Те покш тевентень республикасонок алтавсть ламо эрьва кодат мероприятият. А.С. Пушкин лемсэ парксо эйкакштнень туртов ульнесть ламо налксемат, невтевсь пожарно-спасательной техникась, ютавтовсть СВО-нь боецтнэнь лезэс мастер-класст, анокстазель кудоютконь ракшатнень выставка. Нурькинестэ, неть кавто читнень перть «Подвиги» проектэнть тевс совавтыцятне анокстасть мелень витиця покш программа ошонь эрицятненень ды инжетненень. Ледстясынек, те проектэсь топавтови Культурань инициативатнень Президентэнь фондонть лезксэнзэ вельде.
Сентябрянь 17-це чистэ Республикань Культурань кудосо ютавтовсь «Героень шка» народной омбоце премиянь лауреаттнэнь каземань церемониясь.
Премиянь максомань торжественной пельксэнть ушодовомадо икеле невтевсть видеороликть, косо алкуксонь геройтне пачтясть эсь мелест-арсемаст. Теде мейле филармониянь артисттнэ невтсть поэтическо-хореографической пролог.
Официальной пельксэсь ушодовсь Российской Федерациянь Гимнань гайгемасто. Сценанть лангс тердевсь МР-нь Прявтось Артём Здунов. Кода мерсь Артём Алексеевич, премиясь кармась народноекс, тедеде вайгелест максызь малав 200 тёжат ломанть.
– Эрьва ломаненть улить эсензэ героензэ – те тетянок-аванок, ялганок, сеть, кить минек ванстыть, кинень минь кемтяно. Минь теинек те премиянть, штобу улемс паро тевтнень ёно, – мерсь Мордовиянь Прявтось. – Те залсонть течи монь тонавтыцян, ёвтан тенст сюкпря, сынь монь геройть, эдь 90-це иетнестэ кадовсть эсест таркатнесэ, тонавтсть-путсть превс пек ламо вадря ломанть. Лован тень геройствакс – а туемс эсеть фронтсто, эсеть таркасто сехте стака шкастояк. Эряви кирдемс каштанчи тевенек кувалма.
Народной премиясо изницятнень каземадонть икеле Артём Здунов явшесь государственной наградат. Россиянь Президентэнть Указонзо коряс воинской долгонть топавтоманзо пингстэ невтезь мужестванть ды апелемачинть кисэ Мужествань орденсэ куломадонзо мейле казезь старшей лейтенантось Василий Королев – Покш Березникень райононь Эрзянь Найман велесэ чачозесь. Сценанть лангс казнетнень мельга тердевсть авазо, Мария Васильевна, ды низэ, Ирина Петровна.
Российской Федерациянь Президентэнть Указонзо коряс боевой условиятнесэ тевтнень топавтоманть пингстэ невтезь отваганть ды апелемачинть кисэ «За отвагу» медальсэ казезь Покш Игнатовань райононь Ташто Кшуманця велесэ чачозесь Максим Абросимов. Сон чавовсь воинской долгонь топавтомсто. «За отвагу» медальсэ эрзянь цёрась казезь эштё эрямстонзо, ансяк казненть эзть кенере максомс. Чавовозь героенть наградась максозь аванстэнь Светлана Юрьевнанень.
«Герой нашего времени» специальной премиясонть казезь СВО-нь участниктне Алексей Конов, Иван Волков, Миразым Исмаилов, истя жо врачось Кирилл Левкин.
«Герои по призванию» номинациясонть изницякс кармась Людмила Кирдяшова – толонь мадстемань-идемань спортонь коряс масторлангонь кемгавтовоксть чемпионкась ды Россиянь авань сборной командань капитанось, полицейскойтнень ды толонь мадстицятнень ютксо Европань ды масторлангонь налксематнень ламоксть изницясь.
«Герои воспитания» номинациясонть изнясь «Центр детского творчества № 2» дополнительной образованиянь педагогось Дмитрий Глебочкин. Сон анокстась ды ютавтсь спортонь комсте ламо маршрутт, конатнень ютксо Тянь-Шанев, Уралов, Алтаев, Хибинав, Центральной Кавказов. Дмитрий Михайлович тонавтсь, превс путсь ламо од ды виев специалистт, конат ней важодить тонавтыцякс, тренерэкс, МЧС-нь сотрудникекс.
