Октябрянь 4–7-це читнестэ Московсо ютавтовсь «Сырнень сёксь – 2023» Россиянь агропромышленной XXV выставкась. Те иестэ сонзэ ютавтома таркакс васенцеде кармась К. А. Тимирязев лемсэ РГАУ-МСХА-сь, прявт кевкстемась жо – аграрной наукань ды образованиянь виевгавтомась.
«Сырнень сёксь» выставкась – АПК-нь ёнкссо прявт тевтнень ютксто вейкесь. Тесэ ёвтавить отраслянь важодемань цётавкстнэ, невтевить изнявкстнэ, кортыть касомадо-виевгадомадо, ёвтнить опыттэнть. Иеде иес выставкась невти, западонь санкциятне минек а тандавтыть, отраслясонть импортонь полавтомась лездась келейгавтомс АПК-нь продукциянь ламочинть ды вадрячинть.
Мордовиясь, коень коряс, – те выставкань участник. Республикань аграрийтнень продукциянть содасызь региононть томбале.
Октябрянь 5-це чистэ, выставкань официальной панжомань чистэнть, РФ-нь Правительствань Председателесь Михаил Мишустин ваннынзе Россиянь ниле регионтнэнь стендтнэнь: Ленинградской ды Запорожской областтнень, Мордовия Республикань ды Алтайской краень.
МР-нь Прявтось Артём Здунов премьерэнть марто кортамсто тешкстась, республикась яви мель аволь ансяк покш агрохолдингтненень, истя жо хозяйствованиянь вишка форматненень, сынст продукциясь истя жо невтезь Мордовиянь стендсэнть. Михаил Мишустинэнь кевкстеманзо лангс каршо валонь максомсто, республикань Прявтось ёвтнесь, кода регионось лезды фермертнэнень, ды невтинзе фермерэнь хозяйстватнень продукцияст. Мордовиянь фермертнэнь продукциянь башка видтнэ – лиятнень ёнов а молицят. Секскак республикасонть покш лезкс явови фермерствантень ды кооперациянтень.
Фермертнэнь ды личной подсобной хозяйстватнень туртов прявт кевкстематнень ютксто вейкесь – нолдазь продукциянь миемась. Республикасонть меельце колмо иетнестэ кармась редявиксстэ виевгадомо велень хозяйствань кооперациясь – те покш агробизнесэнть марто конкуренциянь лувсо вишка производительтненень лездамонь прявт инструмент. Кооперациясь токши аволь ансяк велень хозяйствань производствань ёнкстнэнь, истя жо мекшень кирдемань продуктатнень нолдамонть, панготнень кастоманть ды лиятнень.
Продукциянь миемасо республикасонть эрязасто ладяви фермертнэнень лездамонь системась. Мордовиянь микшнемань компаниясь лезды фермерэнь хозяйстватненень лисемс региононь томбалев, истя жо Московонь рынкатнес.
Минек республикань стендэнть истя жо ваннызь вице-премьерэсь Виктория Абрамченко ды Россиянь велень хозяйствань министрась Дмитрий Патрушев.
«Минь теинек редявикс эскелькс велень хозяйствань кооперациянь, хозяйствованиянь вишка форматнень виевгавтомасо, – мерсь Артём Здунов. – Келейгавтовить рынкатне Московсо, Нижней Новгородсо, регионтнэнь коряс минек шабратнень. Мезесь токши органической продукциянть – тесэ рынкась певтеме: те аволь ансяк минек масторонь прявт ошось, истя жо арабонь мастортнэ. Секскак республикань Велень хозяйствань министерстванть туртов, весе минек хозяйстватнень туртов прявт тевесь – касомс-кепетемс».
Мордовиянь стендсэнть невтезель 13 прявт предприятиятнень продукциясь, башка экспозициясь алтазь фермерэнь ёнксонтень – тесэ истя жо ламо мезе тантей ды лиятнень ёнов а молиця. Невтемакс, Теньгушевань районсто «Мардарика-Шокша» велень хозяйствань потребительской кооперативень сеянь ловсосто сырась.
Теке жо чистэнть выставканть лувсо ютавтовсь пленарной промкс, тедеде сон алтазель «Инвестиции в будущее: современный взгляд на аграрное образование» прявт кевкстемантень. Мордовиянть пельде тосо ульнесть республикань Прявтось Артём Здунов ды велень хозяйствань ды продовольствиянь министрась Антон Илюшкин.
Пленарной промксонть панжизе РФ-нь Правительствань Председателесь Михаил Мишустин.
