Покш Игнатбуень «Толнэ» ансамблясь пурнавсь аволь пек умок – 2018 иестэ. Тесэ морсить кото авинеть. Весе сынь пек вечкить моротнень, эрямонть, ломантнень. Эрьва концертсэ казить ваныцятненень седейлембест, паролгавтыть ёжо. Сынст репертуарсо рузонь, эрзянь морот, улить рузонь содавикс морот, конат ютавтозь эрзянь кельс. Сынсь морсить, киштить, ютавтыть мастер-класст, путнить театрализованной невтемат.
Вети ансамблянть художественной руководителесь Ольга Михайловна Куманёва. Мартонзо вейсэ морсить Людмила Ивановна Ендолова, Елена Анатольевна Кутяйкина, Наталья Валерьевна Темасова, Галина Григорьевна Горина, Татьяна Михайловна Асманкина. Сынтемест а ютакшны вейкеяк концерт. Аватне свал мельспаросо ардыть морамо республикань покш читнес: Раськень Озксов, Акша Келув, Сабантуев, Кургоняв. Оршамопелест эрьва кодат: стазь эрзянь ды рузонь костюмт. «Толнэденть» башка, морсить райононь Культурань кудонть юрсо лия ансамблятнесэяк, сынсь ветить башка коллективть, важодить од морыцятнень марто.
– Мон чачинь Покш Игнатбуень Киржеманы велесэ. Школадо мейле молинь тонавтнеме Орданьбуень культпросветучилищав. Прядыя дирижёронь-хоронь отделениянть. 1983 иестэ саезь карминь важодеме Киржеманонь Культурань кудосо художественной руководителекс. Сисем иень ютазь ладимизь клубонь прявтокс. 2010 иес роботынь те таркасонть. 2017 иестэ саезь важодян Покш Игнатовань Культурань кудосо, эрьва чи тей ардтнян. Культурась – те весе монь эрямом. Ледстнян, вишкине ульнинь, кармавтылимизь весень икеле морамо. Молинь школав ды тонавтнемань весе иетнень перть морсинь. Ды кода лиякс? Мазый ды паро вайгель марто ульнесть весе малавиксэнь. Бабань-сырькаень пельде саинь ламо морот. Сехте пек мелезэнь тукшны фольклорось, – ёвтнесь Л. И. Ендолова.
Е. А. Кутяйкина прядызе Н. П. Огарёв лемсэ МГУ-нь географиянь факультетэнть. Апак учне понгсь культурань сферантень ды теде овсе а янкси. Сон муизе прянзо морамосонть. Культурань кудонть юрсо вети автоклубонть. Артисттнэнь марто ардтнить райононь велетнева, косо уш арасть клубт, кенярксчитнестэ ютавтыть концертт. Велесэ сыре ломантненень молемс а ков ды сыненст истят вастовоматне кандыть покш кеняркс.
– Культурань кудонок ней покш, одс витнезь, ули эрявикс аппаратура. Кецятано, зярдо концертсэ залонок пешксе. Ваныцянок эйкакшткак, сыре ломантькак. Важодеме якатано теке кенярксчис. Ды те аволь чаво валт, – кортыть аватне.
Наталья Темасова чачсь теке райононь Красная Нива велесэ. Школаст ульнесь ниле иень. Седе тов кармась тонавтнеме Покш Игнатовасо. Валонзо коряс, сон касськак Культурань кудонь сценанть лангсо. Морамо кармась вишка шкасто саезь. Кортамояк паро ладсо эзь машто, а уш морыль! Эряви меремс, весе семияст морсиця. Аванзо ёндо ды тетянзо ёндо весе мазый вайгель мартот. Сон зярдояк эзь пеле сценадо, школань кенярксчитнесэ свал морсесь, мейле райононь Культурань кудось кармась тиринь таркакс. 9-це классонь прядомадо мейле Наталья мольсь тонавтнеме Л. П. Кирюков лемсэ музыкальной училищав. Понгсь содавикс ды пек вадря педагогонть Раиса Семёновна Анисимовань кедьс. Прядызе академической морамонь отделениянть. Седе тов тонавтнеманть поладызе Тольяттинь консерваториясо.
– Мон тонавтнинь профессоронть С. Н. Варламовань кедьсэ. Вете иетне ульнесть сехте валдо ды мельстуиця шкакс. Минь маринек прянок аволь тонавтнемань таркасо, теке мерят, вейсэнь семиясо. Арасельть кодаткак пелькстамот, сельмень сявадомат, апаркстомат. Весе бажасть лездамс вейке-вейкень туртов валсо ды тевсэ. А содан, улить-арасть косояк эштё истят тонавтыцят. Тонавтнемань прядовома малав сынь пек ризнэсть туеманок коряс. Кортасть кадовомс важодеме консерваторияс, тосо ули оперань студия. Ансяк эрьванть юткстонок ульнесть эсензэ мелензэ-бажамонзо. Мон лисинь мирденень, ансяк прядыя консерваториянть – чачсь эйкакшом, – ёвтни Наталья.