«Герои правопорядка» номинациясонть изнясь Виталий Баранов, кие 2020 иестэ палыця кудосто ливтсь инвалидность марто цёра.
Добровольчествань героекс кармась Ромодановань райононь Курмачкасы велестэ Захар Прилепинэнь фондонь волонтёрось Галина Созаева. Сон кавто ковт важодсь Луганской Народной Республикасо – пачтясь гуманитарной лезкс, лездась пурнамс ярмакт УАЗ автомобиленть рамамс, конань пачтизе СВО-нь таркантень Мордовиясто боецтнэнень.
«Герои семьи» номинациясонть изнясть Ташто Шайговасто Александр ды Ольга Котькинтнэ; «Герои семьи. Династия» специальной номинациясонть – Отяжелень районсто Владимир ды Мария Феофановтне.
Социальной важодицянь героекс кармась Ташто Шайговасто Елена Малыженкова.
«Герои по зову сердца» номинациясонть изнясь Владимир Захарин. 2021 иень августсто Отяжелень райононь Рузонь Дубровка велесэ идесь ваиця ломань. Медицинань героекс кармась Александра Чарышкина – Эйкакшонь республиканской клинической больницянь анестезиологось-реаниматологось.
Цидярдомачинь коряс героекс кармась Даяна Паршакова – поэтессась, Темниковань кудонь-интернатонь эрицясь.
«Герои образования» номинациясонть изнясь Галина Алямкина – Ковылкинань 3№ школань рузонь келень ды литературань тонавтыцясь; «Герои науки» номинациясонть – Лариса Балыкова, Н. П. Огарёв лемсэ МГУ-нь Медицинской институтонь прявтось.
Производствань героекс кармась Светлана Тараканова – «ВКМ-Сталь» заводонь машинистэсь; «Герои производства. Наставник» специальной номинациясонть изнясь Иван Дьяков – «Мордовский бекон» ЗАО-нь агрономось.
Спортонь героекс теевсь Руслан Бичурин – Алексей Мишин лемсэ спортивной бороцямонь ды дзюдонь коряс олимпийской резервань спортивной школань бороцицясь, греко-римской бороцямонь коряс ды каркссо бороцямонь коряс Россиянь спортонь мастерэсь, 2022 иень Россиянь сехте виев спортсментнэнь спартакиадань чемпионось.
«Герои культуры» номинациясонть изнясь Андрей Бочканов – Мордовской государственной филармониянь солистэсь; «Герои экологии» номинациясонть – Ольга Ручина, «Зеленый мир» экологической организациянь руководителесь; «Герои зоозащиты» номинациясонть – Юлия Потапова.
«Герои села» номинациясонть изнясь Павел Шершаков – «Ресурс» агропромышленной комплексэнь руководителесь ды блогерэсь.
«Герои меценатства» номинациясонть изнясь Владимир Кабаев – фермерэсь-паронь теицясь. Сон яви ярмаконь лезкс сэредиця ломантненень, нужасо эриця семиятненень, одкстомтызе Ине Отечественной войнань солдаттнэнень алтазь кеврунгонть, рамась оборудования Покш Игнатовань райононь школасонть уликс медицинань кабинетэнть туртов. Владимир Юрьевич истя жо кучсь эсь фермасто ловсонь миемань кисэ саезь ярмакт Покш Игнатовань районсо чачозтненень, конат неень шкане примить участия СВО-сонть.
Ледстнематнень ванстомань героекс яволявтозь Игорь Лошкарев, сон комсь иеде икеле теизе «Владычный полк» исторической реконструкциянь ды средневековой фехтованиянь клубонть.
Каземань церемониясь невтизе: геройтне – минек ютксот, сынь важодить вакссонок, алкуксокс топавтыть эсь тевест, кемить паронтень, видечинтень ды тонавтыть тенень эсь эйкакштнень.
Валентина Юдина