МР-нь Прявтонть Кучомадонзо эрицятнень мелест-арсемаст:
РФ-нь Федеральной Собраниянь Федерациянь Советэнь членэсь, РФ-нь Финнэнь-угрань раськень Ассоциациянь прявтось Пётр Тултаев:
– Мордовиянь Прявтось Артём Здунов МР-нь Госсобраниянтень Кучомасонзо токинзе республикасонть эрямонь весе ёнкстнэнь: экономиканть, социальной сферанть, СВО-нть туртов весе вийтнень ды ресурстнэнь максоманть, семиятнеде мелявтоманть, демографиянь тевтнень паролгавтоманть. Артём Алексеевич видестэ кортась стакачитнеде, сынст витемадост ды лия тевтнеде. Сынь весе чарькодевикст. Аволь аламо од ломанть туить тиринь Мордовиясто. Сеедьстэ сынь тоско кадовитькак. Те стакачинть витемга сон кармавтынзе прявттнэнь истят ломантнень мельга ваномо ды весементь тееме эсенек республикас сынст кадовомга.
* * *
МР-нь Государственной Собраниянь депутатось, «АСТЗ» АО-нь экономикань коряс директорось Владимир Голубев:
– Кучомасонть кортазель пек ламодо, Прявтось вановт алов саинзе эрямонь весе ёнкстнэнь. Артём Алексеевичень командась важоди весементь коряс, келейстэ. Монень, кода бюджетэнь, финанстнэнь ды налогтнень комитетэнь членэнтень, сехте мельстуицякс кармась экономической пельксэсь, конасонть кортавсь бюджетс налогтнень самост кастомадонть. Кенярдовты, панжови од ТОСЭР Рузаевкасо, Саранскоенть маласо панжови башка экономической зона, косо минь арсетяно улемс резидентэкс.
Тешкстазель минек «АСТЗ» компаниянь «Завод световых приборов» предприятиянть важодемазо, производствань покшолматнень кастомась, «Профессионалитет» программасонть, од кадратнень анокстамосо, тонавтницятнень марто профориентационной роботасонть таликазо.
Мелят минек дивавтымизь Артём Алексеевичень эрзянь кельсэ кортамозо, тедеде сон седеяк кемекстызе келенть. Неяви, сон касты тиринь кельсэ кортамонь культуранть ды невти пример, те кенярдовты. Тиринь койтнень, аволь кудоюткова келенть, а классической, академической келенть ванстомась – пек эрявикс тев. Паро, теньсэ лезды тынк газетаськак. А минь арсетяно те иестэнтькак кадовомс тынк сёрмадстыцякс.
* * *
«Термоконтинент» ООО-нь менеджерэсь, блогерэсь, ламо эйкакшонь триця авась, интерьерэнь дизайнерэсь Юлия Адушкина:
– Мордовиянь Прявтось покш мель явсь демографиянь темантень, республикасонок седе ламо эйкакшонь чачтомантень. Неень шкасто те кевкстеманть коряс улить стакачить, сынст эрявить витемс.
Кенярдовты, Россиянь Президентэнть кармавтоманзо коряс кемекстазь региононь программа чачозтнень ламолгавтомаст ды эйкакш марто семиятненень лезксэнь максоманть коряс. Региононь Прявтось башка тешкстызе, уш эйдень кужосто саезь эйкакштненень ёвтнема, кода паро улемс вадря тетякс ды авакс.
Кода мерсь республикань Прявтось, сы иень январьстэ саезь региононь авань капиталось индексировави республикань закононтень полавтомань совавтозь. Неть ярмактнень мереви нолдамс тевс транспортонь рамамстояк.
* * *
Кочкурбуень муниципальной райононь прявтось Светлана Герасимова:
– Минь мельспаросотано, МР-нь Прявтось Кучомасонзо аволь весть ледстизе Кочкуровань муниципальной райононть, кортамось ульнесь туризманть виевгавтомадо. Башка мель явовсь «Кречет» оймсема тарканть одкстомтомантень. Алкукскак, те таркась вечкеви аволь ансяк райононь ды республикань эрицятненень, истя жо сакшныть масторонь лия регионтнэстэяк. Кучомасонть мольсь кортамо лейтнень ды сёлттнэнь чирест оймсемань паро таркакс теемадо. Меельце иетнестэ тень коряс районсонок улить паро ушодкст. Эрицятнень мельс тукшныть «Карнай» оймсемань базась ды Сура леень чиресь. Неть кавто таркатнесэ тееви пляж.
