Ханты-Мансийскойсэ прядовсь «Мисс студенчества Финно-Угрии – 2023» раськеютконь X-це пелькстамось. Эйсэнзэ пелькстасть студенткатне сеть вузтнэстэ, конатне совить Финнэнь-угрань университеттнэнь ассоциациянтень.
Изнямонть кис пелькстасть Югрань, Коми Республикань, Ямалонь, Удмуртиянь, Мордовиянь ды Марий Элэнь эсест регионсо кочкамонь туртнэсэ изницятне. Эряви тешкстамс, тейтертнестэ эрьвась бажась аволь ансяк невтемс эсь прянть, истя жо невтемс эсь тиринь раськензэ койтнень-кирдатнень, историянть, культуранть.
Колмо чинь перть пелькстамотнеде мейле «Мисс студенчества Финно-Угрии – 2023» лемесь максозель Н. П. Огарёв лемсэ МГУ-нь студенткантень Полина Антонованень. А вана М. Е. Евсевьев лемсэ МГПУ-нь студенткась Алёна Маскаева саизе «Мисс артистичность» лементь.
Полина Антонова тонавтни Н.П. Огарёв лемсэ МГУ-нь Национальной культурань институтсо, хореографиянь отделениясо. Кишти неень шкань «S.mail» ды «Рукава» раськень киштемань студенческой коллективтнесэ, конат аволь весть сайнесть изнямонь таркат весероссиянь ды раськеютконь пелькстамотнесэ. Теде башка, сон вети Студсоветэнь культурно-массовой секторонть ды тиринь вузсонзо аноксты творческой пелькстамот.
Ёвтатано поздоровт Полинанень ды Алёнанень!