Суббота, июня 22, 2024
Важное

Херсонской областень Каланчакской округось Мордовиянть туртов ашти подшефной регионокс. Республикась лезды Каланчаконтень сэтьме эрямонть ладямосо, теке марто социальной эрявикс объекттнэнь ды инженерной инфраструктуранть витнемасо-теемасо. Минек врачтне свалшкане ардтнить тов, штобу лездамс операциятнень теемасо, тосонь эрицятнень ютксо диспансеризациянть ды вакцинациянть ютавтомасо. Вана уш пельиеде седе ламо шкань перть Мордовиясто медицинской бригадатне роботыть Каланчаконь больницясо.


Орданьбуестэ –Каланчаков

Зярыя шкадо икеле Каланчаксто велявтсь врачтнень ветеце бригадась (весемезэ кото ломанть), конантень совась Орданьбуень райононь больницянь медицинской частень коряс прявт врачонь полавтыцясь, врачось-терапевтэсь Ольга Николаевна Чичайкина. Каланчаксо важодемадонть, кочкавт профессиядонть ды лиятненень лездамодонть ловнодо минек материалстонть.

– Видьстэ ёвтаса, васенце шкастонть саезь уш, кода кармасть пурнамо лецицянь бригадат Каланчаксо важодеманть туртов, эстень кемекстыя, бути эряви монь лезксэм, молян, – ёвтни Ольга Чичайкина. – Мессенджерсэ минек ули республикань терапевтической службань чат, косо ютазь иень ноябрясто монень понгсь яволявтома: Каланчаков эряви врач-терапевт. Васняяк кортынь тетянь-авань марто, толковия тенст весементь. Сынь ломантне чарькодицят, лиятненень лездамодо монь бажамонть кирдизь. Кортынь семиям марто. Мирдем ды кавто цёрынькан истя жо эзть моле каршо. Кемевтимизь, ковонть кодаяк эрясызь монстемень. Нама, мелявтынь кисэст, седе пек Мишань, вишкине цёранть кисэ, конась тонавтни ансяк омбоце классо. Те ковось седе стакакс жо ульнесь покшонть Вадимень туртов (сон пряды 11-це классонть), конась, паряк, седе чарькодсь, ков мон сыргинь, ды мелявтсь кисэнь. Мезеяк лангс апак вано, ковось ливтясь куроксто. Сеедьстэ кортынек видеонь пачк ды урокткак натой теинек вейсэ, куш важодемадонть ульнесь пек ламо.
Роботантень жо минек врачтне кундакшность сеске, ансяк кенерсть само.

– Каланчаков минь пачкодинек январень 13-це чистэ. Ансяк кенеринек кандомс ули-паронок эрямонь туртов явозь палататнес, сась тердема ормалгадозтнень примамонь таркастонть, учить терапевтэнть ды неврологонть. Шканть таргсеме эзинек карма, эдь ормалгадозь ломанентень учомась – те зыян. Вейсэ неврологонть марто валгинек учицятненень. Истя ушодовсь Каланчаксо минек важодемась.
Кода тешксты Ольга Николаевна, сон пек апаркстомсь, зярдо кармась содамо, кодамо лавшо шумбрачист тосонь эрицятнень, конатне ламо иень перть арасельть узкой специалисттнэнь кедьсэ. Пек ламо ормалгадозтне инсульт марто. Ломантненень арасель явозь эрявикс мель.

– Чить роботынь поликлиникасо, мейле ванкшнынь ормалгадозтнень приёмной покойсэ ды веть ульнесть дежурстват терапевтической отделениясо. Сыцятнеде ламольть, секскак важодемаськак ладязель чинек-венек. Пек бажинек теемс седе ламо, – тешксты Ольга Чичайкина. – Кода уш ёвтазель икеле, Мордовиясто те ульнесь врачтнень ветеце бригада ды весе лецямонть минь ладинек сеть вешематнень коряс, конатнень тевс нолдазь важодтяно тесэяк. Тосо васенце читнестэ улемстэ мон эшкевинь истямо тев марто, ормалгадозенть ванкшнозь, кемекстыя лецямонь лувонть, сёрмадынь ормаменькст, а вана аптекасо истят арасть. Паро, ломанесь мекев сась ды ёвтась теде. Ды уш теде мейле ютынь тосонь аптекатнень, ванкшнынь лецямопельтнень ламочинть ды карминь сёрмадомо сетнень, конатне улить. Лиякс кодамо лезэ монь кемекставт лецямодонть?!
Эряви меремс, тосонь эрицятне ламо сюкпрянь валт ёвтасть минек республикань врачтнень лемс сень кисэ, што истя вадрясто эйсэст ванкшность, ладясть лецямонть, ванность сонзэ топавтоманть мельга, шумбрачинть вадрялгавтомга путнесть стационарс. Весемезэ ковонь перть важодемань шкастонть ванкшнозельть 4 тёжадо ламо ломанть. Теезель покш ды эрявикс тев.

