МР-нь Государственной Собраниясо ютась промкс. Сон алтавсь «Школа молодого политика» проектэнть панжомантень. Те проектэсь «Единой Россиянь Од Гвардиянть». Сонзэ вельде од ломантнень эйстэ кастыть лидерт. Политикень школась ушодсь важодеме 2015 иестэ саезь, сон мольсь «Од депутатонь школа» лементь ало, тензэ явсть мель 16–35 иетнесэ активисттнэ.
«Од политикень школань» панжомо сакшнось МР-нь Прявтось, «Единая Россия» партиянь региононь отделениянь секретаресь Артём Здунов. Сон ледстинзе РФ-нь Президентэнть валонзо, кона кортась од ломанень политиканть эрявиксчидензэ. – Ютыть 10–20 иеть ды тынь, течинь од ломантне, сатадо властентень. Школань тонавтомань программась лезды тенк чарькодемс сеть тевтнень, конат молить неень шкане. Масторсонок аволь весе общественной вейсэндявкстнэ ветить алкуксонь ды виде важодема, улить истят, конат омбо масторонь ярмак лангс бажить калавтомс общественно-политической тевтнень. Проектсэ тонавтнемась лезды тенк арсемс эсь тевенк, совавтомс сынст эрямос грантонь лезксэнть вельде. Кеман, карматадо од ломантнень ютксто лидерэкс аволь ансяк Мордовиясо, Россиясояк. Минь карматано тенк лездамо, тынь – кадрань резерва, – кортась МР-нь Прявтось. Од ломантненень пшкалесь МР-нь Госсобраниянь Председателесь, «Единая Россия» партиянь региононь отделениянь секретарень васенце полавтыцясь Владимир Чибиркин. «Минь бажатано теемс Од политикень школань программанть мельстуицякс, лезэвекс ды виевекс», – мерсь В. В. Чибиркин. «Единой Россиянь Од гвардиянь» региононь штабонь ветицясь Данил Ульянов домкасто ёвтнесь седе, кода карми молеме тонавтнемась. Истя, кавто ковонь перть кармить 15 вастовомат ниле ёнксонь коряс: «Политика», «Медиа», «Добровольчество», «Социальное проектирование». Эрьвасонть ютавтовить региононь политиктнень пельде лекцият. Теде башка, кинолекторийть, дискуссият, мастер-класст, экскурсият ды седе тов. Од политикень школасо тонавтницятненень максыть содамочить политологиянь, социологиянь, экономикань, риторикань, этикань ды эсь брендэнь невтемань коряс. Тонавтнеманть прядомадо мейле од ломантне содавтсызь Россиянь Государственной Думанть ды Федерациянь Советэнть. Сехте виевтне саевить «Единая Россия» партиянь региононь отделениянь кадрань резервав.
Татьяна Маторкина