Мордовиясо кавто недлянь перть ульнесь «Культура» телеканалонь съёмочной группась. Сынь важодсть «Земля людей» проектэнть лангсо. Сонзэ вельде арсеви невтемс Россиясо эриця вишка раськетнень течинь эрямост: кода ванстовсть койтне-кирдатне, культурась, кода эрить ломантне. Творческой коллективесь пачколесь минек масторонь эрьва кодамо васоло таркатнес, ульнесть карелтнэнь, вепстнэнь, манситнень кедьсэ, содавтызь челканецтнэнь, лакецтнэнь, эвенкитнень ды ламо лия раськетнень.
«Земля людей» проектэнть теицятнень республикань эрицятне дивавтызь эрьва мейсэ. Сынь кунсолость эрзятнень ды мокшотнень ламо вайгельсэ морамонть, неизь, кода викшнить, кодыть карть, кевердить кемть, керсить чувтосто, ульнесть кузницясояк, косо теить сюлгамо, якасть эрзянь келень урокс, вансть свадьба, варчизь минек раськень тантей ярсамопельтнень.
Орданьбуесэ съёмочной группась ульнесь Надежда Володинань кедьсэ, кона викшни эрзянь мазый оршамопельть, цёразо тейни сюлгамот. Якасть Орозбиев кемень музеев ды совсесть инжекс Аксёновтненень, конат кевердить ды викшнить кемть.
Покш Игнатбуень Андрелесэ инжетненень невтсть свадьба – одирьвань рамамонь коенть. Сонзэ анокстызь «Истоки» фольклорной ансамблясь, Культурань кудонь, библиотекань важодицятне, школань тонавтницятне ды велень эрицятнеяк.
– Коенть ушодкссто одтнэнь малавиксэст якить наряжазь палка марто, тердить самс покш чив. Одирьванть кудов самсто мирденть ёндо малавикстнэ морыть кшиде-брагадо. Кузтемапрясо гайги лия моро – сваханть пельде, – ёвтни библиотекаресь, «Истоки» ансамблясо морсицясь Елена Мамаева.
Седе тов свадьбась юты одирьванть кудосо. Свахатнень кедьсэ кши ды пазават.
– Эрзякс морот умок морсетяно. Ансяк вана федеральной каналонь камерас тень теемс – талновтовтыця тевесь. А мезть сёпомс, васня пек талнынек. Лиссь жо теке алкуксонь свадьбасо, – пачтясь свахань роленть налксицясь Раиса Шунеева.
«Истоки» ансамблянь седицясь Пётр Мамаев тешкстась, неень шканеяк свадьбань кезэрень койтнень а стувтнить. Мезе-а мезе ютавтыть. Фильмань теицятнеяк съёмкатнеде мейле мерсть, келя, эрзянь свадьбань коесь тусь мелезэст, сон мазый, гайгить ламо морот, весе оршазь раськень оршамопельсэ.
Седе тов инжетне якасть Чукало велев, косо ютавтовкшны Раськень озкс кенярксчись. Маронть лангсо озноманть невтизе «Пизельне» народной ансамблясь. Истя жо снимизь Вармазейкасто ялакстнэнь Кабаевтнень, конат кадовсть эрямо ды важодеме чачома модаст лангсо. Кортнесть Римма Жегалинань марто, сон ёвтнесь эрзянь культурань тевтнеде, моротнеде ды седе, кода келесь невтеви Интернетсэ.
Дубёнкань районсо «Земля людей» фильмань теицятне вастневсть Кобалень мекшень кирдицянть Николай Фомин марто. Кенде велень «Эрзянка» ансамблянь аватне ёвтнесть тосонь ламо лисьмапрятнеде. Невтизь, кода кезэрень эрзятне ютавтнесть веденть лангсо озкст. Пачтясть свадьбасо тевс нолдавиця кедьёнкстнэде (атрибутикадонть). Дубёнкань районсо каванявсть эрзянь раськень эрьва кодамо ярсамопельде.
Меельцекс группась пачколесь Торбеевань ды Теньгушевань районтнэс, косо эрить шокшатне, сыньгак невтизь сюпав коест-кирдаст.
Саранскойсэ ютасть съёмкат Г. И. Сураев-Королёв лемсэ «Келу» фольклорной ансамблянть марто. Покш кортамо сёрмадсть этнографонть, историянь наукань докторонть, профессоронть Г. А. Корнишинань марто. Сон домкасто ёвтнесь эрзятнень ды мокшотнень эрямодост, койдест-кирдадост.
Инжетненень пек мельс тусь Мордовиясо улемаст. Кавто недлятне, валост коряс, ливтязь ливтясть. Эрьва косо вастсть лембестэ, ломантне мельспаросо ёвтнесть койдест, невтнесть минек культурань сюпавчитнень. Ней карматано учомо фильманть «Культура» телеканалсо Од иентень эли сондензэ мейле.