Республикань велень хозяйствань предприятиятнесэ прядовома лангсот весе тевтне сюронь нуеманть-урядамонть коряс. Ней уш кундасть ламбамо якстерькаень таргамонтень. Кодамо чачсь сюрось тедеде, зяро пурназь ды кода мольсть весе тевтне, миненек ёвтнесть «Мордовское агропромышленное объединение «Восток» ООО-сонть, конась важоди Отяжелень райононь Ламбаське велесэ. Кода тешкстась хозяйствань прявтось Александр Владимирович Трошин, сюротнень нуеманть неть читнестэ прядызь, ансяк тевтнеде эштё ламо.
– Сюротнень нуеманть неть читнестэ прядынек, ней жо весе вийтне максозь ламбамо якстерькаень таргамонтень-усксемантень, сы иень видеманть алов паксятнень анокстамонтень. Эряви меремс, теле лангс озимой сюротненьгак весе видинек. Эйстэдест малав 5 тёжат 300 гектарт, – ёвтни Александр Трошин. – Бути жо кортамс тедедень урожаенть коряс, тешкстаса, иесь удалась. Сюрось чачсь ламо ды вадря. Таркань-таркань паксятнестэ гектарсто саинек малав 80 центнерт. А мезть сёпомс, истямо урожай умок арасель.
Те иестэ «МАПО «Восток» ООО-со сюротнень ды лия культуратнень алов явозель 18 206 гектарт мода. Тень ютксо видезельть 1810 гектарт шуж, 3116 гектарт яровой товзюро, 4672 гектарт озимой товзюро, 355 гектарт ликша, 2002 гектарт кснав ды 105 гектарт сюрокс кукуруза. Теке марто хозяйствань паксятнесэ видезельть 509 гектарт лияназ, 507 гектарт соя, 141 гектар рапс, 451 гектар силосокс кукуруза. Истя жо видезельть малав 200 гектарт веиень тикшеть, малав 900 гектарт – ламо иень. Те иестэ 3005 гектарт максозь ламбамо якстерькаенть алов.
Сюронь нуемань-усксемань тевтнесэ важодсть хозяйствань сехте ёроков механизатортнэ ды тевест вадрясто содыця специалисттнэ. Техникаськак предприятиясонть весе вадря, ламо мезе эрявикс рамазь меельце иетнестэ. Секскак тевтне мольсть шождасто ды мелявкстомо.
– Сюронь нуеманть ушодынек июлень 21-це чистэ. Весе шканть перть паксятнесэ важодсть 19 комбайнат, сюронть усксесть 23 автомашинат, – ёвтни «МАПО «Восток» ООО-нь прявт агрономось Николай Иванович Слугин. – Сюрось тедеде чачсь пек вадря, урожайностесь покш. Мон агрономокс роботан малав весе эрямон перть, ней уш 35 иеть, истямо урожай пурнынек васенцеде. Седе покш пельксэсь ванстови эсенек утомтнесэ, зярыя ускинек Саранскоень «Элеваторс». Сюрось пек ламо, ков теемс – а содатано.
Кода пачтясь Николай Слугин, тедеде хозяйствань паксятнес видезь яровой товзюрось макссь 59,5 центнерт гектарсто, озимой товзюрось – 54,5 центнерт, шужось – 60,4 центнерт, кснавось – 45 центнерт.
Ней ушодсть урядамо ламбамо якстерькаенть. Зярс урожайностесь невти 450 центнерт гектарсто. Якстерькаенть таргить ниле комбайнат. Весементь бажить эрязасто ускомс сахаронь теема заводов.
