Покш кенярксчи ютась субутасто Ицялбуесэ – районось тешкстызе чачома чинзэ. Тензэ топодсть 94 иеть. Мекс аволь 95, кода лия районтнэнь? Толковасынек, те районось панжозель 1929 иестэ Нижней Новгородонь ёнксонь Арзамасонь округсо. Сон совиль тозонь 1930 иес ды седе мейле кармась минек Мордовиянь автономной округонь пельксэкс.
Ней Ицялбуесь покш ды сюпав район, козонь совить 10 велень поселеният. Прявт велесь – Кемлясь. Ансяк тедеде кенярксов чинть ютавтома таркакс кочказель Смольный поселкань Визит-центрась ды вакссонзо экопаркось. Сэрей ды мазый пичетнень ало пурнавсть весе велетне ды, кить кода маштсть, бажасть невтемс эсест тиринь енксост, эрьвась тешкстызе лиятнень эйстэ эсензэ явовксонзо. Теске жо эсест палаткаст ладсизь райононь велень хозяйстватне ды предприятиятне нолдавиця продукцияст марто. Тешкстама, варчамс сынст меревсь питневтеме. Инжетне истя жо каванявсть ликшань кашасо, пловсо ды чайсэ. Чись тондавсь пек пси, ансяк сон эзинзе тандавто пурнавозтнень, кода косто а косто сазь виев пиземень коволоськак, конанть ломантне ловизь Пазонь чанстекс.
Мероприятиясь ушодовсь Ине Отечественной войнасо чавовозь воинтнэнень кеврунгонтень цецянь путомасо. Мордовиянь Государственной Собраниянь Председателесь Владимир Чибиркин ды Ицялбуень администрациянь прявтось Валентина Дмитриева ледстизь сынст лемест чатьмонемань минутасо. Мейле Визит-центрасонть ютась «С верой, надеждой, любовью к людям и земле» кругловой столь, конась алтазель общественной деятеленть Александр Буркановонь чачома чистэнзэ саезь 75 иетнень топодемантень. Александр Николаевич зярыя иеть уш арась ютксонок, ансяк сон ламо тейсь Ицялонь райононть виевгавтомга ды лемезэ тесэ а стувтневи. Вастовомантень сакшность сонзэ роднянзо-раськензэ: церанзо, урьванзо, нуцьказо, семияст ялгатне ды мартонзо важодицятне. Те содавикс политической деятельденть евтазельть ламо паро валт, ледстнемат. Александр Бурканов ламо иеть аштесь покш таркасо, ульнесь Мордовиянь властень тёкшсо: 1990 иень декабрясто ладязель МАССР-нь Верховной Советэнь Председателекс, 1995 иень январьстэ – Мордовиянь Госсобраниянь Председателень полавтыцякс.
«Александр Бурканов – ломанесь лия енов а молицяль. Сон пек вечкилизе тиринь ёнксонзо ды ламо мезе тейсь Ицялбуенть кастомга-кемекстамга. Мон содаса сонзэ студенческой эземстэ саезь, эринек вейке общежитиясо, сон свал аноколь максомс лезкс. Те ломанесь свал евтылизе эсь мелензэ, нама, лиясто теиль ильведьксткак, ансяк свал чарькодилизе а видечинзэ, ульнесь принципиальноекс ды эсь прянзо сёвныцякс», – ледстнесь Буркановдо Владимир Чибиркин. Сон тешкстась, те превей прявтось ды общественной деятелесь свал мельвановицяль коллективсэ. Сон содылинзе социально-экономической секторонть мелявкстнэнь ды сынст решамс кармавтыль законодательной ды исполнительной властень органтнэнь. Валентина Дмитриева эсензэ ендо ёвтнесь сонзэ обуцянь паро ёнкстнэде ды ледстизе, кода Буркановонь шнамодонзо мейле 1985 иестэ сонзэ ладизь райсоветэнь исполкомонь председателекс.