Мирдензэ марто сынь содасть вейкест-вейкест эйкакш пингестэ саезь, тонавтнесть параллельной классо. Тейтеренть ды цёранть тетяст-аваст Шмакалинтнэ ды Темасовтне истя жо тонавтнесть вейсэ, ульнесть паро ялгакс. Одтнэ кувать вастневсть. Эзинзе тандавто сеяк, пек васолольть вейке-вейкеде. Наталья – Тольяттисэ, вечкевиксэзэ тонавтнесь Московонь В.П. Горячкин лемсэ агроинженерной университетсэ. Каникулатнестэ ды кувака оймсема читнестэ капшасть самс велев, косо вастовкшность.
Тейтерненстэнь топодсть ансяк кавто ковт, кода Наталья кармась роботамо райононь Культурань кудосо хормейстерэкс. Эйдензэ путылизе лавсес – ды мартонзо концертэв Саранскоев. Теке таркасонть роботы нейгак. Морси ськамонзо ды «Толнэсэ», вети «Карамель» эйкакшонь коллектив, важоди од морыцятнень марто.
– «Карамель» ансамблясонть сисем эйкакшт. Сынь кармасть сакшномо тень 4-5 иесэ, ней тенст 9-10 иеть. Тесэ Василиса тейтеремгак. Эрьва концертс анокстатано од номер. Свал эйсэст тонавтан: илядо тално ды пеле, вечкеде сценанть, вечкеде ваныцятнень ды сынь пандсызь паронк. Се лембесь, конань макссынк залов – велявты тенк мекев. Аштян кувалмаст каштанчисэ. Сынь лиснесть изницякс «Весенняя капель» пелькстамосо, конась ютась Ульяновскойсэ.
Колмо морыцятнень марто важодян башка, сынь – ськамост морыцят (солистт). Ульяна Мамаевань паро, шожда, ванькс, сэрей вайгелезэ. Сонзэ эйсэ неян эсь прям. Арсян, седе тов морамонь тевсэнть сонзэ учить покш изнявкст. Бажан тензэ лездамс, кемемс эсь вийтнес ды мездеяк апак пеле молемс икелев. Морамосонть улить ламо салавачить-нюанст, те – техникась, вайгелень максомась. Свал тешкстаса, мезе ульнесь а истя, ды шнаса, мезесь теезь парсте, – ёвтни Наталья Валерьевна.
Сонзэ пельде морамонь тевентень истя жо тонавтнить кавто племянницанзо, сазоронзо эйкакштне: София ды Дарья Лисенковатне. София – лавшо шумбрачи марто эйкакш, ней уш тонавтни 11-це классо. Сон морси, яви мель спортонтень, тейни сапонь. Эрьва ие невтни прянзо «Вместе мы сможем больше» художественной творчествань республикань инклюзивной фестивальсэ. Кавксть якась морамо Санкт-Петербургов, косо ютакшны «Шаг навстречу» лавшо шумбрачи марто эйкакштнень раськеютконь фестивалесь. Сон моли недлянь перть. Участниктне питневтеме якить музейга, театрава, экскурсиява.
Дарья сазорказо уш 2,5 иесэ васенцеде лиссь сцена лангс «Шумбрат, Мордовия!» фестивальсэ. Ды те шкас вечксы сценанть, моротнень, ваныцятнень. Мади удомо ды сыргозияк моро марто. Сон ламо мезе саи Наталья патянзо пельде, кунсолы, тонавтни. А пели покш сценадо, мекевлангт, пештяви лембе ёжодо.
Н. В. Темасовань морыцянзо аволь весть лиснесть изницякс республикань, весероссиянь ды раськеютконь морамонь пелькстамотнесэ.
– Ёроков эйкакштнеде ламо. Ансяк мартост эряви ламо важодемс, путомс ойметь, виеть. Эйкакштненень жо эряви цидярдомачи. Вейке чис покш изнявкст а саят. Эрьва изнявксось – те ламонь шкань перть важодема. Морамонь ёрокчинть свал эряви кастомс, – корты Наталья.
Сонсь Наталья Темасова ламоксть лиснесь лауреатокс морамонь покш конкурссо. Морсесь «Вишнёвая метель» народной моронь весероссиянь конкурссо (конась алтазель Людмила Зыкинань ледстнемга), «Таланты Евразии» пелькстамосо. Вана нейгак, «Сурский рубеж» военно-патриотической творчествань республикань фестивальсэ лиссь 1-це степенень лауреатокс. Сон морси советской шкань, неень шкань эстрадань морот, операт, вечки романст. Кочки морот, конат токшить ойменть. Васня токасы эсензэ, мейле – ваныцятнень. Сцена лангсо морамодо икеле те эли тона моронть, кода кортыть, «эрясы, арсесы, марясы». Ансяк мейле лиси мартонзо ломань икелев.
– Важодемам ули, сон мельстуиця ды пек вечкевикс, те – весе эрямом. Сюкпря семиям туртов, конась чарькоди эйсэнь, лезды. Зярдо пурнавтано вейс – свал моратано. Те ладявсь монь эйкакш пингестэ саезь ды кадык карми седе товгак, – тешкстызе Наталья Валерьевна.
Татьяна Маторкина