Зярдо ульнинек хозяйствасонть, тесэ нусть кадовикс шужонть. Ламбаське веленть маласо паксясонть роботасть зярыя комбайнат. Вейкенть руль экшсэ важодсь предприятиянь сехте ёроков комбайнёрось Владимир Михайлович Шебаршев. Эрзянь цёрась тесэ важоди МАПО-нть теевема шкасто саезь. Свалшкане роботы трактористэкс, сонзэ мельга кемекстазь John Deere тракторось. Техникась виев ды вадря, топавты куш кодамо робота. Сонзэ руль экшсэ механизаторось важоди сокамонь-видемань шкасто. Кизна, нуема шкасто, Владимир Михайлович озакшны комбайнань руль экшс. Те тевенть сон пек парсте содасы. Комбайнасо важодемантень вечкемась чачсь эштё эйкакшокс улемстэ, зярдо тетязо, Михаил Антонович, кона весе эрямонзо перть ульнесь механизаторокс, сюронь нуема шкасто свал саилизе мартонзо лездыцякс. Касозь, цёрась овсе эзь арсе лия профессиядо. Кода тетязояк, эрямонь тевекс кочкизе механизаторонь специальностенть.
Предприятиясонть Владимир Шебаршевень шныть. Эсь тевенть топавты парсте ды содазь. Те иестэ хозяйствань весе комбайнёртнэнь ютксто сон нусь сехте ламо сюро – 25 тёжадо ламо тоннат. Кода мерсь хозяйствань агрономось, истят невтевкстнэ лиссть секс, эдь механизаторось шканть стяко а ёмавтни ды эсь техниканть мельга ваны пштистэ, штобу сон свал улевель анок.
Эштё вейке комбайнёрось, Сергей Иванович Кузьмин, МАПО-сонть важоди истя жо умок, комсте ламо иеть. Кизэнь шкасто лезды нуемань тевтнесэ – роботы комбайнасо, лия шкасто топавты трактористэнь тевенть. Сонзэ лездыцясь – «Беларус-82» тракторось. Сонсь цёрась шабра Тазалестэ. Ансяк Ламбаськенть марто неть велетне умок уш теевсть малавиксэкс ды эрицятнеяк эсь пряст марить теке вейке велень.
– Эсь тевенть пек вечкса. Кадык кортыть, велень хозяйствасо важодемась стака, монень жо сон мелень коряс, – тешксты Сергей Кузьмин. – Ды неень шкань техникаськак миненек пек лезды – сон седе эряза ды превей.
Сергей Иванович марто кортамсто карминек содамо, сонзэ кавто цёранзо – специальной военной операциянь участникть. Вейкесь тердевсь мобилизациянь коряс, омбоцесь жо эзь кадово ве ёнов ды тусь эсь мельсэ. Ды кода мерсь механизаторось, цёратне ванстыть масторонть ды минек сэтьмечинть тосо, сон жо хозяйствань лия важодицятнень марто сыненст лездамга весе эрявиксэнть теить тесэ. Те вейкетьксчисэнть минек виесь.
Паксясто нуезь сюрось сеске ускови тинге лангов. Ды тесэ машинатне васняяк ютыть онкстамотнень лангс, косо онкстави ды тешкстави сюронть сталмозо. Тень мельга пштистэ ваны Елена Васильевна Липатова онкстницясь. Авась весе эрямонзо перть важодсь бухгалтерэкс, секскак цифратнень марто сонзэ важодемась ладязь парсте. Мезентькак а менстясы, весементь ловсы видестэ.
– Минек важодемасо весементь эряви тешкстамс видестэ. Зяро сюро пивсэсть, зяро пачтясть миненек ды зяро седе тов ускозь утомтнес. Неть цифратне весе улест вейкеть, – тешксты Елена Васильевна. – Лиякс а кода.
Эряви ёвтамс, «МАПО «Восток» ООО-со важодить аволь аламо од специалистт. Сынст ютксо од агрономтне Андрей Слугин ды Николай Соломкин. Цёратне прядызь Н. П. Огарёв лемсэ МГУ-нть, ней тонавтнить аспирантурасо. Ансяк Андрей – агрономонь ёнксонть коряс, Николай жо аспирантурасо тонавтни зоотехниянть. Ялатеке агрономокс важодемась тензэ седе мелень коряс.
Нама, важодема лувонть лангс од ломантнень вановтост аламодо лия. Эсь роботасонть сынь седе сеедьстэ тевс нолдыть неень шкань технологиятнень. Ды кемекстыть, важодемасо те пек лезды ды весементь седе шождалгавты.
Юлия Еремина