Теде башка, ушодови покш важодема Вирь Тавла ды Пакся Тавла велетнесэ пандопрясто сокссо кирякстнемань спортонь объектэнть тееманть коряс.
* * *
СВО-нь ветеранось Иван Волков:
– Васенцеде ульнинь Мордовиянь Прявтонть Артём Здуновонь МР-нь Госсобраниянтень Кучоманть кунсоломасо. Тешкставлия, республиканть касомань-кемекстамонь китне-янтнэ ёвтазь кеместэ ды чарькодевиксстэ. Паро сеяк, видестэ тевс нолдавить РФ-нь бюджетэнь средстватне, нацпроекттнэ, частной инвестициятне. Колмо иень перть ламо теезь. Мельтне-арсематне вадрят, икелев ветицят. Дивавтымим, кода парсте Артём Алексеевич кортась эрзякс, кода эрязасто тонавтнизе тетянзо-аванзо келенть. Тень ды аволь ансяк тень кувалма аштян каштанчисэ.
* * *
«Птицефабрика «Атемарская» ОАО-нь генеральной директорось Александр Щемеров:
– Мордовиянь Прявтось келейстэ тешкстынзе сехте эрявикс задачатнень региононть касоманзо-виевгадоманзо коряс. Бути кортамс предпринимательствань сферадонть, те ёнкссонть прявт вешематне чарькодевикст – эряви панжомс од важодема таркат, тердемс минек земляктнень одов эрямо-роботамо тиринь ёнксов, максомс условият сыненст ды сынст кудораськетнень туртов.
Тедедеяк Мордовиянь Прявтось Артём Здунов зярыяксть пшкалесь Государственной Собраниянтень тиринь эрзянь кельсэ. Те монень, кода Отяжелень районсо чачозентень, эрзянтень, пек вечкевсь, мельспаросан, сон бажи тонавтнемс покштянзо-бабанзо келенть ды тонавты весень а стувтнемс эсь ундокстнэде!
* * *
Морыцясь, «Героень шка» премиянь «Культурань герой» номинациясонть изницясь Андрей Бочканов:
– Истямо покш ды эрявикс промксов, кода МР-нь Прявтонть Госсобраниянтень Кучоманзо кунсоломо, тердимизь аволь васенцеде. Седеем токизе се ёнксось, кода Артём Алексеевич Здунов тиринь кельсэ пшкадсь Мордовия Республикань Госсобраниянь депутаттнэнень ды залсо весе аштицятненень. Покш каштанчисэ аштян эрзянь-мокшонь весе раськенть кисэ. Эдь бути региононь прявтось весенень невти пример, кода эряви кортамс тиринь кельсэ, кеман, сестэ лиятнеяк кармить бажамо сонзэ тонавтнеме ды содамо. Кемеви, раськень кельтнень виевгавтомась поладови седе товгак.
* * *
КФХ-нь прявтось, МР-нь Госсобраниянь депутатось Владимир Кабаев:
– Мордовия Республикань Прявтось Артём Алексеевич Здунов Кучомасонзо явсь покш мель велень хозяйствантень. Сон тешкстась, те иестэ Мордовиясо пурназь кавто миллионт тоннат сюро, те покш невтевкс. Вана уш омбоце иень перть республикасонок ламолгавтови пиже кснавось ды весень минек кенярдовтыть якстерькаень кастыцятне. Сон пачтясь, парт невтевкстнэнь саемантень лезды неень шкань од технологиятнень тевс нолдамось.
«Мордовиясь икеле молицятнень ютксо велень хозяйствань продукциянть нолдамонзо коряс. Минек улить виенек теемс сатышка ярсамопельть, а нолдамс сехте эрявиксэнть лангс питнетнень кепедеманть. Те ашти юрокс региононь эрицятнень туртов питнетнень а кастомга», – мерсь Артём Алексеевич.
Мельтнень-арсематнень пурнызь Марина Девятова
ды Валентина Юдина