Республикань паксятнесэ прядовсь сюротнень нуемась. Озимойтне видевсть, моданть анокстыть-кавшакавтыть тунда видемантень, лия культуратнень алов. Районтнэсэ ушодсть таргамо ламбамо якстерькаенть ды ускомонзо заводов. Кода молить паксянь тевтне «Птицефабрика «Атемарская» ОАО-со, теде тенек пачтясть тосонь важодицятне.
– Иесь вадряль. Весемесь чачсь-кассь парсте, кецявтымизь минек, аграрийтнень. Паро, эрьва иестэ бу улевельть истят невтевкст. Сюротнеде ды бобовойтнеде пивсынек малав 34 700 тоннат. Те – товзюро, шуж, кснав. Урожайностесь вейке гектарсто 43 центнерт. Сюкпря ёвтавлинь важодицятненень, – ёвтни «Птицефабрика «Атемарская» ОАО-нь прявтось А. В. Щемеров.
Седе тов минь сыргинек паксяв. Маряви, паксянь тевтне зярдояк а прядовкшныть. Тесэ вастымизь «Птицефабрика «Атемарская» ОАО-нь растениеводствань коряс прявтонь полавтыцясь Сергей Сотов.
– Сергей Иванович, тынк предприятиянть малав 13 тёжат гектарт моданзо. Кодат невтевкст тедеде ульнесть? Мезе кадовсь пурнамс?
– Сюротнеде видекшнынек 8 тёжат гектарт. Пурнынек малав 35 тёжат тоннат. Кснавось тедеде пароль – гектарсто 46,5 центнерт, озимой товзюрось – 40 центнерт, яровоесь – 55 центнерт, шужось – 40. Сюронть нусть кемготово комбайнат. Сень лангс апак вано, кодат тесэ модатне, кевнеть ды щебёнка – невтевкстнэ пек парт. Читне манеельть, сатышка пиземетькак ульнесть, минськак путынек виенек, секскак урожаесь вадря. Ней кадовсь андомс моданть минеральной удобрениядо, таркань-таркань кавшакавтомс сонзэ. Озимойтнеде видинек 2870 гектарт. Октябрясто кундатано ламбамо якстерькаентень. Зярс сон кадык касы, седе ламо пурны ламбамочи. Тедеде колмоцеде ледтяно ламо иень тикшетнень. Эйстэдест видезь 900 гектарт.
Неть читнестэ лисинек нуеме сюрокс кукурузанть. Виднинек 1477 гектарт. Модатне Лямбирень ды Покш Березникень районтнэсэ. Весемезэ кармить нуеме сисем комбайнат. Ютксост «Акрос-585» комбайнатне. Васенце бункерэнть пештямодо мейле урожайностесь невтсь 90 центнерт вейке гектарсто. Те васенце невтевкст, седе тов, арсян, цифратне седе покшт кармить. Видезель «Далма» венгерской гибридэсь. Потмозо кенерсь парсте, нетьксэсь коськсь. Летькечизэ – 31 %. Самай сась шка сонзэ пурнамс. Кукурузанть усктано костямо. Седе тов пачтяви утомс. Сон туи саразонь андомс фуражокс. Човоряви шуж ды товзюро марто, тееви кормосмесь. Минек васенце тевенек – куроксто, пиземетнеде икеле, сонзэ нуемс. Механизаторонок улить, эсь тевест содасызь парсте.
С. И. Сотов чачсь Чаунза буень Покш Маризь велесэ. 2001 иестэ прядызе школанзо ды тонавтнема таркакс кочкизе Н. П. Огарёв лемсэ МГУ-нь Аграрной институтонть. Тонавтнесь «агрономия» специальностенть коряс. Вуздо мейле поладызе тонавтнеманзо аспирантурасо. Ансяк эзизе прядо. Урьвакстсь, кармась роботамо. Важодемань васенце таркакс ульнесь «Мордовский бекон» предприятиясь. Седе тов ютась «Сабанчеевское» ООО-в. 2014–2021 иетнестэ роботась «Агро-Атяшево» предприятиясонть. 2021 иестэ саезь – птицефабрикасо. Весе неть таркатнесэ сон важодсь ды нейгак важоди растениеводствань коряс прявтонь полавтыцякс. Зярдо лисемс сокамо, видеме, удобрениянь почодомо, тикшень ледеме, сюротнень нуеме – соды ансяк сон. Улезт ансяк вакссонзо лездыцянзо, лия важодицятне. Меельце шкане птицефабрикав састь роботамо зярыя од ломанть. Ютксост, саемга, Евгений Викторович Трошкин комбайнёрось.
– Мон чачинь Отяжбуень Сабанцелесэ. Тонавтнинь Саранскоень 36 № училищасо радиоэлектронной аппаратурань монтажникекс. Уш школасо тонавтнемстэ саезь роботынь колхозсо. Ардтнинь Москововгак, важодинь «Тепличное» АО-сояк. Васенце ие, кода роботан птицефабрикань паксятнесэ. Сюротнень нуемась ютась парсте. Ней карминек пурнамо кукурузанть. Сонзэ видьмекстнэ покшт, бункерэсь седе курок пешкеди, ансяк кенерть ардомо, – ёвтни цёрась.
Васенце кизэ комбайнёрокс роботы Андрей Игоревич Масловгак. Сон чачсь теске, Атемарьсэ. Школадо мейле мольсь тонавтнеме Саранскоень Кооперативной институтов. Васенце семестранть тонавтнизе ды тусь служамо армияв. Сайнесь академической отпуск. Велявтсь, одов поладызе тонавтнеманзо. Теде мейле заочна прядызе Кемлянь аграрной колледженть, тонавтнесь инженерэкс-механикекс. Важодсь «Тепличное» АО-со механизаторокс. Ней ютась тей ды а янкси. Масловтне – ламо эйкакшонь триця семия. Нинзэ марто трить-кастыть колмо эйкакшт. Покшонтень 11 ие, омбоцентень – 3, сехте вишкинентень ие топодсь. Эрить Саранскойсэ. Весе важодицятнень роботамо ускси предприятиянь автобусось.
Юрий Иванович Горин умок уш тесэ важоди комбайнёрокс. Валонзо коряс, роботы 2000 иестэ саезь. Тесэ важодсть тетязо-авазо, роботы ялаксозо ды сонзэ эйкакштнеяк. Кие – паксясо, кие жо – птичниксэ.
Александр Иванович Ивашкин – машинно-тракторной парконь механик. Сон ваны сень мельга, кодамо техника нолдамс линияв, улезэ сон маштовикс, чары лангсо.
– Комбайнатнень ды трактортнэнь витнетяно видьстэ паксясо. Истя седе курок. Ули башка УАЗикенек, косо ашти запчасть марто эрявикс оборудования. Бути мезеяк калады – сеске кундатано тевс минь. Шканть таргсемс а зярдо, цёратне учить, – ёвтни Александр Иванович. Сон зярыя иеть роботась Отяжбуесэ механизаторокс, водителекс, ней ютавтызь механикекс.
Техниканть витнить колмо ломанть, ютксост сварщик, электрик ды мастер-наладчик. Эрси, зярдо яжавксонть витьсызь вете минутас, лиясто – чинек-венек котьмить. Зярдо минь ульнинек паксясо, цёратне витнесть тикшень ледиця комбайнанть. Паксянь тевтне а учить…
Татьяна Маторкина
Фототне Эдуард Ретунскиень