Ламо мельстуиця мероприятият ютыть августсто Мордовиясо. Сехте учовикстнэ ды редявикстнэ кармить молеме Саранскойсэ ды республикань зярыя районтнэсэ августонь 17-це,18-це ды 19-це читнестэ.
Мезе карми: «Этнокультурное многообразие России: современные вызовы и перспективы развития» весероссиянь финно-угрань раськетнень II-це форумось, конась анокстави вейсэ ФАДН-нть марто ды «Мы вместе!» весероссиянь од ломанень раськень культурань фестивалесь, конанть арсицязо-ютавтыцязо – Равчирень финнэнь-угрань раськетнень культурань центрась ды конась ютавтови Культурань инициативатнень Президентэнь фондонть лезксэнзэ вельде. Сыненст анокстамонть кувалма Республикань Кудосо ютась промкс, конань ветясь МР-нь Правительствань Председателень Васенце полавтыцясь Галина Лотванова. Галина Алексеевна тешкстась, кода минь ютавтсынек кенярксчитнень ды вастсынек инжетнень, ашти се, карми-арась тей сыцятнень мелест седе тов ютамс республикань туристической маршруттнэва.
Мордовиянь Культурань, раськень политикань ды архивень тевень министрась Светлана Баулина евтнесь кенярксчитнень келей программадонть, мезе уш теезь неень шкантень ды кодат мелявкст эрявить решамс весень вийсэ.
Светлана Никитовна тешкстась, Мордовияв арсить самс инжеть Россиянь 50 регионтнэстэ. Весе инжетненень кармить невтевеме республикань сехте содавикс таркатнева экскурсият. «Этнокультурное многообразие России: современные вызовы и перспективы развития» форумось ушодови августонь 17-це чистэ, тов сыть 37 регионтнэстэ 714 участникть. Сынь кармить эрямо инжень кудотнесэ: «Рэдиссон», «Мередиан» ды «Саранск». Торжественной панжомась карми И. М. Яушев лемсэ музыкальной театрасо. Тесэ юты пленарной промксось, секциятне жо ютыть Н. П. Огарёв лемсэ МГУ-со. Чинь перть А. С. Пушкин лемсэ оймсемань парксо кармить морамо-киштеме республикань творческой коллективтне, невтевить «Тюштянь налксемат» ды лия мельстуиця пелькстамот.
Августонь 18-це чистэ Саранскоень Советской площадьсэ ушодови «Мы вместе!» весероссиянь од ломанень раськень культурань фестивалесь, конанть лувсо ютавтовить сисем покш мероприятият. Васняяк, Россиянь сехте содавикс ды вечкевикс творческой коллективтнень арт-марафонось, ков сыть истят ансамблятне, кода Москов ошсто «САДко», «Партизан FM» фолк-группась, Краснодарсто «Скрыня», Северной Осетиясто-Аланиясто морамонь ды киштемань ансамблясь «Ритмы гор», Владимир ошсто «Владимирские рожечники», Удмуртиянь государственной ансамблясь «Айкай», Башкортостансто раськень киштемань ансамблясь «Аманат», Донецкой Народной Республикасто «Донбасс» морамонь ды киштемань заслуженной государственной академической ансамблясь, Дагестансто «Гергибель» ды лият.
Седе тов, кармить молеме «Масторланго» («Вселенная») этномодань фестивалесь-конкурсось, «Бренд-2023» велетнень-оштнень брендтнэнь фестивалесь, «Мордовия хлебосольная» гастрофестэсь, «Время возможностей» творческой инициативатнень фестивалесь-форумось, «Поющее дерево» чувтосто керсицянь фестивалесь-пелькстамось ды «Шумбрат» раськень фольклорной кенярксчись, конась юты Отяжелесэ. Истя жо невтеви «Тев» раськень художественной промыслатнень ды ремеслатнень выставкась, козонь бажить самс Россиянь 15 регионтнэстэ 150 ламо кедьчелькев ломанть.
Тешкстама, Мордовиясо августонь 1-це чистэ саезь эрицятнень ды инжетнень туртов кизэнь каникуласто лиссть весе театратне.
«Мы вместе!» фестиваленть молемань прявт площадкатне панжовить ошонть куншкакуросо: Советской ды Изнямонь площадтнесэ, Ленинэнь ды Толстоень ульцятнесэ. Сценась карми аштеме кода свал Госсобраниянть маласо. «Книжный мир» лавкастонть саезь Коммунистической ульцяванть стявтовить республикань районтнэнь презентационной площадкатне ды раськень подвориятне. Тосо жо стявтови вишка сцена Мордовиянь морыця ды киштиця коллективтнень туртов. Музыканттнэ ды артисттнэ истя жо кармить морамо Пролетарской ды Октябрьской райононь оймсемань таркатнесэ. Толстоень ульцяванть ды фонтантнэнь чирева сравтовить «Тев» выставкань палаткатне. Лениннэнь кеврунгонть маласо скверсэнть инжетнень кармить андомо-каванямо Мордовиянь велень хозяйствань ды продовольствиянь предприятиятне.
Субутасто кенярксчитне поладовить районтнэсэ. Отяжелев сырги «Шумбратось», Орданьбуесэ, Краснослободскойсэ ды Торбеевасо тешкставить районтнэнь чачома чист, Дубенкабуень Пуркаева велесэ ютавтови «Каштом курго» фестивалесь, Кочкуровасо – чувтонь налкшкень ды сынст керсицятнень невтемась, Лямбирьсэ – раськень вастомань-ильтямонь кенярксчись, Темниковасо жо – культурань фестиваль ды калонь кундсицянь пелькстамо.
Тешкстатано: мероприятиятнень ютавтома шкасто пек эрявить волонтёрт. Кинь ули ютко шказо неть колмо читнестэ, инеськеть, гайневтеде Минкультов эли Равчирень финнэнь-угрань раськетнень культурань куншкакуров.
Марина Девятова