Сентябрянь 4-це чистэ МР-нь Государственной Собраниянь депутаттнэ пурнавкшность 7-це тердемань 27 сессияс. Тосо ульнесь Мордовиянь Прявтось Артём Здунов. Чинь повесткас совавтозельть вейксэ кевкстемат, конат алтавсть эрямонь эрьва кодат ёнкстнэнень.
Сессиянть панжизе ды ветясь МР-нь Госсобраниянь Председателесь Владимир Чибиркин. Васенцекс ванкшновсь республикасо административной ответственностень коряс закононтень полавтоматнень совавтомадо кевкстемась. Сонзэ коряс кемекстазь кемень тевть, конат кармить лововомо административной правонарушениякс. Ней чумондовомо кармить сеть, кить ламоквартирань кудотнесэ веть коласызь сэтьмечинть.
Депутаттнэ кемекстасть закон, конань коряс республикань авань капиталонть мереви ютавтомс седе келейстэ. Невтемакс, мереви сынст ютавтомс минсенек масторсо нолдавт автотранспортонь рамамс.
Республикань высшей законодательной органонь представительтне вейке мельсэ максызь вайгелест «Об установлении в Республике Мордовия Дня ветеранов боевых действий» закононть кемекстамга. Сон эрьва иестэ карми тешкставомо июлень 1-це чистэ.
«Правительствань часонь» шкастонть тейсь доклад МР-нь Экономикань, торговлянь ды предпринимательствань министрань тевтнень топавтыцясь Иван Горин. Сон пачтясь Мордовиянь социально-экономической невтевкстнэде, конат теезельть те иень васенце пельксстэнть. Иван Горин тешкстась, неень шкане прявт тевекс ашти зарплататнень кепедемадо кевкстемась. Сонзэ валонзо коряс, неень шкасто сехте покшт зарплататне Рузаевкань районсо, мельгаст моли Лямбирень районось, колмоцесэ – Чаунзань районось.
Республикань образовательной учреждениятнень тонавтнемань од иентень анокстамодо пачтясь МР-нь Образованиянь министрась Елена Солдатова. Елена Петровна башка мель явсь образовательной учреждениятнесэ эйкакштнень ванстомантень, сынст туртов паро условиятнень теемантень. Сон ёвтнесь сеть дополнительной мератнеде, конат меельце колмо иетнестэ кемекстазельть образованиянь объекттнэсэ кажотнень а нолдамга. Истя, мелят тень туртов явозельть 46,4 млн целковойть, те иестэ эштё 39,8 млн целковойть. Неень шкасто сынст автобусонь автопарксонть – 258 единицат, иенть прядовомс минек регионс сыть эштё 25 автобуст.
Седе тов докладонь теицятненень максозельть ламо кевкстемат, конатнень коряс сынь макссть каршо валт.
Валентина Юдина