Пятница, марта 29, 2024
Важное

Течи велесэ эрямось аволь «ламбамо». Ды зярдо сон сокицянтень-видицянтень ульнесь истямокс? Важодемань чись ушодови рана валске, прядови позда чокшне, тевтнеде ды мелявкстнэде свал певтеме.

Бути ней велесэнть ули паро, виев хозяйства, косо шкастонзо максови зарплатась ды мелявтыть важодицятнеде, бути топавтовить весе социальной ёнкстнэ ды ули важодема тарка од ломантнень туртов, истямо эрямонть берянекс а ловсак. Тень минь неинек эсенек сельмсэ, зярдо ульнинек Сабанцелесэ, косо велень эрицятне ды шабра веленсетнеяк важодить «Сабанчеевское» велень хозяйствань предприятиясо, конань прявтсо уш зярыя кементь иеть Д.Н.ИГУШКИН.
– Течи хозяйствасонть тевтне лаказь лакить. Моли сюронь урядамось, – ёвтни Дмитрий Николаевич. – Сюронть пивсыть кемнилее комбайнат.

«РУЗ ПАКСЯСЬ» ЧАМИ


… Минь «Руз паксясонть», кона ашти Капазэле веленть эйстэ аволь васоло. Тестэ вастынек «Сабанчеевское» велень хозяйствань предприятиянь прявтонь полавтыцянть В.С.Кочуринань.
– Сюронь урядамо лисинек июлень 25-це чистэ, – ёвтни Вера Сергеевна. – Уш пурнынек ниле тёжадо ламо тоннат. Тедеде сон пек удалась. Сатышка ульнесь летькеськак ды пси читнедеяк. Истят паксятнень мельспаро урядамс. Аволь кода мелят, зярдо кой-кона участкастонть гектарсто сайнинек ансяк комсь центнерт. Тедеде жо кой-кона участкатнестэ сайтяно гектарсто кодгеменде ламо центнерт. Комбайнанок улить. Тедеде таго раминек «Акрос-595» комбайна. Сон эсенек, Россиянь. Комбайнёртнэ сонзэ шныть. Зярс од «Акросось» тракторонь парксо. Тосо эйсэнзэ пурныть. Зярыя чинь ютазь те од комбайнась лиси паксяв сюронь урядамо.

КОМБАЙНЁРТНЭ КОЧКАВИТЬ
ВЕСЕМЕ ЁНДО АНОКСТАЗЬ

Вадря комбайнатнеде кортамсто, В.С.Кочурина тешксты: тевтне вадрялгадыть сестэ, зярдо комбайнасонть озадо эсь тевень алкуксонь специалист.
– Комбайнёртнэнь свал кочкатано весеме ёндо анокстазь, – корты хозяйствань прявт агрономось. – Минек улить умонь комбайнёронок, конат эйкакш порасто саезь урядыть сюро. Эдь сынь чачсть ды кассть велесэ. Весемесь моли тосто! Тесэ мельсэ кирдема аволь ансяк финансовой ёнксонть, истя жо тевень чарькодемантькак, конань сынь топавтыть. Куш целковоень таштамонь кевкстемантькак а эряви стувтнемс. Комбайнёртнэнень сезонсто ковозонзо пандовить ведьгемень тёжадо ламо целковойть. Ды те – премиянь апак лово!
В.С.Кочуринань валонзо коряс, сюронь урядамонь шкасто мельсэ кирдеви комбайнёронть ёрокчизэ, опытэзэ. Од специалистэнть чуросто озавтнить од техникань руль экшс.
Кода свал, тевест парсте топавтыть комбайнёртнэ Виктор Петрович Федотов, Виктор Михайлович Пшеничников, Николай Дмитриевич Кажаев, Юрий Андреевич Учеваткин, Василий Дмитриевич Иневаткин, Михаил Иванович Тихонов.

«ИЕНЬ ПЕРТЬ УЧАТ СЮРОНЬ
УРЯДАМОНТЬ!»