– Ольга Николаевна, ёвтадо, тов сыргамсто ды важодеманть перть пелема ульнесь?

– Бути ансяк васенце читнестэ, зярдо ве ёно марявсть леднемат ды снарядонь сезневемат. Истяк, кодамояк пелема арасель. Парсте содынь, ков сырган. Бути улевель пелема, мон арсян, кудосто туемадо аволинь арсеяк. Ней жо, весементь седе парсте чарькодезь, покш каштанчисэ аштян тосонь врачтнень коряс, эдь истямо а шожда лувсо сынь важодить эрьва чистэ. Ды бути монь лезксэм эряви эштё, арсян, молян тагояк. Апак сёпо ёвтаса, истят панжадо седей пациентт мон эзинь некшне врачокс важодемань весе иетнень перть. Те пек питней.

Врачонь профессиянть кочкизе эйкакш шкасто

Ольга Чичайкина чачсь Дубёнкань райононь Поводелесэ. Школанть прядомадо мейле тонавтнеманзо поладызе Н. П. Огарёв лемсэ МГУ-нь медицинань факультетсэ. Врачокс бажась улемс вишкинестэ саезь. Эштё овсе эйкакшокс вечкиль токшеме-ванкшномо эрьва кодат унжинеть, ракшат, лециль сынст эсь койсэ.

– Тонавтнемась монень вечкевсь. Седе стакакс ульнесть, паряк, васенце колмо курстнэ. Сестэяк, бути теманть вадрясто тонавтнилик, ёвтневиль. А лисиль васенце варчамосто, молилить омбоцеде, – корты Ольга Чичайкина. – Ней вана, весементь уш чарькодезь, содазь, тагояк бу молевлинь тов тонавтнеме. Сестэ весемесь марявсь стакакс, ней жо маряви пек шождакс. Те чарькодевсь врачокс важодемань иетнень перть, зярдо тонь эйстэ аштить лиятнень эрямост – тонь видестэ путозь диагнозонть, кемекстазь лецямонть, лезксэнь явоманть эйстэ.
Тонавтнеманть прядозь, Ольга пурнась семия. Ды лиссь истя, мирдензэ, Анатолий Николаевичень, кучизь важодеме Орданьбуев – сон служи полициясо, участковой оперуполномоченной. Тейтерь-авась истя жо кармась вешнеме эстензэ важодема тарка Орданьбуесэ.

– Вузонть прядомадо мейле карминь роботамо функциональной диагностикань врачокс. А сёпса, васенце шкастонть ульнесь а шожда. Парсте чарькодеви, теориясь пек явови практиканть эйстэ. Ды те куш косо истя. Паро, зярдо весемесь ашти книгасо артовкстнэнь коряс, муить тонеть ладицянть ды сонзэ коряс теить. Функциональной диагностикань специалистэнь тевсэнть истя а лиси. Эрьва ломаненть эсензэ орманзо, конатнень муемс-чарькодемс эряви тонеть. Покш сюкпря, зярдо мон ушодынь важодеме, функциональной диагностикань врачокс уш ламо иеть роботась Галина Михайловна Мишина. Сонзэ ульнесь покш опытэзэ ды моньгак тонавтымим ламос. Ней сон уш пенсиясо, ялатеке лиясто вастовтано ды лембестэ кортнетяно. Мон сонзэ лован эсь тонавтыцякс.

Функциональной диагностикань специалистэкс Ольга Чичайкина роботась вете иеть. Седе тов аравтызь участковой терапевтэкс. Малав кото иеть эсь участкантень кандовиця райононь эрицятнень туртов сон ульнесь васень лездыцякс. Пек лембестэ ланганзо кортыть икелень пациенттнэ, ламот лисиця кевкстематнень марто пшкалить нейгак, кадык меельце зярыя иетнень перть Ольга Николаевна топавты медицинской частень коряс прявт врачонь полавтыцянь тевтнень. Сонзэ вановт ало стационарной отделениянть важодемазо. Ды те тевенть сон бажи топавтомс пек парсте.

– Покш сюкпря ёвтан минек больницянь прявтонтень Виктор Михайлович Трофимовнень, сон ломанесь од, ламос бажиця. Свал ашти паро ёнов полавтоматнень кисэ. Ламо теи больницянть ды весе персоналонть роботаст вадрялгавтомга. Истямо прявт марто миньгак, важодицятне, бажатано ансяк икелев, – кемексты Ольга Чичайкина.

Юлия Еремина
Фототне О. Н. Чичайкинань ды «Маяк» Орданьбуень
районной газетанть

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».