Юлия Адушкинань содасызь кода Мордовиянь СВО-нь волонтёронть. Ансяк колмо эйдень триця авась кенери эрьва ков. Сон содавикс блогер, pr-менеджер, интерьерэнь дизайнер, общественной деятель. СВО-нть ушодовомсто саезь пурнась «Zа наших» гуманитарной лезксэнь группа, конань лемс ёвтыть ламодояк ламо сюкпрят минек военнойтне.
Минь вастовкшнынек Юлия Александровна марто ды кортнинек сонзэ покш тевденть.
– Юлия Александровна, инескеть, ёвтынк, мезе эйсэнк кармавты СВО-нь участниктненень лездамо?
– Минек масторонь историясь сеедьстэ печти пек ламо стакачить. Ды сынст изнямс лездыть ломантнень вейсэндявомась, вейке-вейкенень лездамось. Те пек эрявикс тев, теньсэ минек ламо раськень масторонок виезэ. Неень шкасто, зярдо эйсэнек лепштить зярыя омбо масторт, Россиясо эрицятненень эряви вейсэндявомс ды улемс кеме пирявксокс тиринь масторонтень, лездамс солдаттнэнень фронтсо, конат тюрить минек питнейчитнень кис. Тылэнть васенце тевезэ – лездамс фронтонтень. Цёратне толонть потсо эрямонь апак вансто ветить стака тюрема сэтьмечинек ванстомга. Ды секскак эряви эрьва ладсо лездамс тенст, илязо синдеве кеме оймест боень ветямсто. Кадык сынь марить тиринь кудонть лембензэ эрьва сёрмасо, валсо, тевсэ. Ды бути сави – лездамс шождалгавтомс боевой задачатнень топавтомаст.
– Кода умок теевсь «Zа наших» гуманитарной лезксэнь группась?
– Гуманитарной лезксэнь минек группась вана уш кемголмово ковонь перть лезды военнойтненень ды сынст семиятненень. Сыненст пельденек кучови кода материальной, истя жо психологической лезкс. Минь сынст туртов, кода мерить, социальной координаторт. Ды кадык аволь покш группанокак, весемезэ 4500 ломанть, ялатеке топавттано покш важодема. Весемесь ушодовсь истя. Монень пшкадсть зярыя предпринимательть. Васняяк лезкс максынек Мордовиянь вейке спецподразделениянтень. Мейле кармасть эрьва ёндо сакшномо заявкат. Сюлмавинек Ульяновск марто. Истя стамбаркине кармась касомо группанок.
– Юлия Александровна, кодамо лезкс максы группанк фронтонтень?
– Те шкань перть максозель гуманитарной лезкс малав 17 миллионс. Кодазельть 480 кекшемань алтымат (сети). Бути кие кодась эйсэст, содасы, кодамо те а шожда тевесь. Валынек ды пачтинек окопонь 1000 штатолт. Кучинек зярыя покш техникаяк. Теде башка, тейтяно куроксто анокставиця ямт, «коське душт», конат лездыть кирдемс рунгонть ваньксчисэ.
– Истямо покш тевентень эрявить ламо кедть. Кие тенк лезды?
– Минь пшкалетяно од ломантненень. Лездыть педагогической университетэнь студенттнэ, эрьва кодамо спортивной клубонь спортсментнэ, лиясто пачколить эйкакшост марто цела семият. Муеви тев эрьванень. Важодемстэ кортнетяно эрямодонть, фронтонь кулятнеде, ледстнетяно минек масторонь историянть. Те тевесь – апокш невтема, кода кастомс од ломантнень патриотической лувсо. Кода колмо эйдень ава, ёвтавлинь: мезе бу минь аволинек бажа путомс эйкакштнень превс, ялатеке сехте паро воспитаниясь – невтемс пример эсеть тевтнесэ, аволь валтнэсэ.
– Мезе кортыть СВО-нь участниктне тынк тевденк?
– Ловт, эрьва чи тень сакшныть седейстокиця сёрмат. Лиясто, келя, допрок арасть вийть молемс икелев, ды тесэ виень максыцякс ды мелень кепедицякс эрси тиринь ёнкссто кучовксось (посылка). Ды тесэ сы тенст чарькодема, кода пек вечксызь тиринь масторост. Ламот видькстыть: икелев эзть путо питне тиринь ёнксонтень, а тесэ, эйстэдензэ васоло, эрси истя мельспаро марямс эрзянь келенть. Содавиксэкс теевемадо мейле солдаттнэ малавгадыть, седейга кортнить вейкест-вейкест марто. Покш мелест улемс вейсэ эсь раськень ломань марто. Кучнетяно тиринь кельсэ сёрмат. Пек ламо кевкстнить тиринь ёнксонь символ марто кедьёнкст, чакшкеть, флажокт ды седе тов. Секскак эрьва региононтень эряви виевгавтомс национальной ёжомарямонть, а стувтнемс койтнень-кирдатнень ды тонавтнемс тиринь кельтнень.
– Юлия Александровна, тынь сеть блогертнэстэ вейкесь, кона а визди эсь эрзянь раськеденть, невти блогсонть тиринь келенть мазычинзэ ды уш зярыя иень перть лезды «Эрзянь правда» газетантень сёрмадстома шкасто. Кода тень лангс ваныть тынк сёрмадстыцянк?
– Пек парсте вастыть неть посттнэнь. Зяро лембе ёвтнемат ды ледстнемат сыть сёрмадстыцятнень пельде! Сехте пек, бути монгак ёвтнян мезеяк эсь велень тевтнеде, атявтом-ававтом Орданьбуень Чукало велестэ, тетям-авам – Отяжелень Ламбаськестэ. Минек покш семиянок, ламо кудоютконь тевенек, секскак свал ули мезде ёвтнемс…
Ризнэвти, ламо ёмавтынек. Ламотне, лия регионсо эрямсто, сёрмадыть, кодамо покш мельспаро кортамс тиринь кельсэ, ледстямс сонзэ, эдь апак кортне келесь стувтови. Шкань ютазь чарькодеви, кодамо те питнейчи – содамс ды кортамс эсь кельсэ, конасо кортнесть покштянок-бабанок. А ней, секень вант, сынь туить ды мартост сайсызь келентькак… Секскак эряви сонзэ ванстомс. Икеле ламот виздсть ломань ютксо кортнемс эсь кельсэст, а ней, мекевлангт, бажить тонавтнемс сонзэ ды кортамс эйсэнзэ. Те кенярдовты!
– Сюконятано тенк лембе кортамонть кис!
Марина Агафонова