Декабрянь 15-це чистэ Мордовиянь раськень драматической театрасо ютавтовсь кенярксчинь мероприятия, конанть шкасто казевсть Мордовия Республикань Журналистэнь союзонь профессиональной мастерствань пелькстамотнесэ изницятне.
Весемезэ каязельть малав сядо яволявтомат. Жюрись кочкинзе сехте виевтнень.
Мероприятиянть шкасто ёвтазельть сетнень лемест, кить кармасть изницякс «Лучшая журналистская работа 2023 года» пелькстамосонть. Казевсть изницятне ды лауреаттнэ, конатне вадрясто невтизь коррупциянть каршо бороцямонь, наркоманиянть а нолдамонь тематнень, кие невтизе ёрокчинзэ Социалистической Трудонь Героентень А. Т. Куняевнень алтазь теманть коряс, Г. С. Власовонь ледстнемга фотоконкурссонть, «Золотое перо» СМИ-нь ветерантнэнь туртов пелькстамосонть, «ДА!» интернет-конкурссонть.
Истя жо те иестэ ютавтовсь од конкурс – те «Патриоты Мордовии» республиканской пелькстамось, конась ульнесь районной СМИ-нь ютксо.
Кода свал, те иесь эзь явово лиятнень эйстэ, ды сехте ламо роботат максозельть «Лучшая журналистская работа» республиканской пелькстамонтень.
Изницятненень казнетнень явшизь покш инжетне, конатнень ютксольть Мордовия Республикань Прявтонь ды Правительствань Администрациянь прявтонь полавтыцясь – МР-нь Прявтонь Пресс-службань руководителесь Елена Башкирцева, Центральной Военной Округонь инспекторось, отставкасо генерал-майорось Сергей Дьяков, МР-нь Прявтонь ды МР-нь Правительствань Администрациянь коррупциянь ды закононь лия коламотнень а нолдамонь коряс управлениянь прявтонь полавтыцясь Пётр Абелов, Н. П. Огарёв лемсэ МГУ-нь журналистикань кафедрань профессорось, филологиянь наукань докторось Вера Антонова, «Мордовия» ГТРК-нь информационной программатнень службань прявтонь полавтыцясь, РФ-нь заслуженной журналистэсь Дмитрий Божедаров, Мордовия Республикань Журналистэнь союзонь председателесь Людмила Резяпкина.
Пурнавозтненень пшкадемстэ Елена Башкирцева тешкстась, республикань журналисттнэ невтить эсь ёрокчист масторонь эрьва кодамо пелькстамотнесэ, сынь свал лиснить изницякс. Ды те корты алкуксонь профессионализмадо.
– Сы иесь республикань Прявтонть Артём Здуновонь яволявтоманзо коряс Мордовиясо ёвтазь важодемань династиятнень иекс. Региононь журналисттнэнь ютксо аволь аламо истят, кить поладыть эсь семиянь династиянть ды кадовить кемевиксэкс те профессиянтень. Покш сюкпря тенк! – мерсь Людмила Резяпкина.
Тешкстасынек, масторонь творческой союзось касы-виензэ иестэ иес. Тедеде Россиянь Журналистэнь союзонтень совасть минек региононь печатной ды электронной СМИ-нь малав комсь журналистт. Неень шкане Союзонь региональной отделениясонть лововить 300 ламо члент.
Эряви меремс, «Эрзянь правда» газетань журналисттнэ свалшкане невтить эсь ёрокчист профессиональной шкинемань пелькстамотнесэ, весе сынь совить Россиянь Журналистэнь союзонтень. Ды тедедеяк эзинек кадово казневтеме. «Лучшая журналистская работа в республиканских СМИ 2023 года» номинациясонть призёрокс кармась Юлия Еремина. А вана фотокорреспондентэсь Эдуард Ретунский эсь коллегатнень, журналистэнь пелькстамотнень изницятнень туртов тейсь алкуксонь казне. Вейсэ НТМ-нь корреспондентэнть Юлия Кондратьева марто сынь топавтызь телень прявт волшебникенть кармавтоманзо ды аламошкас варчизь виест Якшаматянь ды Ловняськень таркасонть. Ды, эряви меремс, лиссь те а беряньстэ. Эдь покштне, лиясто вишкинетнедеяк пек, куш аламошкас бажить понгомс ёвксос.
Юлия Еремина