Республикань велень хозяйствань предприятиянь паксятнесэ моли ламбамо якстерькаень урядамось. Те культуранть видемань ёнкссонть сехте пек важодить Мордовиянь агропромышленной объединениянть (МАПО) юрс совиця хозяйстватне. Неть: Отяжелень райононь «МАПО «Восток», Орданьбуень «МАПО «Ардатов» ООО-тне (тезэ истя жо сови «Светлый путь» СХПК-сь), Ромодановань «ООО МАПО и К» ТНВ-сь, «АПО Элеком» ОАО-сь ды лиятне, Покш Игнатовань «8-ое Марта» ООО-сь, истя жо Лямбирень, Чаунзань ды Кочкуровань районтнэнь зярыя предприятиятне.
Весе сынь кеместэ важодить «Ромодановосахар» ООО-нть марто, конась ловови сахаронь нолдыця сехте покш предприятиякс Равчиресэ ды сови Россиянь кемень содавикс заводтнэнь юткс. Сонзэ прявтсо вана уш малав комсь иеть ашти эрзянь цёрась, виев аграрникесь Александр Иванович Атласов. Предприятиянть неень шкасто важодемадонть ды весенень истямо вечкевикс ламбамо ярсамопелень нолдамонь салавачитнеде минь кортынек «Ромодановосахар» ООО-нь сырьянь коряс прявтонь полавтыцянть Виктор Владимирович Захаркинэнь ды предприятиянь важодицятнень марто.
Кода ёвтнесь Виктор Захаркин, минек республикасо ламбамо якстерькайденть тедеде видезь 23 200 гектарт. Весе таргамс сонзэ арсеви октябрянь меельце читнес.
– Бути ламбамо якстерькаенть урядасынек те шкантень – те пек паро, – корты Виктор Владимирович. – Ней якстерькаесь уш кенерсь, сахаронть пурнась сатышка, переработкас сон моли вадрясто. Эйстэнзэ лиси ламо ды вадря сахар.
Кода мерсь Виктор Захаркин, ней паксятнесэ важодить 30 комбайнат. Чинек-венек урядыть 600 гектарт. Сутказонзо якстерькаень примамонь пунктс усковить 7,5-8,5 тёжат тоннат. Бути тевтне кармить молеме кемекстазь аравтлувонть коряс, январьстэ ламбамо якстерькаенть коряс весе тевтне прядовить.
– Эряви ёвтамс, паксятнестэ якстерькаенть усксемасо важодить аволь ансяк эсенек республикань транспортонь предприятиятне, машинат сиведтяно ве ёндояк. Истя, эсест машинасост тесэ важодить Нижегородской, Пензань областтнень, Дагестан Республикань, Ставропольской краень, Ростовонь, Курскоень ды лия регионтнэстэ водительтне.
«Ромодановосахар» ООО-сонть улемстэ минь содавтынек центральной ЦПУ-нть. Тосо важодить диффузиянь оператор, выпариваниянь аппаратчик ды дефекосатурациянь аппаратчик. Сынст важодеманть мельга ваны сменань прявтось. Вана уш кемгавтово иень перть 2-це № сменань прявтонь тевенть тесэ топавты Александр Владимирович Гробушкин. Заводсонть сон роботы кемнилее иеть, ушодокшнось сменань прявтонь полавтыцякс, важодсь кавто иеть, весементень тонавтнесь. Сонзэ ёрокчинть редизь ды аравтызь прявтокс.
– Минь тесэ ваннотано сахаронь анокстамонь технологической тевенть. Лиякс меремс, вановтонок ало производствань весе лувось: якстерькаенть ускомазо, шлямозо, диффузионной аппараттнэсэ соконь ливтемась, сонзэ ванськавтомась, летькечинть валгстомась ды пидемась. Весе те тевенть мельга вантано компьютертнэнь вельде, – ёвтни Александр Гробушкин.
Александр Владимировичень вановт ало важодить 54 ломанть. Вейкесь эйстэст – Андрей Владимирович Финаев. Сон роботы диффузиянь операторокс. Предприятиясонть уш аволь вейке кементь иеть. Ушодокшнось подъёмникень машинистэкс, мейле важодсь шлямонь цехсэ операторокс ды ней тесэ.
– Диффузиясонть моли якстерькайстэ сахаронть ливтемазо: каяви човазь якстерькаесь, лангозонзо валови пси ведь, весе те човоряви ды сахаронь молекулатне ютыть ведентень, – ёвтни Андрей Финаев. – Минь жо бажатано, штобу те сокось улевель вадря. Весементь мельга вантано компьютерсэ, лиясто жо эсь сельмесэяк.