Комбайнань жаткась – теке парикмахерэнь машинка, саи тусто паксятнестэ товзюронь прятнень. Сюрось туи вейксэ тоннас бункерс, паксяс кадови ансяк олгось. Ростовонь «Дон-1500Б» комбайнанть руль экшсэ од цёрась Александр Борисов. Сонзэ кода комбайнёронть туртов те уш кавксоце сезон. Икеле ульнесь комбайнёронь лездыцякс.
– Мон чачинь ды обуцям кемекстыя Таразбуесэ. Вишка пингстэ уш ветнинь комбайна, – ёвтни Александр Борисов. – Мелят пивсынь кеменде ламо тёжат центнерт сюро. Зярдо сюронь урядамонь шкась прядови, Таразбуесэ важодян эрьва мезекс: ракшань андыцякс, лия мезекс. Сюронь урядамонь шкась – а стувтовикс шка. Сонзэ иень перть учат!
Александр – аволь ансяк комбайнёр, сон, бути истя можна меремс, романтик! Сюронь урядамсто сонзэ туртов эряви аволь ансяк результатось – сонсь тевеськак.
– Зярдо урожаесь паро, сонзэ мельспаро урядамскак, – полады од цёрась. – Содатадо, зярдо ванат зёрнань тусто струянть лангс, кона пры машинань кузовс шнекстэнть – кенярксонтень пе арась!
Александр Борисовонь валонзо коряс, техниканть вечкеме сонзэ тонавтызе трактористэсь Евгений Александрович Овнин. Сон весе юткошканзо ды содамочинзэ макссь од цёрантень. Тонавтсь, кода улемс алкуксонь специалистэкс. Од цёрась тонавтыцянть кемеманзо эзизе кола. Сон теевсь паро специалистэкс.
Тедеде Александр Борисов марто лездыцякс важоди Россиянь Правовой академиянь студентэсь Александр Калинин.
А мезть сёпомс, сюронь урядамось саи ламо юткошка ды вийть. Од цёратнень те овсе а талновты.

ЗЯРДО
ВЕЧКЕВИ ТЕВЕСЬ

– Виде, важодеманть ушодтано рана валске ды прядовкшны позда чокшне, – полады Александр Борисов. – Теде мейле, зярдо паксясо прядовкшныть тевтне, эряви эштё комбайнанть ванськавтомс, штобу валске шка а ютавтомс. Монень вечкеви тевем!
Тесэ жо, «Руз паксясонть», косо товзюронть алов явозь 126 гектарт, вастовинек В.П.Сорокин комбайнёронть марто.
– Мон ней эрян Самарань областень Тольятти ошсо. Важодян Автозаводсо наладчикекс, – ёвтни Василий Петрович. – Уш ветеце сезон отпуском ютавтнян тиринь ёнкссо. Эдь чачинь-касынь Отяжелень райононь Аловелесэ. 12 иесэ карминь важодеме. Тедеде важодян комбайнёронть Василий Дмитриевич Иневаткин марто. Арсетяно тедеде пивсэмс мелень коряс седе ламо сюро.
Тесэ а кода а ледстямс паро валсо комбайнёронть М.И.Тихоновонь. Сон чачсь-кассь Дюркина велесэ. Ансяк уш малав 18 иеть эри Сабанцелесэ. Сюронь кастыцянь тевенть топавты уш комсте ламо иеть. Те шканть перть Михаил Иванович теевсь алкуксонь специалистэкс. Сюронь паксятнева кодат ансяк комбайнат эзь ветне! Ней важоди «Дон-1500Б» комбайнасо. Тензэ лезды Денис Маскаев. Сон вандынь алкуксонь сюронь кастыця. Пек вечксы эсь тевензэ.
Истя жо комсте ламо иеть сюронь кастыцянь тевенть топавты Ю.А.Учеваткин. Сон эсь «Дон-1500Б» комбайнасонть уш пивсэсь 3 тёжадо ламо центнерт сюро.
– Минек комбайнертнэнь аволь ансяк важодемань покш опытэст, истя жо сынь пек ответственнойть, весе важодить оймень путозь, – комбайнёртнэде ды шофертнэде кортамсто тешкстась В.С.Кочурина. – Тувталтомо тевтеме а аштить.
– Минек хозяйствасонть сюротненень явозь вете тежадо ламо гектарт, – ёвтни «Сабанчеевское» ООО-нь прявтонь полавтыцясь В.С.Кочурина. – Озимойтнень алов явозь 2 тёжат гектарт. Виднетяно шуж, зернакс кукуруза.
Тинге лангсояк тевтне лаказь лакить. Тей сюро марто автомашинатне ардыть ды ардыть. Тесэ сюронть сортовить ды анокстыть видьмекст.
Тесэ тевест парсте топавтыть, эрьва ков кенеркшнить М.В.Сайгушкина, Л.А.Данилова, Н.В.Бояркина, Н.В.Маскаева.
Паксясто тинге лангов сюронть ускить шофертнэ М.М.Палькин, В.Г.Саврушкин, В.П.Федотов, Н.А.Фомин. А.И.Кузоваткин.
Теке шкане «Сабанчеевское» велень хозяйствань предприятиясонть виевстэ моли сы урожаенть алов модань анокстамось. Озимойтнень алов моданть кавшакавтыть трактористтнэ А.Н.Федоров, Н.Д.Иневаткин, соки – В.И.Учеваткин.
…Сабанцелестэ сыргинек паро ёжосо. Каршонок тинге лангов паксясто сюро марто ардыть ды ардыть Камазтнэ. Велень трудий ломантне капшить шкастонзо урядамс сюронть.

Пётр Зиновьев, фототне Э.Ретунскоень
Отяжелень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».