамось эсенек туртовгак васенце эскелькс, а содатано, кода-мезе лиси, ансяк минь путтано весе виенек сень туртов, штобу сы иестэ улевельть седеяк ламо пелькстыцят.
Минь кортнинек вейке участницанть – Ольга Шабанова эрзянь тейтеренть марто, кона важоди журналистэкс «Вайгель» радиосо ды «Известия Мордовии» газетасо. Сонзэ чачома тарказо – Кочкурбуень Семилей велесь.
– Ольга, кода тон понгить те проектэнтень?
– Неия афишанть, конась путозель «Юрхтавань» вейсэндявксонь лопасо, арсезевинь, минек истямо арасель зярдояк, ютавтови васенцеде. Мерян, зярс аволь «сырян», эряви эсь прянть варчамс. Эйсэнзэ ёрокчинь невтемга эрявсь кучомс видеозаявка, косо колмо минутань перть эрявсь ёвтнемс эседеть ды эрявсь кучомс зняро жо шкань перть творческой номер. Мон кучинь кавто видеот, васенцесэнть эрзянь оршамосо ёвтнинь эсь прям ланга, омбоцесэнть – панинь панжакай. Теде мейле тердимизь вастовомас.
Оксана Белкина, Нацтеатрань литературно-драматургической пельксэнть прявтось ды «Юрхтавас» совицясь, кона ульнесь тейтертнень марто весе колмо читнень перть, пелькстамонь шкасто жо ульнесь ГТРК-нь журналистэнть Александр Данильчев марто ветицякс, ёвтнесь:
– Истямо конкурс умок бажасть теемс, саемга, ули «Татар кызы» – татаронь тейтерень конкурс. Ды мекс бу а теемс эрзянь ды мокшонь тейтертнененьгак? Зярдо ульнинь «Равось – ояксчинь лей» экспедициясонть, культурань, раськень политикань ды архивень тевень министрась Светлана Никитовна Баулина ёвтась истямо мель – ютавтомс мазычинь пелькстамо аволь ансяк Мордовиянь тейтертненень, лия региононсетнененьгак. Ды тень ютавтомга сон пшкадсь минек «Юрхтава» ассоциациянтень, конань прявтсо Светлана Ивановна Дорогайкина. Нама, «Юрхтавась» паро мельсэ кундась те тевентень.
Ёвтнетяно те пелькстамонь кой-кона тейтертнеде. Мария Феоктистова – рузонь драмань театрань артистка. 2021 иестэ прядызе Н.П. Огарёв лемсэ МГУ-нь Национальной культурань институтонть «Руководитель любительского творческого коллектива, преподаватель» специальностенть коряс. Вишка пингестэ саезь ульнесь мелезэ сюлмамс эрямонзо театранть марто. Сёрмады валморот, вечки викшнеме, ловномо ды… футболсо налксеме. Кода тесэ а тешкстамс: эрзянь тейтертне аволь ансяк мазыйть ды ёроковт, истя жо виевтькак! Мария чачсь Отяжбуень Мордовские Дубровки (Пумбра) велесэ.
Анастасия Зотова – ошонь Центральной библиотекасо важодиця. Чачсь Дубёнкань буень Кенде велесэ. Юткошкасто вечки панеме прякат-сюкорот семиянзо туртов. Арты номерэнь коряс картинат, вечки морамо, музыкань кунсоломо. «Мон арсинь невтемс эсь прям «Иненармунь» пелькстамосонть, секс мекс свал аштян каштанчисэ эсь тиринь ёнксом коензэ-кирданзо кувалма. Кенярдан – мон эрзя ды покш мельспаросо кортан эсь тиринь кельсэ», – ёвтнесь Анастасия.
Алена Маскаева – М. Е. Евсевьев лемсэ МГПУ-нь филологиянь факультетэнь студентка. Покш мель яви наукантень, спортонтень. Пелькстамосонть ульнесь мелезэ невтемс минек койтнень, культуранть ды ваномс, мезе истямось мазычинь ды шкинемань конкурсось.
Мария Майорова – «Вармава» фольклорной ансамблянь солисткась чачсь Чаунзань районсо. Вишка пингестэ саезь вечки пурнамо кезэрень шкань кедьёнкст, морсесь бабанзо ды тетянзо марто эрзянь морот. Те вечкемась эзь юта стяко: «Вармава» ансамблянть юрсо Мария панжсь этнографиянь музей! Юткошкасто вечки тортонь панеме. «Пек вечкса эсень тиринь мастором! Важодян сень кис, кадык седе ламо ломанть кармить содамо эсь ундокстост ды культурадост», – кортась тейтересь.
Пелькстамонть шкасто номертнэнь юткова сцена лангс лиснесть тейтертнень мелест кепедеме минек цёратне. Неть – Артём Мамаев, Сергей Фудин ды Андрей Бочканов содавикс морыцятне, конат алтызь эсь морост тейтертненень. Меельцекс светэнь шоу марто эсь ёрокчист невтизь Пензань барабанщиктне.
Жюрисэнть ульнесть истя жо содавикс ломанть. Неть – Равчирень финно-угрань раськень культуратнень центрань исполнительной директорось ды «Мерема» ансамблянь прявтось Екатерина Модина; фэшион стилистэсь, Moon модельной агентствань арт-директорось Юлия Бондарь (Нижний Новгород), кона тонавтсь тейтертнень мазыйстэ якамо сцена ланга оршамонь невтемстэ ды пелькстамонть молемстэ ульнесь жюринь прявтокс; Степан Эрьзя лемсэ музеень декоративно-прикладной творчествань ды искусствань отделэнь ветицясь Наталья Челмакина.
Тейтертне невтизь эсь ёрокчист киштемасо, морамосо, валморонь ловномасо. Монень, те статьянть сёрмадыцянтень, мельспароль, што «Набой авадо» валмором ёвтнизе Ольга Шабанова. Эрьва тейтересь мазыйстэ ды вадрясто невтизе эсь прянзо. Ансяк эрьва пелькстамосо эрсить изницяткак.
Истя, Гран-прись сатотсь Кристина Масенинанень, кона важоди раськень театрасо ды а умок налксизе Михаил Девятаев Героенть нинзэ од шкасто. Кристина чачсь Рузаевкань райононь Левжа велесэ.
Васенце таркась максозель Мария Шумкинанень, Торбеевань тейтерентень, «Эряма» ансамблянь солисткантень. Омбоцесь сатотсь Алена Маскаеванень ды колмоцесь – Светлана Навратованень, Рузаевкань «Тяштеня» культурань куросо тонавтыцянтень.
А вана культурань, раськень политикань ды архивень тевень министранть Светлана Баулинань пельде апак учонь казнекс кармась весе тейтертнень «Равось – ояксчинь лей» сы иень этноэкспедицияс тердемась.
Пелькстамось прядовсь, ансяк эйстэдензэ кадовсь истямо тансть ды валдо, конась уш нейке кармавты учомо сы иенть. Истя домкасто келесь ды культурась эзь невтеве вейкеяк пелькстамосо! Арсетяно те тевентень ламо иеть! А стяко кортыть – мазычись идесы мирэнть!
Марина Агафонова