Ванськавтомадо ды фильтрациядо мейле сокось, конась уш теевсь сиропокс, пачтяви вакуум-аппараттнэс, тесэ моли сахаронть пидемазо.
– Цехсэнть лововить кото вакуум-аппаратт васенце продуктанть туртов, ниле – омбоце ды колмо – колмоце продуктанть туртов, – ёвтни Александр Гробушкин. – Невтемга, аппаратсонть сиропонть пидизь кода эряви, сахарось кассь. Теде мейле ванныть сахаронь кристаллонть – невтематнень, покшчинть, вейкетьксчинть. Седе тов сахарось юты центрифугатнес ды костямонь цехс. Тосо вадрясто костяви, пештяви бункертнэс ды юты упаковкас.
Вакуум-аппараттнэнь цехсэнть весе важодеманть мельга истя жо ваныть компьютертнэнь вельде.
– Зярдо ушодынь тесэ важодеме, 25 иеде икеле, аппараттнэ ульнесть овсе лият. Ней тесэ неень шкань од оборудования, производствась автоматизированной. Кедьвийсэ важодема овсе арась. Те пек шождалгавтызе тевенек, – ёвтни утфелень пидемань аппаратчикесь Надежда Сергеевна Теплухова.
Васенце продуктань пидемань аппаратчикекс предприятиясонть важодить Татьяна Александровна Альянова ды Наталья Александровна Шарахина.
– Компьютертнэ – те вадря, ансяк эсеть сельметненень седе кемат, – корты Наталья Шарахина. – Те цехсэнть важодян 2015 иестэ саезь. Ды ней уш пек парсте чарькодян теевиця продукциянть вадрячинзэ. Секскак, зярдо невтематне мелем коряс, кадан весементь, кода невти компьютерэсь. Бути мезеськак мелезэнь а тукшны, теян полавтомат. Ды весемесь лиси, кода эряви.
А вана Светлана Егоровна Фирсова предприятиясонть важоди 2-це № сменань инженерэкс-химикекс. Сонзэ вановт ало весе технологической процессэсь.
– Монь тевем ванномс ливтезь соконть ды сиропонть тюсост ды вадрячист. Штобу весемесь улевель кемекстазь технологиятнень коряс, – ёвтни Светлана Егоровна. – Инженерэнь-химикень таркасонть важодян нилеце ие. Теде икеле кемгавксово иень перть ульнинь дефекосатурациянь аппаратчикекс. Од тевсэнть ламосо тень лездасть Сахаронь промышленностень колледжсэ получазь содамочитне ды мартон важодиця лия сменатнень инженертнэнь-химиктнень тонавтоматне. Покш сюкпря тенст, аламонь-аламонь весементень тонавтнинь. Ней эсь тевем содаса педе-пес.
Сахаронь теемань-анокстамонь меельце таркась – кескавга пештнемань цехесь. Тесэ важодемась ветяви сменасо, чинек-венек лововить ниле сменат. Минь вастовкшнынек васенце сменань тейтерь-аватнень марто. Эйстэдест важодсть кавксо ломанть.
Кода ёвтнесь кескавтнень пештнемань цехень мастерэсь, эрзянь авась Мария Ивановна Нугаева, аватнень прявт тевест тесэ – пештямс кескавтнень, путомс эрявикс биркат (сёрмадови кескавонь сталмось, производствань таркась, сменань номерэсь ды седе тов), стамс кескавонь кургонть. Весементь тень топавтозь, сахардо пештязь кескавтне молить складов.
– Тесэ важодицятнень специальностест – онкстницят ды зашивальщикть. Эрьвась эйстэст вейке минутас пешти-сты кавксо кескавт, – ёвтни Мария Нугаева. – Аватненень лездыцякс аштить аппараттнэ. Веенстнэ лездыть сахаронь пештнемасонть, сынст эйсэ программанть вельде ладяви зяро килограммат эряви пештямс. Лиятне стыть биркатнень ды кескавонь кургонть. Важодицятне тевест содасызь, мельде-валдо шканть а ёмавтнить. Умок уш тесэ роботыть Т. Д. Арсланова, Л. А. Шибаева, В. А. Калачева, Е. И. Калинина.
Кода тешкстась Мария Ивановна, меельце шкастонть вейке сменас (8 часос) пештязь-нолдазь 9170 кескавт, эли 458,5 тоннат сахар. Чинек-венек нолдазь 26870 кескавт, эли 1343,15 тоннат сахар. Ансяк ваннынк неть цифратнень. Те покштояк покш робота, конань топавтыть алкуксонь важодицят, тевде а пелиця ломанть.
Юлия Еремина
Фототне Эдуард Ретунскиень