МР-нь ЦИК-сэ ёвтызь вайгелень максомань вейкине чинь цётамотнень. Мордовиянь Избирательной комиссиянь председателесь Александр Косов тешкстась, кочкамотне ёвтазь видекс. Теке марто сон мерсь, неень шкань Мордовиянь кочкамотнень историясо васенцеде республикань Избиркомс эзь са вейкеяк пеняцямо.
– Кочкамотне ютасть законодательствань весе ёнкстнэнь кирдезь. Те сехте неявикс ды виде кочкамот, – мерсь Александр Косов.
Тешкстасынек, сентябрянь 10-це чистэ ютавтовсь вайгелень максомась Луховкань вейке мандатонь кочкамонь 16-це № куросо Мордовия Республикань Государственной Собраниянь депутатонь, Энергетической вейке мандатонь кочкамонь 10-це № куросо Саранск ошонь депутатонь Советэнь депутатонь дополнительной кочкамотнень коряс. Истя жо ульнесть дополнительной кочкамот муниципальной 6 районтнэсэ ды 21 велесэ, косо кочкасть представительной органтнэнь 29 депутатт.
Весемезэ ульнесь депутатонь 31 чаво мандат, конатнень топавтомга эсь мелест ёвтакшнызь парламентэнь ниле партиятнень представительтне. Муниципальной кочкамотнесэ истя жо участия примасть самовыдвиженецтнэ. Региононь Избиркомонь председателенть Александр Косовонь валонзо коряс, кочкамотнесэ ульнесь кинень пелькстамс.
– Депутатонь вейке таркантень ульнесть малав ниле кандидатт, – мерсь сон.
Республиканть келес вайгелень максомо сакшность малав 24,91 % учовицятнень эйстэ. Кода мерсть региононь ЦИК-сэ, дополнительной кочкамотнестэ те а берянь невтемат.
Минек республикасо вайгелень максомась ульнесь вейке чинь перть. Икелепелев эсь вайгелест максызь 46 ломанть. Кочкамотнень мельга вансть партиятнень ды кандидаттнэнь пельде 250 наблюдательть. Теке марто кочкамотне ютавтовсть неень шкань технологиятнень тевс нолдазь: 18 таркатнесэ тевс нолдавсть видеорегистрациянь кедьёнкстнэ, 22 участкатнесэ – бюллетентнень ванномань комплекстнэ.
Весементь коряс, Луховкань вейке мандатонь кочкамонь 16-це № куросо Мордовия Республикань Государственной Собраниянь депутатокс кочказь Дмитрий Глушко, кона пурнась 67,59 % вайгельть. ЛДПР-нь региональной отделениянь кандидатось Ирина Королева пурнась 11,75% вайгельть, КПРФ-нь региональной отделениянь кандидатось Михаил Малыгин – 9,61 %, «СПРАВЕДЛИВАЯ РОССИЯ – ЗА ПРАВДУ» региональной отделениянь кандидатось Роман Пивкин – 6,96 %.
Энергетической вейке мандатонь кочкамонь 10-це № куросо Саранск ошонь депутатонь Советэнь депутатокс кочказь «Единой Россиянть» пельде кандидатось Иван Михеев – 60,78 %. Омбоцекс кармась ЛДПР-нь региональной отделениянть пельде кандидатось Александр Киселёв, конань кисэ эсь вайгелест максызь 15,59 % кочкицятне. Седе тов юты КПРФ-нь региональной отделениянть пельде кандидатось Вера Нефедкина (11,76 %) ды меельцесь «СПРАВЕДЛИВАЯ РОССИЯ – ЗА ПРАВДУ» региональной отделениянь кандидатось Алексей Шигаев (6,65 %).
– Весементь коряс эряви меремс, 31 мандатонть эйстэ 27 ютасть «Единая Россия» партиянь кандидаттнэнень. Вейке тарка максовсь ЛДПР-нь представителентень. Теке марто кочкавсть колмо депутатт, конатне пряст яволявтокшнызь сынсь, – кемекстызе Александр Косов.
Юлия Еремина