Февралень 3-це чистэ Мордовиянь Прявтось Артём Здунов содавтызе Кочкуровань райононть. Васняяк сон ульнесь специальной военной операциянь участникенть Дмитрий Барашкинэнь семиянзо кедьсэ. Мордовиясо чачозесь – кадровой военноесь – вансты Тиринь масторонть СВО-нть ушодовомсто саезь.
Дмитриень тетязо-авазо – Анатолий Иванович ды Александра Михайловна эрить Кочкур велесэ. Те иень сёксня «Переселение граждан из аварийного жилищного фонда» программанть лувсо тенст макссть од квартира. Ташто кудосонть семиясь эрясь малав весе эрямост перть. Неть иетнень перть зданиясь, нама, пек каладсь. Од кудос ютавтомань федеральной программанть вельде пенсионертнэ вадрялгавтызь эрямонь условияст.
Республикань руководителесь кемевтсь: кудось лембе, ули весемесь вадря эрямонть туртов. Чаень симемстэ кортасть семиянь тевтнеде ды талновтыця кевкстематнеде.
Колмо иетнень перть Кочкуровань районсо каладозтнень таркас од квартират максозельть 68 ломаннень. Од программантень совавтовить эштё кавто ламо квартирань кудотне, конатнесэ эрить 53 ломанть.
Кочкуровань районсо улемстэ Артём Здунов содавтызе эйкакшонь искусствань школанть. Дополнительной образованиянь учреждениянь зданиясь педе-пев витнезь «Культура» нацпроектэнть лувсо. Школань тонавтыцятнень ды эйкакштнень туртов те кармась алкуксонь казнекс. Кода ёвтнесь школань прявтось Елена Тарима, Национальной проектсэнть улемась лездась одкстомтомс зданиянть, совавтомс тов од эрямо. Президентэнь проектэнть коряс явозь ярмактнень вельде целанек полавтозь инженерной коммуникациятне ды латось, теезь од крыльця, потолок, путозь кенкшт ды вальмат, вадрялгавтозь-мазылгавтозь школанть перька таркась. Искусствань школань каштанчись – «Гармония» инструментальной ансамблясь, конантень совить тонавтыцятне ды эйкакштне. Коллективесь эрьва иестэ ёрокчинзэ невтни «Шумбрат, Мордовия!» фестивальсэнть.
Теке жо чистэнть Кочкуровасо ютавтовсь райононь Депутаттнэнь советэнь отчётонь сессиясь. Сонзэ важодемасо ульнесть республикань Прявтось Артём Здунов, министратне, Госсобраниянь депутаттнэ.
2023 иестэ важодемань невтевкстнэде ды 2024 иентень прявт тевтнеде пачтясь райононь прявтось Светлана Герасимова.
2023 иесь кандсь райононть туртов паро цётавкст, теезь ламо. Аграрийтне пурнасть рекордонь норов. Кассь сывелень ды ловсонь производствась, ламолгавтовсь прявт капиталс инвестициятнень покшолмась. Вейке эрицянть лангс эрямо таркатнень максоманть коряс районось саи васенце тарка. Ламолгадыть вишка ды средней бизнесэнь субъекттнэ – мелят сыненст явозь 149 млн целковойтнень покшолмасо государствань лезкс, кавто проекттнэ кармасть туризмань коряс гранттнэнь пелькстамонь изницякс – те Карнай эрькенть чиресэ пляжонь теемась ды Сура леенть чиресэ пляжонть вадрялгавтомась. Эрязасто виевгавтови эрьва кодамо ёнксонь туристической бизнесэсь. Улить оймсема таркат, конатне пек вечкевить: «Кречет» сафари-паркось, «Песчаный берег», «Мураньские зори».
Пек лездыть нацпроекттнэ: «Жилье» региононь проектэнть лувсо строязь автомобилень ниле кить Булгакова велесэ, «Содействие» федеральной программанть коряс витнезь кото кить Семилей, Кочкур, Кацялай велетнесэ, витнезь кудотнень перька таркась Булгакова велесэ. «Культура» нацпроектэнть лувсо педе-пев витнезь Кочкуровань искусствань школась ды Вирь Тавласо Культурань кудось, Владимир Ромашкин лемсэ музеесь.
Сессиясонть истя жо кортась «Норов» компаниятнень группань председателесь Александр Поздняков. Сон ёвтнесь холдингень тевтнеде-арсематнеде, кепедизе велень хозяйствань предприятиятнень туртов кадратнень анокстамонь кевкстеманть.
СВО-нь участниктненень лездыцятнень вийдест ды ушодкстост ёвтнесь Елена Лезина волонтёрось. Сон кармавтсь райононь эрицятненень седе эрязасто вейсэндявомс те важодемантень. Минек боецтнэнень эряви лездамс!
Районсонть туризманть виевгавтомадо ёвтнесь «Кречет» сафари-парконь руководителесь Светлана Каткова. Мелят парконтень сакшность 13 тёжат туристт, натой омбо мастортнэстэяк. Проектэнть сы шкантень покшт арсеманзо.
Мордовиянь Прявтось, сессиясонть кортамсто, ёвтась сюкпря те ёнксонь эрицятненень важодеманть кисэ, тешкстызе эсь доходтнэнь кастоманть ды финансонь дисциплинань ладямонть коряс динамиканть. Районось саи республикасонть васенце тарка аволь налогонь доходтнэнь касоманть коряскак.
Социальной инфраструктурась истя жо башка вановт ало, васняяк кортамось моли эрицятнень пшкадематнеде. 2026 иестэ арсеви педе-пев витнемс Сурвелень средней школанть. Истя жо допрок витнемат эштё эйдень колмо кужотнень ды колмо школатнень. Шумбрачинь ванстомань первичной звенанть одкстомтомань программанть лувсо эряви витнемс кавто ФАП-тнень.
Вановт ало – Булгакова велесэ ДК-нь строямонь кевкстемась. Мордовиянь Прявтось алтась райононтень лездамс коммунальной техникань рамамосо.
Сессиядонть мейле Артём Здунов ванкшнызе «Норов» компаниятнень группань элеваторонть – тесэ молить строямонь тевть сонзэ реконструкциянть коряс. Компаниятнень группась топавты инвестициянь проект сюронь обработкань комплексэнь строямонть коряс – сонзэ ушодызь мелят. Производствань истямо комплексэнть строямось лезды предприятиянтень аволь ансяк редявиксстэ кастомс прибыленть седе вадря качествань продукциянь нолдамонть вельде, истя жо теемс важодемань од таркат.
Мордовиянь Прявтось Артём Здунов ваннызе, кода моли строямось. Инвестпроектэнь вейсэнь питнесь 500 млн целковойть, сонзэ арсеви топавтомс ниле иетнень перть.
«Норов» компаниятнень группань правлениянь председателесь Александр Поздняков ёвтнесь республикань Прявтонтень: комплекссэнть топавтови сюронь, бобань ды масличной культуратнень примамонь, обработкань ды ванстомань пешксе циклась, неень шкантень ладиця оборудованиясь лезды нолдамс вадря уровенень продукция.