«Кругловой стольденть» мейле Мордовиянь Госсобраниянь Председателесь Владимир Чибиркин, райононь прявтось Валентина Дмитриева, те енксонь предприятиятнень ды велень хозяйстватнень прявттнэ, депутатонь советэнь представительтне ванкшнызь ды варчнизь экопарксонть аштиця подвориятнень раськень ярсамопелест-симемапелест. Кода тенек мерсь Ицялбуень Культурань кудонь прявтось Надежда Буянова, эрьва велесь бажась невтемс эсензэ «брендэнзэ» ды дивавтсь киштемасо-морамосо, нурька морынетнесэ, каймаксо-позасо, салтозь куярсо ды помидорасо. Малав весе сынь наряжазельть раськень мазый оршамопельсэ. Береговые Сыресинь аватне пансть эрзянь прякат: панжакайть, сюкорот... Усксть чапамо ловсо, зярыя тикшень чайть, брагат-позат ды, натой, кармавтызь инжетнень пилямо ды лазномо пенгеть. Эрьва поселениясь теекшнесь эстензэ кужине, конантень совамось мазылгавтозель курсясо ды явозель илевонь пирявкссо эли пенгемукорьсэ. Кодат ансяк арсевкст арасть минек ломантнень превсэ. Весенень вечкевсь якиця «каштомось», конась каванясь ансяк паневть прякасо ды пачалксесэ. Тесэ стявтозельть эйкакшонь искусствань школав якицятнень артовксост-теевксэст, содавикс кедьчелькев ломаненть Петр Першинэнь выставказо. Алкукскак, кенярксчись удалась. Пек паро арсемакс ульнесь ютавтомс сонзэ «Смольный» экопарксонть, конась чипайдентькак, пиземедентькак весень кекши, тантей ды ванькс кошт кази. Кода мерсь райононь прявтось Валентина Дмитриева, сыця иень юбилеенть истя жо арсить ютавтомс тесэ.
Зярс инжетне яксесть паркканть ды дивсесть, Визит-центранть площадкасо ушодовсь концертэсь, конасонть морасть-киштсть кода райононь артисттнэ, истя жо Мордовиянь филармониянь тештетне. Концертэнь васенце пельксэнть прядовомадо мейле ушодовсь торжественной мероприятиясь, конасонть республикань парламентэнь спикерэсь Владимир Чибиркин тиринь ёнксонтень евтась поздоровт Мордовиянь Прявтонть Артем Здуновонь ды Госсобраниянть пельде: «Ицялбуень эрицятнень покш лезксэст тиринь республиканть ды масторонть виевгавтомасо. Неень шкасто Ицялбуесь – те газифицированной велеть, од кить ды кудот. Арсян тенк а аштемс ве таркасо ды свал молемс икелев. Районось максы пек ламо вийть Мордовиянь социально-экономической енксонтень, сон кармась ламо раськень ломантнень важодемань паро таркакс».
Владимир Васильевич истя жо евтась сюкпрянь валт сеть эрицятненень, конатне ванстыть масторонть сэтьмечинзэ ды кирдить сонзэ суверенитетэнзэ СВО-нь зонасонть. Райононь прявтонтень Госсобраниянь спикерэсь казсь цецянь пусмо ды истя жо явшесь казнеть Мордовиянь Прявтонть ды Госсобраниянть пельде Ицялбуень эрицятненень ламо иень перть парсте важодеманть кисэ. Поздоровт Правительстванть пельде евтась МР-нь Цифровой развитиянь министрась Роман Курмакаев.
Валентина Григорьевна Дмитриева евтась седейшкавань поздоровт тиринь райононь эрицятненень, тердсь кастомс демографической ёнксонть, тешкстынзе производствань передовиктнень, райононь сехте од ды сыре эрицятнень, ламо иеть вейсэ эриця мирдтнень-нитнень. Кенярксчись поладовсь концертэнь омбоце пелькссэнть ды эште куватьс Смольноенть велькссэ гайгсть морот, марявсть нурсиця, кирнявтниця, чийниця эйкакштнень вайгелест ды ламот кортасть, те кенярксчись кармась тенст покш казнекс.
Марина Девятова