«Кода тешкстась Россиянь Президентэсь – минек масторось – масторлангсонть аграрной продукциянь прявт пачтицятнень ютксто вейкесь ды невтизе эсь прянзо кода кемевикс партнёр. Минь аштетяно каштанчисэ Россиянь агропромонь цётавкстнэнь кувалма. Истят изнявкстнэ – те ломантнень путовксост, конат важодить те ёнкссонть. Продовольствиянь безопасностень прявт невтевкстнэ топавтозь, башкатне икельдязь – сюронь, сахаронь, чиньжарамонь оень, сывелень, калонь коряс. Редявикс эскелькс теезь логистикасо, переработкасо, семеноводствасо, селекциясо. Тешкстаса, аграрийтне нежедить масторонь аравтлувтнень лангс, неень шкань внешней киртямотнень лувсо – те эрявикс эскелькс масторонь технологической суверенитетэнь кемекстамонть туртов», – мерсь Михаил Мишустин.
Премьер-министрась ёвтась сюкпря аграрийтненень сень кисэ, мезе сынь теить минек ине масторонь эрицятнень туртов. Сон истя жо ёвтась поздоровт весе тонавтыцятненень ды наставниктненень – прявтось: масторсонть ветявозо сеть специалисттнэнь анокстамось, кить анокт максомс каршо вал вандынь чинь вешематнень лангс.
Михаил Мишустин кортась Мордовиянь алашань
кирдицятнень марто
Мордовиянь Правительствань Председателесь Михаил Мишустин «Сырнень сёксь» выставканть шкасто ваннызе племань ракшань кирдемань павильононть.
Мордовиянь алашань заводось свал невтневи ракшатнень экспозициясонть. Тедеде выставкантень ускизь Бразилия лемсэ алашанть. Сонзэ сталмозо 890 килограммат!
Россиянь Правительствань Председателесь явсь башка мель Мордовиянь алашанть лангс ды кортнесь республикань ракшатнень кирдицятнень марто.
«Ней Ицялонь райононь «Агропромсервис» предприятиясонть кирдевить советской тяжеловозонь породань 120 ламо алашат. Те породась – Россиянь алашань кирдицятнень каштанчист. Ицялонь райондонть башка истят виев ракшатнень племась ули масторонь алашань кирдемань ансяк кавто заводтнэсэ. Бразилия алашась – сехте покш ды виев», – ёвтнесть «Агропромсервис» предприятиянь прявтось Владимир Нужнов ды алашань кирдемань коряс прявт зоотехникесь Данил Беззубов.
Эряви ёвтамс, выставкасонть предприятиясь казевсь сырнень медальсэ.
Отяжелень райононь администрациясь изницятнень ютксо
Агропромышленной выставканть юрсо сырнень медальсэ тешкстазь Отяжбуень администрациясь велетнень весемеёндонь виевгавтомань коряс покш цётавкстнэнь саеманть кисэ. Зярыя иетнень перть тесэ ютавтовсть покш важодемат витнемань-вадрялгавтомань ды велетнесэ культурань, спортонь, социальной обеспечениянь систематнень виевгавтоманть туртов условиятнень тееманть коряс. Невтемакс, Отяжеле велесэ строязь ведень пачтямонь системат, посёлкасонть – социокультурной куншкакуро ды спортонь площадка, ули Интернет ды истя седе тов. Весе те топавтозь эрицятнень ушодксост, государстванть, региональной власттнень ды местной администрациянть лезксэст вельде.
Покш казнесь максовсь Отяжелень райононь прявтонтень Константин Николаевнень.
Тедеде «Сырнень сёксь» агропромышленной выставкась минек республикань аграрийтнень туртов кармась алкукс сюпав. Сынст трудост тешкставсь 25 сырнень медальсэ. Казнетне максозь «ЛВЗ «Саранский», «Сармич», «Сыродельный комбинат «Ичалковский», «Агропромсервис», «МПК «Атяшевский», «ТКМ» ООО-тненень, «Птицефабрика «Чамзинская» АО-нтень.
Истя жо покш казнесэ тешкставсть: «МордовияГосПлем» АО-сь – сырнень медаль ды диплом товарной ды племенной животноводствань покш невтевкстнэнь кисэ, Артём Сергеевич Петров (агростартап (Иван-чай) – сиянь медаль, Наталья Васильевна Филина (агростартап (вешенка пангот) – бронзань медаль, «Подворье» кооперативесь – бронзань медаль.